Mji wa Babeli utatekwa na Wamedi; ndipo, Wayuda watakapofunguliwa.

¹Hivi ndivyo, Bwana anavyosema: Mtaniona, nikiinua upepo uangamizao, uujie Babeli nao wakaamo walio wenye mioyo ya kuniinukia.

²Nitatuma wenye nyungo kwenda Babeli, waupepete, kisha watazichukua mali za nchi, kwani siku ile mbaya watazunguka mjini po pote.[#Yer. 15:7.]

³Hapo hatakuwako mwenye upindi atakayewapiga mshale, wala hatakuwako mwenye shati ya chuma atakayeweza kuwainukia. Lakini msiwaonee uchungu vijana wake! Ila wao wote wa vikosi vyao watieni mwiko wa kuwapo!

⁴Hivyo wataanguka tu katika nchi ya Wakasidi waliopata vidonda, nao waliochomwa watalala huko barabarani.

⁵Kwani Isiraeli na Yuda hawakuachwa na Mungu wao aliye Bwana Mwenye vikosi, wawe wajane, ila nchi yao wale ilijaa maovu, waliyomkosea Mtakatifu wa Isiraeli.[#Yer. 50:11,29; Yes. 54:4.]

⁶Kimbieni na kutoka mwake Babeli, kila mtu aiponye roho yake, msinyamazishwe kwa ajili ya manza, walizozikora wao! Kwani hii ndiyo siku ya lipizi ya Bwana, awalipishe matendo yao.[#Yer. 50:8; Yes. 48:20; Ufu. 18:4.]

⁷Babeli ulikuwa kinyweo cha dhahabu mkononi mwa Bwana kilichozilevya nchi zote; mvinyo yake mataifa yaliinywa, kwa hiyo mataifa yakaingiwa na wazimu.[#Yer. 25:25; Ufu. 17:4; 18:3.]

⁸Mara Babeli umeanguka, ukavunjika! Ulilieni! Leteni mafuta ya kwaju kuyatia penye madonda yake! Labda utapona.[#Ufu. 18:2.]

⁹Tulitaka kuuponya Babeli, lakini haukuponyeka; basi, uacheni, twende kila mtu katika nchi ya kwao! Kwani hukumu yake inafika hata mbinguni, inakwenda juu mpaka kwenye mawingu.

¹⁰Bwana ameyatokeza, ya kuwa mambo yetu yameongoka; njoni, tusimulie Sioni, Bwana Mungu wetu aliyoyafanya.

¹¹Inoeni mishale! Zishikeni ngao! Bwana ameziinua roho za wafalme wa Wamedi, kwani mawazo yake yameuelekea Babeli, auangamize, kwani hili ndilo lipizi lake Bwana, alilipizie Jumba lake takatifu.[#Yer. 50:28; Yes. 13:17.]

¹²Twekeni bendera zielekeazo kuta za Babeli! Malindo yatieni nguvu mkiongeza walinzi na kuweka nao wenye kuvizia! Kwani Bwana aliyoyawaza huyafanya, ayatimize nayo yale, aliyoyasema, ya kuwa atawafanyizia wakaao Babeli.

¹³Unakaa penye maji mengi, unavyo vilimbiko, lakini mwisho wako umefika, ndipo hapo palipopimiwa choyo chako.[#Ufu. 17:1.]

¹⁴Bwana Mwenye vikosi amejiapia mwenyewe kwamba: Ijapo nimekujaza watu kama nzige, itakuwa, wakuzomee kwa kukushinda.

¹⁵Yeye ndiye aliyeifanya nchi kwa uwezo wake, akausimika ulimwengu kwa werevu wake wa kweli, akazitanda mbingu kwa utambuzi wake.

¹⁶Huvumisha maji mbinguni kwa ngurumo na kupandisha mawingu yatokayo mapeoni kwa nchi, kisha hupiga umeme kwenye mvua na kutoa upepo huko, alikouweka.

¹⁷Ndipo, kila mtu anapopumbaa tu, asijue yatokako, hata kila mfua dhahabu hupatwa na soni kwa ajili ya kinyago chake, kwani alichokitengeneza ni uwongo tu, hata pumzi haimo.

¹⁸Havina maana, ni kazi ya kuchekwa tu; siku vitakapopatilizwa huangamia.

¹⁹Lakini aliye fungu lake Yakobo hafanani navyo, kwani yeye ndiye aliyeyatengeneza yote, naye Isiraeli ni ukoo uliopata fungu kwake; Bwana Mwenye vikosi ni Jina lake.

²⁰Kweli ulikuwa nyundo yangu, nikakutumia kuwa chombo cha vita; hivyo nikaponda mataifa, nikaangamiza nchi za kifalme kwa kukutumia.[#Yer. 50:23; Yes. 10:5.]

²¹Nikaponda farasi pamoja nao waliowapanda kwa kukutumia, nikaponda magari nao walioyapanda kwa kukutumia.

²²Nikaponda waume na wake kwa kukutumia, nikaponda wazee na wana kwa kukutumia, nikaponda wavulana na wasichana kwa kukutumia.

²³Nikaponda wachungaji na makundi yao kwa kukutumia, nikaponda wakulima pamoja na ng'ombe wao wa kulima kwa kukutumia, nikaponda watawala nchi na wakuu kwa kukutumia.

²⁴Lakini machoni penu nitaulipisha Babeli pamoja nao wote wakaao katika nchi ya Wakasidi mabaya yao yote, waliyoyafanya huko Sioni; ndivyo, asemavyo Bwana.[#Yer. 50:29.]

²⁵Ndivyo, asemavyo Bwana: Utaniona, nikikujia wewe, mlima uangamizao! Umeziangamiza nchi zote, lakini nimekukunjulia mkono wangu, nikuporomoshe, utoke miambani; nitakugeuza kuwa mlima uliochomwa moto.

²⁶Hawatachukua kwako mawe ya pembeni wala ya msingi, kwani utakuwa jangwa la kale na kale; ndivyo, asemavyo Bwana.

²⁷Twekeni bendera katika nchi hii! Pigeni mabaragumu kwa mataifa! Yaeueni mataifa, yaujie! Ziiteni nchi za kifalme za Ararati na za Mini na za Askenazi, ziujie! Wekeni mkuu wa vita, aupige! Pandisheni farasi walio wengi kama nzige wenye manyoya![#1 Mose 10:3; Yes. 13:3.]

²⁸Yaeueni mataifa, yaujie, wafalme wa Wamedi nao watawala nchi wa kwao nao wakuu wao wote na nchi zote za ufalme wao!

²⁹Ndipo, nchi itakapotetemeka kwa kustuka, kwani mawazo yake Bwana yameuinukia Babeli kuigeuza nchi ya Babeli kuwa peke yake tu, isikae mtu.

³⁰Wapiga vita wa Babeli wameacha kwenda vitani, hukaa ngomeni, nguvu zao zimezimia, wakageuka kuwa wanawake; makao yao ya mjini wameyateketeza, makomeo yao yakavunjwa.

³¹Mkimbizi anamfuata mkimbizi mwenziwe, vilevile mjumbe anamfuata mjumbe mwenziwe kumpasha mfalme wa Babeli habari, ya kuwa mji wake umetekwa, wakiutokea pande zote;

³²ya kuwa vivuko vyote vimechukuliwa, ya kuwa manyasi ya bwawani yamechomwa moto, kwa hiyo wapiga vita wakaishia ukali.

³³Kwani hivi ndivyo, Bwana Mwenye vikosi, Mungu wa Isiraeli, anavyosema: Binti Babeli anafanana na mahali pa kupigia ngano pakitengenezwa na kupondwa, siku za mavuno zitaujia bado kidogo.

³⁴Nebukadinesari, mfalme wa Babeli, amenila, amenitowesha, ameniweka kuwa chombo kitupu, amenimeza kama joka na kulijaza tumbo lake, akanifukuza katika paradiso yetu.

³⁵Makorofi, waliyonitendea, nayo miili ya watu, waliowaua kwetu, na iujie Babeli! ndivyo, watakavyosema wakaao Sioni; damu, walizozimwaga kwetu, na ziwajie wakaao katika nchi ya Wakasidi! ndivyo, watakavyosema Wayerusalemu.

³⁶Kweli hivi ndivyo, Bwana anavyosema: Kwa hiyo mtaniona, nikiwagombea magomvi yenu, nikiwalipizia malipizi yenu; nitaukausha mto wao mkubwa, navyo visima vyao nitavinyima maji, vipwe.

³⁷Hivyo Babeli utageuka kuwa machungu ya mabomoko na makao ya mbwa wa mwitu, kwa kustukiwa utazomelewa, kwa kuwa hautakaa mtu.[#Yer. 50:13.]

³⁸Watanguruma wote pamoja kama simba, wataguna kama simba wachanga.

³⁹Lakini vichwa vyao vitakapokuwa vinene, ndipo, nitakapowapa vinywaji vyao vya kuwalevya, wapige vigelegele, kisha walale usingizi wa kale na kale, wasiamke tena; ndivyo, asemavyo Bwana.

⁴⁰Nitawaangusha kama wana kondoo, wakichinjwa kama madume ya kondoo na ya mbuzi.

⁴¹Kumbe Sesaki umetekwa! Kumbe umechukuliwa uliosifiwa na nchi zote! Kumbe Babeli umegeuka kuwa stusho kwa mataifa![#Yer. 25:26.]

⁴²Bahari imepanda kuja Babeli, ukafunikizwa na mawimbi yake yaumukayo.

⁴³Miji yake ikawa ya kustukiwa kwa kuwa nchi kavu na jangwa, ni nchi isiyokaa mtu ye yote, wala hapapiti mwana wa mtu.

⁴⁴Nitampatiliza naye Beli mle Babeli nikitoa kinywani mwake, aliyoyameza, mataifa yasimjie tena mengi na mengi; nazo kuta za boma la Babeli zitaanguka.[#Yer. 50:2.]

⁴⁵Tokeni mwake, ninyi mlio ukoo wangu! Kila mtu na aiponye roho yake, asifikiwe na makali yake Bwana yenye moto![#Yer. 51:6.]

⁴⁶Mioyo yenu isizimie kwa woga, mtakapozisikia zile habari zitakazosikilika katika nchi hii, mwaka mmoja ikija habari, mwaka mwingine ikija habari tena, nao ukorofi ukizidi katika nchi hii, kwa kuwa watawala nchi watainukiana.

⁴⁷Kwa hiyo mtaona, siku ikija, nitakapovipatiliza vinyago vya Babeli, nchi yake yote ipatwe na soni, kwa kuwa watu wake wote waliouawa wataanguka mlemle mwake.

⁴⁸Ndipo, mbingu na nchi navyo vyote vilivyomo vitakapouzomea Babeli, kwani toka kaskazini waangamizaji wataujia; ndivyo, asemavyo Bwana.[#Ufu. 18:20.]

⁴⁹Babeli nao utaanguka kwa ajili ya Waisiraeli walioanguka wakiuawa, kama walivyoanguka watu wa nchi zote wakiuawa kwa ajili ya Babeli.

⁵⁰Ninyi mliozikimbia panga, nendeni tu msisimame! Nako katika nchi za mbali mkumbukeni Bwana! Nao Yerusalemu na uingie mioyoni mwenu![#Sh. 137:5.]

⁵¹Tuliona soni, tulipotukanwa, nyuso zetu zote zikaiva kabisa, wageni walipopaingia Patakatifu pa Nyumba ya Bwana.

⁵²Ndivyo, asemavyo Bwana: Kwa hiyo mtaona, siku zikija, nitakapovipatiliza vinyago vyake Babeli; ndipo, wenye kuumizwa watakapopiga kite katika nchi yake yote.

⁵³Babeli ingawa upande hata mbinguni kujijengea huko juu ngome yenye nguvu, huko nako waangamizaji wataujia; ndivyo, asemavyo Bwana.

⁵⁴Sauti za makelele zinasikilika upande wa Babeli na shindo la vunjiko kubwa upande wa nchi ya Wakasidi.

⁵⁵Kwani Bwana anauangamiza Babeli na kuzikomesha sauti za makelele yake makuu; mawimbi yanayoujia yanavuma kama maji mengi, sauti za kuumuka kwao zinazidi.

⁵⁶Kwani mwangamizaji ameujia Babeli, wapiga vita wake watekwe, pindi zao zivunjwe, kwani Bwana ni Mungu mwenye lipizi, hulipisha, naye hasazi akilipisha.[#5 Mose 32:35.]

⁵⁷Ndipo, nitakapowalevya wakuu wake na werevu wake wa kweli na watawala nchi wake na wajumbe wake na wapiga vita wake, walale usingizi wa kale na kale, wasiamke tena; ndivyo, asemavyo Mfalme, Bwana Mwenye vikosi ni Jina lake.[#Yer. 51:39.]

⁵⁸Ndivyo, Bwana Mwenye vikosi anavyosema: Kuta za boma la Babeli, zingawa ni nene, zitabomolewa mpaka chini, nayo malango yake, yangawa ni marefu, yatateketezwa kwa moto. Koo za watu husumbukia mambo ya bure, nayo makabila hujichokesha kwa ajili ya moto.[#Hab. 2:13.]

⁵⁹Hili ndilo neno, mfumbuaji Yeremia alilomwagizia Seraya, mwana wa Neria, mwana wa Masea, alipokwenda Babeli pamoja na mfalme Sedekia, mfalme wa Yuda, katika mwaka wa nne wa ufalme wake; naye Seraya alikuwa mkuu wa makambi.[#Yer. 36:4.]

⁶⁰Yeremia alikuwa ameyaandika hayo mabaya yote yatakayoujia Babeli katika kitabu kimoja, ni hayo maneno yote, Babeli uliyoandikiwa humo.

⁶¹Yeremia akamwambia Seraya: Utakapofika Babeli, jitafutie pafaapo, kisha yasome hayo maneno yote!

⁶²Ndipo, utakaposema: Wewe Bwana, umepaambia mahali hapa, ya kuwa utapaangamiza, pasiwe mtu wala nyama atakayekaa hapa, kwani patakuwa peke yake tu kale na kale.

⁶³Utakapokwisha kukisoma kitabu hicho, ukifungie jiwe, kisha ukitupe katikati katika mto wa Furati[#Ufu. 18:21.]

⁶⁴ukisema: Hivi ndivyo, Babeli utakavyozama, usioneke tena kwa ajili ya mabaya, mimi nitakayouletea, hata wazimie.

Mpaka hapa ni maneno ya Yeremia.