Agano Jipya.

¹Neno lililo kuu katika hayo, tuliyoyasema, ni hili: Tunaye mtambikaji mkuu aliyeketi mbinguni kuumeni kwa kiti cha kifalme chenye ukuu.[#Ebr. 4:14.]

²Naye ni mtunzaji wa Patakatifu na wa Hema lile la kweli, Bwana alilolisimamisha, siye mtu aliyelisimamisha.

³Kwani kila mtambikaji huwekwa kupeleka matoleo na vipaji vya tambiko. Kwa hiyo hata huyu amepaswa kuwa na kitu cha kumpelekea Mungu.[#Ebr. 5:1.]

⁴Kama angekuwa ulimwenguni, asingekuwa mtambikaji, maana wako wanaompelekea Mungu vipaji, kama walivyoagizwa.

⁵Nao huvitumikia vile vilivyo mfano na kivuli cha vile vilivyoko mbinguni. Ndivyo, Mose naye alivyoagizwa alipotaka kulitengeneza lile hema, kwamba:

Angalia, uyafanye yote kwa mfano, ulioonyeshwa mlimani!

⁶Lakini sasa huyu amepata utumikizi ulioupita, kwani agano, alilotuletea, ni zuri kuliko lile, tena limeunganishwa na maagizo na viagio vilivyo vizuri navyo kuliko vile.[#Ebr. 7:22; 12:24; 2 Kor. 3:6.]

⁷Kwani lile la kwanza kama lingalikuwa pasipo masazo, pasingalitafutwa mahali pa kuwekea la pili.

⁸Kwani anawakanya na kuwaambia: Bwana anasema:

Mtaona, siku zikija, ndivyo asemavyo Bwana;

ndipo, nitakapowatimilizia wao wa mlango wa Isiraeli

nao wa mlango wa Yuda Agano Jipya!

⁹Halitakuwa, kama Agano lile lilivyokuwa,

nililolifanya na baba zao siku ile,

nilipowashika mikono, niwatoe katika nchi ya Misri;

kwani wao wenyewe hawakulishika Agano langu,

nami nikawakataa; ndivyo, asemavyo Bwana.

¹⁰Kwani Bwana asema:

Agano, nitakalolifanya nao wa mlango wa Isiraeli,

siku hizi zitakapokuwa zimepita,

ni hili, asema Bwana:

Nitawapa Maonyo yangu, yakae katika mawazo yao,

tena nitayaandika mioyoni mwao;

nami nitakuwa Mungu wao,

nao watakuwa watu wangu.

¹¹Hawatafundishana tena mtu na mwenziwe

wala mtu na ndugu yake kwamba: Mtambue Bwana!

Kwani wote watanijua, hivyo walivyo wadogo,

mpaka wakiwa wakubwa.

¹²Kwani nitawahurumia kwa ajili ya mapotovu yao,

nisiyakumbuke tena makosa yao.

¹³Agano anapoliita Jipya, lile la kwanza amekwisha kulifanya kukuu. Lakini lililo kukuu na chakavu limefikia kutoweka.[#Rom. 10:4.]