Watu hutoweka upesi.

¹*Mtu aliyezaliwa na mwanamke huwapo siku chache, nayo anayoyashiba ni mahangaiko tu.

²Huchanua kama ua, kisha hupukutika, hupita upesi kama kivuli, hakai.[#Sh. 90:5.]

³Ingawa awe hivyo, unayafumbua macho, kusudi yamlinde; lakini mimi unanipeleka shaurini, tusemeane huko.

⁴Miongoni mwao waliotoka kwa mwenye uchafu yuko atakataye? Hata mmoja tu hayuko.[#Sh. 14:3.]

⁵Mtu amekwisha kukatiwa siku zake, miezi yake imekwisha kuhesabiwa na wewe mwenyewe, umeiweka mipaka yake, asiipite.*[#Sh. 31:16; 39:5.]

⁶Ikiwa hivyo, acha kumtazama, apate kupumzika, aifurahie hiyo siku yake kama mkibarua![#Iy. 7:1-2.]

⁷Kwani kiko kingojeo kinachoupasa huo mti nao: kama unakatwa, huchipuka tena, nayo hayo machipukizi yake hayakomi.

⁸Mizizi yake ikioza nchini ndani, nalo shina lake likifa mchangani,

⁹kwa unyevu wa maji tu utachipuka tena, upate matawi sawasawa kama mche mpya.

¹⁰Lakini mtu akifa hutoweka, mwana wa Adamu akiisha kuzimia huenda wapi?

¹¹Maji ya bahari hupwa, nayo ya mtoni hupotea kabisa, pawe pakavu.

¹²Vivyo hivyo naye mtu akija kulala hainuki tena; mpaka mbingu zitakapotoweka, hawaamki, wala hawataamshwa usingizini mwao.[#Iy. 7:10; 19:25.]

¹³Laiti ungenificha kuzimuni, ukanilindia huko, mpaka yatulie makiali yako! Muda ulionikatia utakapokwisha pita, ungenikumbuka hapo![#Sh. 27:5; 31:21; Yes. 26:20.]

¹⁴Mtu atarudi uzimani tena akiisha kufa? Kama ndivyo, ningengoja siku zangu zote za kushindana na mateso, mpaka nitakapopokelewa na mwenzangu mwingine.[#Iy. 7:1.]

¹⁵Hapo ningekuitikia, utakaponiita kwa kukitunukia kiumbe cha mikono yako.

¹⁶Sasa ukizihesabu nyayo zangu po pote, zilipokanyaga, makosa yangu nayo huyaangalii?

¹⁷Hapo maovu yangu yangefungiwa mfukoni na kutiwa muhuri, nazo manza zangu, nilizozikora, ungezifuta.[#Hos. 13:12.]

¹⁸Lakini sivyo; mlima ukianguka hutoweka, nao mwamba huondoka mahali pake, ulipokuwapo.

¹⁹Maji husaga mawe, yawe madogo, nayo mafuriko ya maji huuchukua mchanga wa nchi, hivyo nacho kingojeo cha mtu unakiangamiza.[#Rom. 5:5.]

²⁰Unamshinda siku zote pia, ajiendee, unaugeuza uso wake ukimtuma kujiendea.

²¹Wanawe kama wanapata macheo, havijui; au kama wananyenyekezwa, hayatambui mambo yao.

²²Huyasikia tu maumivu ya mwili wake yeye, nayo roho yake husikitika kwa ajili yake yeye.

Elifazi anasema mara ya pili: Wasiomcha Mungu hupatwa na mabaya.

Elifazi wa Temani akajibu akisema: