¹Roho yangu mtaisikitisha mpaka lini

²kwa kujisemea maneno tu ya kuniumiza?

³Sasa ni mara kumi, mkinitukana; lakini kwa kunihangaisha hivyo hamwoni soni?

⁴Itakapotokea kuwa kweli, ya kama nimekosa, mimi ndiye, litakayemkalia hilo kosa langu.

⁵Kama mnajikuza kweli na kunibeua, kama mimi ni mtu apaswaye na kutwezwa, haya! Niumbueni!

⁶Jueni, ya kuwa ndiye Mungu aliyenipotoa kwa kunitegea pande zote tanzi lake.

⁷Tazameni! Nikiulilia ukorofi sijibiwi, wala hakuna aniamuliaye, nikilalamika.[#Iy. 30:20.]

⁸Njia yangu ameifunga kwa kitalu, nisipitie hapo, napo penye mikondo yangu amepapatia giza.[#Omb. 3:7,9.]

⁹Yaliyokuwa utukufu wangu amenivua, nacho kilemba amekiondoa kichwani pangu.

¹⁰Kwa sababu amenibomolea pande zote, sina budi kujiendea, nacho kingojeo changu ameking'oa, kama ni mti tu.

¹¹Akanitolea makali yake, yaniwakie moto, akaniwazia kuwa kama mmoja wao wapingani wake.[#Iy. 13:24; 33:10.]

¹²Vikosi vyake vikaja, vikutanie pamoja, vikajitengenezea njia ya kufika kwangu, vikayapiga makambi yao, yanizunguke hemani mwangu.[#Iy. 30:12.]

¹³Ndugu zangu akawaweka mbali, wasije kwangu, nao wenzangu wa kujuana nao wakanigeukia kuwa kama wageni.[#Sh. 31:12; 69:9.]

¹⁴Walio wa ukoo wangu nao wakapotea, nao rafiki zangu wema wakanisahau.[#Sh. 38:12.]

¹⁵Waliokaa pamoja na watumishi wa kike nyumbani mwangu wao ndio wanaoniwazia kuwa mgeni, machoni pao nikageuka kuwa mtu asiye wa kwao.

¹⁶Nikimwita mtumishi wangu, haitikii, sharti nimwambie maneno mengi ya kumbembeleza.

¹⁷Pumzi zangu zinamchukia mke wangu, mnuko wangu mbaya unawachukia, niliowazaa mwenyewe.[#Iy. 2:9.]

¹⁸Nao walio vijana bado hunibezabeza, nikiinuka, husema maneno ya kunifyoza.[#Iy. 30:1.]

¹⁹Wote waliokuwa wenzangu wa njama wanachukizwa na mimi, nao waliogeuka kuwa wapingani wangu ndio, niliowapenda.[#Iy. 19:13.]

²⁰Ngozi na nyama za mwili wangu zinagandamana na mifupa, kilichopona kwangu ni ufizi tu.[#Sh. 102:6.]

²¹Nihurumieni, nihurumieni, ninyi wenzangu! Kwani mkono wa Mungu umenipiga.[#Ruti 1:13.]

²²Mbona mnanikimbiza kama Mungu, msishibe kuzinyafuanyafua nyama za mwili wangu?[#Sh. 27:2.]

²³Laiti maneno yangu yangeandikwa kwa kupigwa chapa kitabuni!

²⁴Laiti yangechorwa namo mwambani kwa kalamu ya chuma, kisha kutiwe risasi, yawepo kale na kale!

²⁵Mimi ninayoyajua ndiyo haya: Mkombozi wangu yupo, ni mwenye uzima, naye huko mwisho ndiye atakayeinuka uvumbini.[#Yes. 41:14; Hos. 13:14; 2 Tim. 1:12.]

²⁶Mwili wangu wenye ngozi utakapokwisha kuharibika, huu mwili wangu wenye nyama utakapokuwa haupo, hapo ndipo, nitakapopata kumwona Mungu;[#Sh. 17:15; 73:24.]

²⁷mimi mwenyewe nitamwona kuwa wangu, macho yangu ndiyo yatakayomwona, siyo ya mgeni tu; mafigo yangu yanazimia ndani yangu kwa kuyatunukia hayo.[#1 Yoh. 3:2.]

²⁸Mkisema: Haya! Na tumkimbize! kwani mizizi ya mambo haya imeonekana kwangu:

²⁹uogopeni upanga rohoni mwenu! Kwani kutoa makali yenye moto hutupatia hukumu za upanga; zitakapotokea, ndipo, mtakapojua: mapatilizo yako!

Sofari anasema mara ya pili: Furaha za waovu hazikai.

Sofari wa Nama akajibu akisema: