Waisiraeli na Wayuda wanatishwa.

¹Yasikieni haya, ninyi watambikaji!

Yasikilizeni, nanyi mlio mlango wa Isiraeli!

Nanyi wa mlango wa mfalme, yategeni masikio!

Kwani liko shauri linalowataka,

kwa maana mmekuwa tanzi la kuwanasa Wamisipa

na wavu uliotegwa Tabori juu.

²Wakachimba mwina mrefu Setimu, lakini mimi nitawachapa wote.

³Mimi ninamjua Efuraimu, naye Isiraeli hafichiki, nisimwone,

kwani hata sasa, wewe Efuraimu, unaufuata ugoni,

naye Isiraeli amejipatia uchafu.

⁴Matendo yao yanawazuia kurudi kwa Mungu wao,

kwani roho ya ugoni imo mioyoni mwao, lakini Bwana

hawamjui.

⁵Majivuno ya Isiraeli huwaumbua usoni pake;

Isiraeli na Efuraimu watajikwaa kwa ajili ya manza,

walizozikora,

naye Yuda atajikwaa pamoja nao.

⁶Huchukua kondoo na ng'ombe kwenda kumtafuta Bwana,

lakini hawamwoni, amekwisha kutengana nao.

⁷Bwana wamemwacha kwa udanganyifu, wakazaa wana wasio wake.

Sasa mwezi utakaoandama utawala pamoja na fungu lao.

⁸Pigeni mabaragumu huko Gibea! Pigeni matarumbeta huko Rama!

Pigeni yowe Beti-Aweni: Ni nyuma yako, Benyamini!

⁹Siku, Efuraimu atakapochapwa,

atageuzwa kuwa mapori yaliyo peke yao;

niliyoyajulisha mashina ya Isiraeli yatatimia kweli.

¹⁰Wakuu wa Yuda wanafanana nao wanaosogeza mawe ya mipakani;

wao hao nitawamwagia machafuko yangu kama maji.

¹¹Efuraimu anakorofishwa, amepondwa na hukumu,

kwani alikuwa amependezwa kufuata maagizo ya watu.

¹²Mimi kwake Efuraimu ni kama mende,

nako kwao walio mlango wa Yuda kama ugonjwa wa ubovu.

¹³Efuraimu alipouona ugonjwa wake,

Yuda naye alipouona usaha wa madonda yake,

ndipo, Efuraimu alipokwenda Asuri,

naye akatuma kwa mfalme Yarevu (Mgombeaji),

lakini hataweza kuwaponya, wala hataukausha usaha wenu.

¹⁴Kwani mimi kwake Efuraimu ni kama simba,

nako kwao walio mlango wa Yuda kama mwana wa simba,

mimi, kweli mimi mwenyewe nitanyafua, kisha nitakwenda

zangu;

nitakapochukua, hapatakuwapo atakayeopoa.

¹⁵Nitakwenda kurudi mahali pangu,

mpaka watakapojutia, wautafute uso wangu;

kwa kusongeka kwao watanichungulia usiku kucha.