Yesaya 5

Mfano wa mizabibu isiyozaa.

¹Na niimbe mambo ya mpendwa wangu!

Ni wimbo wa mpenzi wangu wa kuiimbia mizabibu yake.

Mpendwa wangu alikuwa na shamba la mizabibu

penye kilima kilichoiotesha sana.

²Akalima na kuchimba, hata mawe akayaokota,

akapanda mizabibu mizuri akajenga dungu katikati,

akachimbua nalo kamulio kwake;

kisha alingoja, izae zabibu, lakini ikazaa mbaya zisizolika.

³Sasa ninyi mkaao Yerusalemu nanyi waume wa Yuda,

tuamulieni mimi na mizabibu yangu!

⁴Yako mambo gani ya kuifanyizia mizabibu, nisiyoifanyizia?

Mbona nilikaa na kuzingojea zabibu,

ikanizalia tu zisizolika?

⁵Sasa na niwajulishe, mimi nitakayoifanyizia mizabibu yangu:

nitaliondoa boma lao, iwe malisho,

nitakibomoa kitalu chao, ife kwa kukanyagwa.

⁶Nitaiacha, iwe pori lenyewe,

isipogolewe wala isilimiwe, pakue mikunju na mibigili;

kisha nitayaagiza mawingu, yasiinyeshee mvua.

⁷Kwani mizabibu ya Bwana Mwenye vikosi

ni mlango wa Isiraeli na watu wa Yuda,

ndio shamba lake lipendwalo naye.

Akangojea manyofu, lakini alipotazama, ni mapotovu;

akangojea wongofu, lakini alipotazama, ni vilio tu.

Maapizo sita.

⁸Yatawapata wanaokusanya nyumba na nyumba

ndio wanajiongezea mashamba na mashamba,

pasiwepo tena mahali pasipo penu,

mkae peke yenu katika nchi.

⁹Masikioni mwangu limo neno la Bwana Mwenye vikosi:

Kweli nyumba nyingi zitakuwa mahame,

ijapo ziwe kubwa na nzuri,

asipatikane mtu wa kukaa humo.

¹⁰Kwani mashamba kumi ya mizabibu yatatoa kibuyu kimoja tu,

kikapu kizima cha mbegu kitaleta pishi moja tu.

¹¹Yatawapata waamkao mapema wakijitafutia vileo

nao wakaao mpaka usiku kwenye pombe na kuvimbisha vichwa.

¹²Hapo wanyweapo yako mazeze na mapango,

hata matoazi na mazomari,

lakini kazi za Bwana hawazitazami,

wala matendo ya mikono yake hawayaoni.

¹³Kwa hiyo wao walio ukoo wangu watatekwa wakiwa hawajui maana,

watukufu wao watakuwa wenye njaa,

nao walio watuwatu tu watazimia kwa kiu.

¹⁴Kwa hiyo kuzimu kutakuwa kumejipanua

na kukifumbua kinywa chake pasipo mpaka,

watukufu wa Sioni pamoja na watu wake wapate kushuka

nao waliochezacheza mle na kupiga vigelegele vya furaha.

¹⁵Hapo watu watainamishwa, nao waume watanyenyekezwa,

hayo macho yenye majivuno yatanyenyekezwa.

¹⁶Lakini Bwana Mwenye vikosi

atatukuka kwa kunyosha maamuzi,

yeye aliye Mungu mtakatifu atajulika

kwa wongofu kuwa Mtakatifu kweli.

¹⁷Wana wa kondoo watalisha hapo, kama ni malisho yao,

nako kwenye mahame ya wale wakwasi watakula wageni.

¹⁸Yatawapata wajivutiao mabaya

kwa vigwe vya udanganyifu,

tena makosa kwa kamba za magari.

¹⁹Ndio wanaosema: Na apige mbio,

afanye upesi matendo yake, tuyaone!

Shauri lake Mtakatifu wa Isiraeli

na litimie na kutokea, tulitambue!

²⁰Yatawapata wanaosema: Kibaya ni chema

nacho chema wanakiita kibaya.

Giza huigeuza kuwa mwanga,

nao mwanga huugeuza kuwa giza.

Machungu huyageuza kuwa matamu,

nayo matamu huyageuza kuwa machungu.

²¹Yatawapata wanaojiwazia wenyewe

kuwa werevu wa kweli na watambuzi.

²²Yatawapata walio wenye nguvu za kunywa pombe,

walio na ufundi wa kuchanganya vileo.

²³Kwa kupenyezewa mali huwashindisha wapotovu shaurini,

lakini wongofu wao waongokao huutengua, wasishinde!

²⁴Kwa hiyo watakuwa hivyo: kama ndimi za moto zinavyokula mabua,

au kama majani makavu yanavyojipinda motoni,

ndivyo, mizizi yao itakavyobunguka,

nayo maua yao yatapeperushwa kama mavumbi,

kwani waliyakataa Maonyo yake Bwana Mwenye vikosi,

wakalibeza Neno lake Mtakatifu wa Isiraeli!

Mapatilizo yatakayokuja na Waasuri.

²⁵Kwa hiyo Bwana akawachafukia walio ukoo wake,

mkono wake ukawainamia, ukawapiga;

milima ikatetemeka, mizoga yao ikawa kama mataka njiani.

Kwa hayo yote makali yake hayajatulia bado,

mkono wake ungaliko umekunjuka bado.

²⁶Atatweka bendera ya kuwaitia wamizimu wakaao mbali

nao wakaao kwenye mapeo ya nchi atawapigia mbiu,

na mwaone, wakija na kupiga mbio sana.

²⁷Mwao hao hamna mchovu ajikwaaye mara kwa mara,

wala hamna apendaye kusinzia wala kulala usingizi,

wala hamna mwenye mshipi kiunoni ufungukao,

wala hamna mwenye viatu vikatikavyo mikanda.

²⁸Mishale yao itakuwa imenolewa, nyuta zao zitakuwa zimepindwa,

kwato za farasi wao zitaonekana kuwa ngumu kama mawe,

magurudumu ya magari yao yatapiga mbio kama upepo mkali.

²⁹Mazomeo yao ni kama ngurumo ya simba, hulia kama wana wa simba.

Watakuja na kuvuma na kukamata mateka, wayapeleke kwao;

napo hapo hatakuwapo atakayewaponya.

³⁰Makelele, watakayowapigia siku ile,

yatakuwa kama maumuko ya mawimbi ya bahari;

kama mtaichungulia nchi,

itakuwa yenye giza la kuogopesha,

mwanga utakuwa umegeuka giza

kwa weusi wa mawingu yaliyoko juu yake.