Mwandiko wa juu.

¹Haya ndiyo maono ya Yesaya, mwana wa Amosi, aliyoyaona kwa ajili ya Yuda na kwa ajili ya Yerusalemu siku za Uzia na za Yotamu na za Ahazi na za Hizikia, waliokuwa wafalme wa Yuda.

Kuyalilia makosa yao Waisiraeli.

²Sikilizeni, ninyi mbingu! Angalieni, ninyi nchi!

Kwani Bwana anasema:

Nilikuza wana, nikawapa utukufu; lakini wao wamenitengua.

³Ng'ombe humjua bwana wake.

naye punda hupajua,

mabwana wake wanapomwekea chakula;

lakini Isiraeli hanijui,

walio ukoo wangu hawanitambui.

⁴Utaona, wewe kabila lenye makosa,

nanyi mnaolemewa na manza, mlizozikora,

wewe kizazi cha wabaya, nanyi wana wapotovu!

Wamemwacha Bwana na kumbeza Mtakatifu wa Isiraeli,

wakarudi nyuma.

⁵Mnapigiwa nini, kwa kuwa mnafuliza bado kurudi nyuma?

Kila kichwa kiko na vidonda, kila moyo umeugua.

⁶Toka wayo wa mguu mpaka kichwani hapana palipo pazima,

ni madonda na machubuko na mapigo matupu;

hayaoshwi, wala hayakufungwa,

wala hayakulegezwa na mafuta.

⁷Nchi yenu ni mapori tu, miji yenu imeteketezwa na moto,

mashamba yenu yanaliwa na wageni machoni penu;

kweli ni mapori tu,

kama nchi zilivyo zikiharibiwa na wageni.

⁸Paliposalia ni penye binti Sioni,

ni kama kilindo mizabibuni,

ni kama dungu shambani kwa miboga,

kweli ni kama mji uliozungukwa na adui.

⁹Bwana Mwenye vikosi kama asingalitusazia hao wachache waliookoka,

tungalikuwa kama Sodomu, tungalifanana na Gomora.

Fundisho la tambiko la kweli.

¹⁰Lisikilizeni neno lake Bwana, ninyi waamuzi wa Sodomu!

Yaangalieni maonyo yake Mungu wetu, ninyi watu wa Gomora!

Bwana anasema: Ni vya nini

¹¹vipaji vyenu vingi, mnavyonitolea vya tambiko?

Nimeshiba kondoo, mlionichomea,

hata mafuta ya ndama wanonao,

damu zao ng'ombe na wana kondoo na mbuzi hazinipendezi.

¹²Mnapokuja kuoneka machoni pangu,

ni nani aliyevitaka hivyo mikononi mwenu,

mkija kuzikanyaga nyua zangu?

¹³Acheni kuleta tena vilaji vya tambiko visivyofaa!

Uvumba nao hunitapisha, hata sikukuu za miandamo ya mwezi

nazo za mapumziko na za makusanyiko;

sivumilii, upotovu ukiwa hapohapo, mnaponikusanyikia.

¹⁴Roho yangu huzichukia sikukuu zenu za miandamo ya mwezi

nazo sikukuu zenu nyingine,

zimeniwia mzigo mzito, nimechoka kuuchukua tena.

¹⁵Mkininyoshea mikono yenu, nitayafumba macho yangu, yasiione,

hata mkikaza kuniomba, sisikii;

maana mikono yenu imejaa damu.

¹⁶Iosheni na kuitakasa!

Uondoeni ubaya wa matendo yenu, macho yangu yasiuone tena!

Msiendelee na kufanya mabaya!

¹⁷Jifundisheni kufanya mema!

Tafuteni njia ya kunyosha maamuzi mkiwapingia wakorofi!

Waamulieni wafiwao na wazazi! Wagombeeni wajane!

¹⁸Njoni, tuumbuane! Ndivyo, asemavyo Bwana.

Makosa yenu ijapo yawe mekundu kama damu,

yatakuwa meupe kama chokaa juani;

ijapo yawe mekundu kama nguo za kifalme,

yatakuwa kama pamba.

¹⁹Ikiwapendeza, mnisikie, basi, mtakula mema ya nchi.[#3 Mose 25:18-19.]

²⁰lakini mkikataa, mkaacha kutii, mtaliwa na panga.

Kwani kinywa chake Bwana kimesema.

Kilio cha mapatilizo ya Yerusalemu.

²¹Kumbe mji uliokuwa wenye welekevu umegeuka kuwa wenye ugoni!

Ulikuwa umejaa maamuzi yanyokayo, wongofu ukapata kao kwako,

lakini sasa ni kao la wauaji.

²²Fedha yako imegeuka kuwa mavi ya chuma tu,

mvinyo yako imechanganywa na maji.

²³Wakuu wako hufanya fujo, wenzao ni wezi,

wao wote hupenda matunzo, hufuata fedha za kupenyezewa,

wafiwao na wazazi hawawaamulii,

wala mashauri ya wajane hayafiki kwao.

²⁴Kwa sababu hiyo ndivyo, asemavyo Bwana,

yeye Bwana Mwenye vikosi amtawalaye Isiraeli:

Patafika, nitakapojituliza kwao wapingani wangu,

nikiwalipiza adui zangu!

²⁵Ndipo, mkono wangu utakapokurudia tena,

hapo nitayayeyusha mavi yako ya chuma kwa dawa kali,

niyaondoe yasiyokupasa yote yaliyomo.

²⁶Kisha nitakupa tena waamuzi kama huko kale,

nao wakata mashauri watakuwa kama wao wa mwanzoni.

Kwa hiyo utaitwa Ngome ya Wongofu au Mji wenye Welekevu.

²⁷Sioni utakombolewa kwa maamuzi ya kweli,

nao watu wake walioigeuza mioyo

watakombolewa kwa wongofu.

²⁸Lakini wapotovu na wakosaji watavunjwa wote pamoja,

nao waliomwacha Bwana watatoweka.

²⁹Kwani watatwezwa kwa ajili ya mitamba, mliyoitunukia,

nazo nyuso zenu zitaiva kwa kuona soni

kwa ajili ya mashamba, mliyoyachagua.

³⁰Kwani mtakuwa kama mtamba uliokauka pamoja na majani yake,

au mtafanana na shamba lisilo na maji.

³¹Mwenye nguvu atageuka kuwa kama madifu makavu,

nazo kazi zake zitakuwa kama cheche la moto;

kisha yatateketea yote pamoja,

asipatikane awezaye kuuzima moto huo.