Masongano na matulivu ya Yerusalemu.

¹Mwenye kuapizwa ni wewe mkorofi usiyekorofishwa bado,

mwenye kuapizwa ni wewe mpokonyi usiyepokonywa bado.

Utakapomaliza kukorofisha utakorofishwa,

utakapomaliza kupokonya utapokonywa!

²Bwana, tuwie mpole! Wewe tumekungojea;

uwe mkono wao kila kunapokucha!

Uwe nao wokovu wetu, tunaposongeka!

³Waliposikia sauti ya uvumi, makabila ya watu yalikimbia,

wewe ukiinuka, wamizimu hutawanyika.

⁴Ndipo, mateka yenu yatakapookotwa,

kama watu wanavyookota nzige;

kama funutu wanavyojikimbilia,

ndivyo, watakavyojikimbilia.

⁵Bwana ametukuka, kwani anakaa juu,

hujaza Sioni maamuzi yaongokayo.

⁶Ndipo, siku zako zitakapokuwa zimeelekea pamoja,

yenye werevu wa kweli na utambuzi yatakuwa malimbiko ya kujisaidia,

kumwogopa Bwana ndiko kutakakokuwa mali zake Sioni.

⁷Wasikilizeni wanguvu wao wanaopiga makelele huko nje,

wajumbe wa kuomba utengemano wanalia kwa uchungu.

⁸Barabara ziko peke yao, hakuna apitaye njiani.

Amevunja agano kwa kuibeza miji

na kwa kuwawazia watu kuwa si kitu.

Nchi inazimia kwa kusikitika:

⁹Libanoni kumekauka kwa kuona soni,

Saroni kumegeuka kuwa kama nyika,

Basani na Karmeli kumepakatika majani.

¹⁰Ndivyo, anavyosema Bwana: Sasa nitainuka,

sasa nitajitukuza, sasa nitaoneka.

¹¹Kwa kuwa mimba zenu ni za majani makavu,

mtazaa mabua makavu tu;

kufoka kwenu ni moto utakaowala wenyewe.

¹²Ndipo, makabila ya watu yatakapochomwa kama chokaa,

watakuwa kama miiba iliyokatwa ya kuteketezwa na moto.

¹³Sikieni, ninyi mkaao mbali, mliyoyafanya!

nanyi mkaao karibu, zijueni nguvu zangu!

¹⁴Wakosaji walioko Sioni wamestuka,

tetemeko likawashika wapotovu,

wakasema: Kwetu sisi yuko nani

awezaye kukaa penye moto ulao?

Kwetu sisi yuko nani awezaye kukaa penye majiko

yasiyozima kale na kale?

¹⁵Ni yeye aendeleaye kwa wongofu naye asemaye yanyokayo,

naye akataaye mapato ya ukorofi

naye akung'utaye mikono yake, isishike mapenyezo,

naye ayazibaye masikio yake,

asisikie mashauri ya damu zilizomwagwa,

naye ayafumbaye macho yake, asiyaone mabaya.

¹⁶Ndiye atakayekaa juu:

maboma yaliyoko magengeni yatakuwa ngome yake,

mkate atapewa tu, nayo maji yake hayatakauka.

¹⁷Macho yako yatamwona mfalme katika uzuri wake,

yataiona nayo nchi, jinsi itakavyopanuka.

¹⁸Moyo wako utakapoyawaza yale mastusho utasema:

Yuko wapi mwenye kuhesabu fedha?

Yuko wapi mwenye kuzipima?

Yuko wapi mwenye kuihesabu minara?

¹⁹Lile kabila lenye ukorofi hulioni tena,

ndimi zao zikagugumiza tu maneno yasiyokuwa na maana.

²⁰Utazameni Sioni ule mji wetu wa kukusanyikiamo!

Macho yako yataona,

ya kuwa Yerusalemu ni kao lisilosumbua,

ni hema lisilosafiri,

mambo zake hazing'olewi kale na kale,

kamba zake zote hazikatiki kamwe.

²¹Kwani huko Bwana mwenye utukufu atakuwa kwetu,

atukingie penye mito mikubwa yenye mikono mipana,

mitumbwi ya kuvukia haitapatikana,

wala vyombo havitapita hapo.

²²Kwani Bwana ni mwamuzi wetu,

Bwana ndiye atakayetuongoza,

Bwana ni mfalme wetu, yeye ndiye atakayetuokoa.

²³Kamba zako zilikuwa zimelegea,

hazikuukaza ulingo wa mlingoti wao,

wala hazikutanda tanga;

ndipo, mateka mengi mazuri yatakapogawanywa,

nao waendao pecha wataweza kujitwalia mateka.

²⁴Hapataonekana mwenyeji

atakayesema: Nimeugua,

kwani watu watakaokaa mle

watakuwa wameondolewa manza, walizozikora.