Vinyago ni vya bure, wokovu uko kwake Mungu tu.

¹Beli ameanguka, Nebo naye yuko chini,

vinyago vyao viko migongoni kwa punda na ng'ombe;

vilivyotembezwa nanyi vimefungwa,

ikawa mizigo ya kuchokesha nyama wanaoichukua.

²Wako chini pamoja, kama walivyoanguka pamoja,

hawakuweza kuviokoa vinyago, visichukuliwe,

wao wenyewe wamekwenda kufungwa kwa kuwa mateka.

³Nisikilizeni, ninyi mlio wa mlango wa Yakobo!

Ninyi wote mlio masao ya mlango wa Isiraeli!

Ninyi ndio, niliojitwika tangu hapo,

mlipokuwa tumboni mwa mama zenu,

ninyi ndio, niliojichukuza tangu hapo, mlipozaliwa.

⁴Hata mtakapokuwa wazee, mimi ndimi niliyekuwa;

hata mtakapotoka mvi, mimi nitawachukua.

Mimi nitayafanya nikijitwika mimi,

mimi nitawachukua na kuwaokoa.

⁵Yuko nani, ambaye mtanifananisha naye, tuwe sawa?

Yuko nani, ambaye mtanilinganisha naye, tufanane?

⁶Watu humwaga dhahabu toka mifukoni,

hupima fedha kwa mizani,

humlipa fundi, naye hufanya mungu,

wauangukie na kuutambikia.

⁷Kisha huuchukua mabegani, huutembeza,

kisha huuweka mahali pake;

hapo unasimama pasipo kuondoka mahali pake.

Wanapoulilia, hauwaitikii;

hakuna, umwokoaye katika shida yake.

⁸Haya yakumbukeni, mjishupaze!

Yawekeni mioyoni, ninyi wapotovu!

⁹Yakumbukeni yale ya mwanzo yaliyokuwapo tangu kale!

Kwani mimi ndimi Mungu, hakuna mwingine tena,

kweli, hakuna Mungu aliye kama mimi.

¹⁰Tangu mwanzo nayatangaza yatakayokuwa mwisho,

toka kale nayasema yasiyofanyika bado.

Kila nisemapo, shauri langu litatimia,

yote yanipendezayo mimi huyafanya.

¹¹Ninaita kipanga maawioni kwa jua,

katika nchi ya mbali ndiko, ninakotoa mtu

atakayelifanya shauri langu.

Kama nilivyosema, ndivyo, nitakavyoyatimiza;

kama nilivyoyalinganya, ndivyo, nitakavyoyafanya.

¹²Nisikilizeni, ninyi wenye mioyo migumu,

ninyi mliojitenga na kuyaacha mbali yaliyoongoka!

¹³Yale yaongokayo nimeyafikisha karibu,

hayako mbali tena, wokovu wangu haukawilii.

Sioni ndimo, nitakamotokeza wokovu,

kwao Waisiraeli ndiko, nitakakotokeza utukufu wangu.