Waongofu watarudi Sioni na kuchangamka.

¹Nisikilizeni, ninyi mnaofuata yaongokayo,

ninyi mnaomtafuta Bwana!

Utazameni mwamba, ambao mlichongwa mumo humo!

Litazameni shimo la kisima, ambalo mlichimbuliwa mumo humo!

²Mtazameni baba yenu Aburahamu na mzazi wenu Sara!

Nilimwita yeye mmoja tu,

nikambariki, nikampa kuwa wengi.

³Kwani Bwana ameutuliza Sioni,

ameyatuliza mabomoko yake yote,

kwa kuwa atayageuza mapori yake kuwa mashamba,

nazo nyika zake kuwa kama bustani ya Bwana.

Ndipo, kutakapooneka mle kufurahi na kuchangamka,

kushukuru na kuimba kwa sauti kuu.

⁴Niangalieni, ninyi mlio ukoo wangu,

ninyi mlio watu wangu nisikilizeni!

Kwani maonyo yatatoka kwangu,

nayo yanyokayo machoni pangu

nitayaweka kuwa mwanga wa makabila ya watu.

⁵Bado kidogo nitakuja kushinda na kuutokeza wokovu wangu;

ndipo, mikono yangu itakapoyapatiliza makabila ya watu.

Mimi ndimi, visiwa vitakayemngojea

na kuuchungulia mkono wangu.

⁶Yaelekezeni macho yenu mbinguni!

Kisha zitazameni nchi zilizoko chini!

Kwani mbingu zitatoweka kama moshi,

nazo nchi zitachakaa kama nguo,

nao wazikaliao mara watakufa vivyo hivyo.

Lakini wokovu wangu utakuwa wa kale na kale,

nao wongofu wangu hautaangamika.

⁷Nisikilizeni, ninyi mjuao yaongokayo,

mlio watu wayashikao Maonyo yangu mioyoni mwenu,

msiogope kutwezwa na watu,

wala msiyastukie matusi yao!

⁸Yako yatakayowala, kama nondo wanavyokula nguo,

au kama mende wanavyokula pamba,

lakini wongofu wangu utakuwa wa kale na kale,

nao wokovu wangu utakalia vizazi na vizazi.

⁹Amka! Amka, uone nguvu, wewe mkono wa Bwana!

Amka kama siku za kale kwenye vizazi vya zamani!

Si wewe uliomkatakata Rahabu (Mkuu wa maneno wa Misri)

na kumchoma yule joka kubwa?

¹⁰Si wewe ulioikausha bahari

yenye vilindi vya maji mengi

na kutoa njia mlemle vilindini mwa bahari,

wapitemo waliokombolewa?

¹¹Waliookolewa na Bwana watarudi,

waje Sioni na kupiga shangwe;

vichwani pao itakuwa furaha ya kale na kale,

machangamko na furaha zitawafikia,

lakini machungu yatakimbia, wasipige kite tena.

¹²Mimi ndimi ninayewatuliza mioyo yenu.

Wewe ndiwe nani ukiogopa watu wafao

na wana wa watu watowekao kama majani?

¹³Umemsahau Bwana aliyekufanya,

aliyezitanda mbingu, aliyezishikiza nchi,

ukatetemeka siku zote pasipo kukoma

kwa ajili ya makali yake anayekusonga,

kwa kuwa alitaka kukuangamiza;

na sasa makali yake aliyekusonga yako wapi?

¹⁴Aliyepindika kwa kufungwa atafunguliwa upesi,

hatakufa, atupwe shimoni, wala hatakosa chakula chake.

¹⁵Kwani mimi na Bwana Mungu wako,

achafuaye bahari, mawimbi yake yaumuke;

Bwana Mwenye vikosi ni Jina langu.

¹⁶Nami nimeyaweka maneno yangu kinywani mwako,

nikakuficha kivulini mwa mkono wangu,

nipate kuzitokeza mbingu mpya na kuishikiza nchi tena,

na kuuambia Sioni: Ukoo wangu ndiwe wewe.

¹⁷Amka! Amka! Inuka, Yerusalemu!

Umekunywa mkononi mwa Bwana kikombe chenye makali yake,

hicho kikombe kilichojaa kileo cha kupepesusha

umekinywa na kukimaliza.

¹⁸Katika watoto wote, aliowazaa, hakuwako, aliyemwongoza,

wala katika watoto wote, aliowakuza,

hakuwako, aliyemshika mkono.

¹⁹Mambo yaliyokupata ni haya mawili,

-lakini yuko nani atakayekupongeza?-

kuvunjwa na kubomolewa,

tena kuuawa kwa njaa na kwa panga,

lakini nitawezaje kukutuliza moyo?

²⁰Wanao wa kiume walikuwa wamezimia,

wakalala pembeni kwenye njia zote za mji,

wakawa kama paa waliokamatwa na wavu,

kwa kuwa walileweshwa na makali yake Bwana,

na makemeo yake Mungu wako.

²¹Kwa hiyo yasikilize haya,

wewe uliyenyongeka kwa kulewa, lakini sio kwa mvinyo!

²²Ndivyo, anavyosema Bwana aliye Bwana na Mungu wako,

awapiganiaye walio ukoo wake:

Tazama! Nimekichukua mkononi mwako

kile kikombe chenye kileo cha kupepesusha,

hicho kikombe kilichojaa makali yangu hutakinywa tena.

²³Sasa nitakitia mikononi mwao waliokutesa,

waliokuambia: Lala chini, tupite juu yako!

nawe hukuwa na budi kitumia migongo yako kuwa nchi,

kuwa njia ya kupitia hapohapo.