Kwa hiyo tulitii Neno lake!

¹Kwa hiyo imetupasa kujikaza, tushikamane nayo, tuliyoyasikia, tusitengeke penye wokovu!

²Kwani neno lile lililosemwa na malaika lilikuwa na nguvu; kila aliyepitana nalo naye aliyekataa kulisikia akapata lipizi limpasalo.[#Tume. 7:53; Gal. 3:19.]

³Je? Sisi tutalikimbia tunapoubeza wokovu ulio mkuu kama huu? Kwani ulianza kutangazwa naye Bwana, kisha ukashupazwa kwetu nao waliousikia.[#Ebr. 10:29; 12:25.]

⁴Naye Mungu akaushuhudia na kufanya vielekezo na vioja na vyenye nguvu vingi na kuwagawia watu Roho takatifu kila mtu, kama alivyomtakia.[#Mar. 16:20; 1 Kor. 12:4,11; 2 Kor. 12:12.]

Ametimilika kwa njia ya mateso.

⁵Kwani malaika sio, aliowapa kuutawala ulimwengu utakaokuja, tunaousema.

⁶Lakini pako paliposemwa ushuhuda wa kwamba:

Mtu ndio nini, umkumbuke?

Mwana wa mtu naye, umkague?

⁷Ulimpunguza kidogo, asilingane na malaika,

ukamvika kilemba chenye utukufu na macheo,

⁸yote pia ukayaweka kuwa chini miguuni pake.

Basi, hapo, alipoviweka vyote chini yake, hakukisaza hata kimoja, asichokiweka chini yake. Lakini sasa hatujaona bado, ya kuwa vyote vimewekwa chini yake.

⁹Lakini kule kwamba: Alipunguzwa kidogo, asilingane na malaika, tunaona, ya kuwa kumetimia kwake Yesu. Kwa hivyo, alivyokufa matesoni, alivikwa kilemba chenye utukufu na macheo, maana aligawiwa na Mungu, awaonjee wote uchungu wa kufa.[#Ebr. 5:4; Fil. 2:8-9.]

¹⁰Kwani ni kwa ajili yake Mungu, vyote vikiwapo, naye ndiye aliyeviumba vyote; kwa hiyo ilimpasa, ile kazi ya kutimilika matesoni ampe yule aliyepeleka wana wengi kwenye utukufu alipowaokoa, apate kuwa kiongozi wao.[#Rom. 11:36.]

¹¹Kwani mwenye kutakasa nao wenye kutakaswa, wote walitoka kwake yeye mmoja. Kwa sababu hii haoni soni ya kuwaita ndugu akisema:[#Mat. 12:49; 25:40; Mar. 3:34-35; Yoh. 20:17.]

¹²Nitawasimulia ndugu zangu mambo ya Jina lako,

nitakuimbia wewe katikati yao walio wateule.

¹³Tena anasema:

Mimi nitakuwa ninamwegemea yeye.

Tena anasema:

Tazama mimi niko pamoja na hawa watoto, Mungu alionipa.

¹⁴Kwa sababu wale watoto wanayo miili yenye damu na nyama, vivyo hivyo na yeye alijipa mwili ulio hivyo kama yao; kwani alitaka, kufa kwake kumtangue yule aliyekuwa mwenye nguvu za kufa, maana ndiye yule Msengenyaji.[#Ebr. 2:17; Yoh. 12:31; 2 Tim. 1:10; 1 Yoh. 3:8.]

¹⁵Hivyo alitaka kuwakomboa wote walioshikwa utumwani siku zote za maisha yao, wakiogopa kufa.

¹⁶Kwani aliovitunzia hivyo, sio malaika, ila ndio wao wa uzao wake Aburahamu, aliowatunzia.

¹⁷Kwa hiyo ilimpasa kufanana na ndugu zake katika mambo yote, apate kuwa mtambikaji mkuu aliye mwenye huruma na welekevu machoni pake Mungu, aweze kuwa kole ya kuyalipa makosa ya watu.[#Fil. 2:7.]

¹⁸Kwani kwa hivyo, alivyoteseka na kujaribiwa mwenyewe, anaweza kuwasaidia wanaojaribiwa.[#Ebr. 4:15.]