Wasioweza kuokoka tena.

¹Kwa hiyo na tuyaache mafundisho ya kwanza ya Kristo, tuendelee kuwafundisha yaliyo ya kutimiza! Tusiweke tena msingi na kuwafundisha kwamba: Juteni mkiyaacha matendo yawauayo! Kisha mtegemeeni Mungu!

²Tuyaache nayo mafundisho ya ubatizo na ya kubandikiwa mikono na ya ufufuko wa wafu na ya hukumu ya kale na kale!

³Hayo tutayafuata, Mungu atakapotupa ruhusa.[#Ebr. 6:8; 10:26-29; Mat. 12:31; 2 Petr. 2:20-21; 1 Yoh. 5:16.]

⁴Kwani waliokwisha kuangazwa mioyo na kukionja kipaji kitokacho mbinguni na kugawiwa Roho takatifu

⁵na kulionja Neno la Mungu lililo zuri na kuzionja nguvu za siku zitakazokuja,

⁶basi, walio hivyo wakitengeka, haiwezekani tena kuwapatia upya, wapate kujuta. Kwani hao humwamba msalabani Mwana wa Mungu mara kwa mara pamoja na kumfyoza, huku ndiko kujiangamiza.

⁷Kwani nchi, ikiinywa mvua iinyeayo mara nyingi, huzaa maboga yanayowafalia wailimao, ikichipushwa na Mungu.

⁸Lakini ikizaa miiba na mibigili haifai tena, ikafikia kuapizwa, nayo mwisho huteketea.

Kishikeni kingojeo mpaka mwisho!

⁹Lakini hata tukisema hivyo, wapendwa, kwa ajili yenu ninyi tumejipa moyo wa kwamba: Yale mema yatupayo wokovu mnayo.

¹⁰Kwani Mungu siye mpotovu, hatayasahau matendo ya upendo wenu, mliyoyatumia ya kulikuza Jina lake na kuwatumikia watakatifu toka kale hata sasa.[#Ebr. 10:32-34.]

¹¹Lakini twataka sana, kila mmoja wenu ajikaze vivyo hivyo, apate kukishika kingojeo chetu chote kizima mpaka mwisho,[#Ebr. 3:14; Fil. 1:6.]

¹²msipate kuwa wavivu, ila mwaige wale walio wenye kuvirithi viagio kwa hivyo, walivyovitegemea na kuvumilia.

Kiapo cha Mungu.

¹³Kwani Mungu alipomwekea Aburahamu kiagio aliapa na kujitaja mwenyewe kwa kukosa aliye mkubwa kumpita, amtaje akiapa.[#1 Mose 22:16-17.]

¹⁴Akasema: Nitakubariki kweli, nikupe kuwa watu wengi sana.

¹⁵Naye alipovumilia akaona, kiagio kilivyotimia.

¹⁶Kwani watu wakiapa hutaja aliye mkubwa kuliko wao, nacho kiapo hukomesha kwao mabishano yote na kulitia nguvu lile neno.[#2 Mose 22:11.]

¹⁷Naye Mungu alipotaka sana kuwaonyesha wenye kiagio kwamba: Ayatakayo yeye hayatanguki kamwe, akaapa, wapate kutulia.

¹⁸Akataka, hayo mambo mawili yasiyotanguka kamwe - maana haiwezekani, Mungu aseme uwongo - yatupe matulizo yenye nguvu sisi tuliomkimbilia, tupate kukishika kingojeo chetu, tulichowekewa.

¹⁹Hicho tunakishika, kiwe nanga ya moyo isiyokosa nguvu za kutuliza; nacho ndicho kituingizacho namo mle ndani, tulimopingiwa na lile pazia.[#3 Mose 16:2,12.]

²⁰Humo ndimo, Yesu alimoingia, atufungulie njia, akawa mtambikaji mkuu wa kale na kale, kama Melkisedeki alivyokuwa.[#Ebr. 5:6.]