Kufa kwake Kristo ni ng'ombe ya tambiko inayotimiliza.

¹Maonyo hufanana, kama ni kivuli tu cha yale mema yatakayotokea, wala siyo sura yao yenyewe, ni kufanana tu nayo. Navyo vipaji vya tambiko, walivyovipeleka kila mwaka, ni vivyo hivyo kale na kale, navyo haviwezi kuwapa utimilifu wenye kuvitoa.[#Ebr. 7:19; 8:5; Kol. 2:16-17.]

²Je? Hao wenye kutambika wakiisha kutakaswa mara moja, kama wasingejua mioyoni kwamba: Makosa yako, hawangeacha kupeleka vipaji vya tambiko?

³Lakini hivyo vipaji vya tambiko ndivyo vinavyowakumbusha makosa yao mwaka kwa mwaka,[#3 Mose 16:21,34.]

⁴kwani damu za ng'ombe na za mbuzi haziwezi kuondoa makosa.

⁵Kwa hiyo anasema anapoingia ulimwenguni:

Ng'ombe na vyakula vya tambiko hukuvitaka;

lakini umenitengenezea mwili.

⁶Ng'ombe za tambiko zinazoteketezwa nzima

navyo vipaji vya kulipa makosa hukupendezwa navyo.

⁷Ndipo, niliposema: Tazama, ninakuja!

Mambo yangu yameandikwa katika kitabu cha kale,

niyafanye, uyatakayo wewe, Mungu.

⁸Kwanza anasema: Ng'ombe na vyakula vya tambiko, nazo ng'ombe za tambiko zinazoteketezwa nzima, navyo vipaji vya kulipa makosa hukuvitaka, wala hukupendezwa navyo, tena hutolewa, kama vilivyoagizwa.

⁹Kisha alisema: Tazama, ninakuja, nifanye uyatakayo wewe. Hivyo analitangua lile la kwanza, apate kulisimamisha lile la pili.

¹⁰Kwa hayo, aliyoyataka, tumetakaswa, kwani mwili wake Yesu Kristo ulitolewa mara moja.[#Ebr. 9:12,28; Ebr. 10:1; 2 Mose 29:38.]

¹¹Kila mtambikaji husimama siku kwa siku akitambika, navyo vipaji vya tambiko, anavyovitoa mara nyingi, ni vivyo hivyo visivyoweza kabisa kuondoa makosa.

¹²Lakini huyu alitoa kipaji kimoja tu cha tambiko kwa ajili ya makosa ya watu, nacho ni cha kale na kale, kisha aliketi kuumeni kwa Mungu.[#Ebr. 10:10,14.]

¹³Sasa anangoja tu, adui zake wawekwe chini miguuni pake.[#Sh. 110:1.]

¹⁴Kwani kwa kukitoa kile kipaji chake kimoja cha tambiko amewapa wenye kutakaswa utimilifu ulio wa kale na kale.[#Ebr. 10:12.]

¹⁵Naye Roho Mtakatifu anatushuhudia hivyo. Kwani kwanza anasema:

¹⁶Bwana anasema:

Agano, nitakalolifanya nao,

siku hizi zitakapokuwa zimepita, ni hili:

Nitawapa maonyo yangu, yakae mioyoni mwao;

tena nitayaandika katika mawazo yao.

¹⁷Sitayakumbuka tena makosa yao na mapotovu yao.[#Ebr. 8:12; Yer. 31:34.]

¹⁸Basi, hayo yanapoondolewa, hapo hapana tena kutoa kipaji cha tambiko kwa ajili ya ukosaji.

Kwa hiyo tumkaribie Mungu pasipo woga!

¹⁹*Ndugu, changamko letu la sasa ni hili la kwamba: Tunayo njia inayotuingiza Patakatifu, ni damu ya Yesu;[#Mat. 27:51; Rom. 5:2.]

²⁰njia hii ni ya siku hizi, tena inatupa uzima; yeye ameifungua hapo, alipopaingia Patakatifu Penyewe, ni hapo, alipoutoa mwili wake.[#Ebr. 9:8.]

²¹Kwa hiyo tunaye mtambikaji mkuu wa Nyumba ya Mungu.

²²Basi, na tumwendee kwa mioyo yenye kweli, inayojikaza kumtegemea! Kwa hivyo, tulivyonyunyizwa mioyo, isijue tena ubaya, tena kwa hivyo, miili yetu ilivyooshwa kwa maji yatakatayo,[#Ebr. 4:16; Ef. 5:26; 1 Petr. 3:21.]

²³na tufulize kukiungama kingojeo chetu, tusichoke! Kwani yeye aliyetupa kiagio chake ni mwelekevu.[#Ebr. 4:14.]

²⁴Tena tuangaliane, tupate kuhimizana, tupendane kwa kufanya matendo mazuri![#Ebr. 13:1.]

²⁵Kisha tusiache makutano yetu, kama wengine walivyojizoeza, ila tuonyane! Tena tukaze kuonyana kwa hivyo, tunavyoona: Siku ile inakaribia!*[#Ebr. 3:13; 10:37; Rom. 13:11-12.]

Mtu asiubeze upole!

²⁶Kwani sisi tuliokwisha kuyatambua yaliyo ya kweli tukikosa tena kwa kuyapenda makosa, hakuna kipaji cha tambiko tena kilichotusalia cha kuondoa makosa,[#Ebr. 6:4-8.]

²⁷ila kinachotusalia ni woga wa kuingoja hukumu na ukali wa moto utakaowala wabishi.

²⁸Mtu ayatanguaye Maonyo ya Mose huuawa pasipo kuonewa uchungu, akisutwa na mashahidi wawili au watatu.[#4 Mose 15:30; 5 Mose 17:6.]

²⁹Tena je? Silo lipizi baya kuliko hilo limpasalo mtu, aliyemponda Mwana wa Mungu na kuiwazia damu ya Agano, aliyotakaswa nayo, kwamba: Haifai kitu? Huko siko kumkorofisha Roho aliyemgawia mema?[#Ebr. 2:3.]

³⁰Kwani twamjua aliyesema:

Lipizi ni langu mimi, ni mimi nitakayelipisha.

Na tena:

Bwana atawaamulia walio ukoo wake.

³¹Kunatia woga sana kutumbukia mikononi mwa Mungu aliye Mwenye uzima.

Kilimbiko chetu.

³²*Lakini mzikumbuke siku za kwanza, mlipoangazwa! Hapo mlivumilia mapigano mengi mkiteseka.[#Ebr. 6:4.]

³³Siku nyingine mkatolewa wenyewe kutazamwa na watu, mkitukanwa pamoja na kuumizwa, siku nyingine mliwatazama wenzenu, wakifanyiziwa hivyo.[#1 Kor. 4:9.]

³⁴Kwani wale waliofungwa mliteseka pamoja nao; nanyi mliponyang'anywa, mliyokuwa nayo, mliitikia na kufurahi, kwani mlitambua, ya kuwa mnacho kilimbiko kiyapitacho yale kuwa kizuri, maana hakichakai.[#Mat. 6:20; 19:21,29.]

Mwongofu ataishi kwa kumtegemea Mungu.

³⁵Basi, msikitupe kingojeo chenu! Kwani kitawapatia malipo makubwa.

³⁶Lakini mnapaswa na uvumilivu, myafanye, Mungu ayatakayo, myapokee yale, mliyoagiwa.[#Luk. 21:19.]

³⁷Kwani

pamesalia padogo penyewe,

patokee mwenye kuja, hatakawia.

³⁸Naye mwongofu wangu atapata uzima kwa kunitegemea.

Lakini atakayerudi nyuma hataipendeza roho yangu.

³⁹Lakini sisi hatu wenye kurudi nyuma, tuangamie, ila wenye kumtegemea, tuziokoe roho zetu.*