¹Je? Hata leo maombolezo yangu ni kumkataa Mungu?

²Kwani mkono wangu umelemea kwa kupiga kite.

³Ninatamani kuijua njia ya kumwona, nifike hapo, anapokaa.

⁴Ningemwelezea shauri langu, alijue, nikakijaza kinywa changu maneno ya kushindana naye.

⁵Ningejua maneno, atakayonijibu, na kuyatambua, atakayoniambia.

⁶Je? Kwa nguvu zake nyingi angenigombeza? Sivyo, mwenyewe angeniangalia na kunisikia.

⁷Hapo ningeshindwa naye kwa kunyoka, nikapona kale na kale mikononi mwake anihukumuye.

⁸Lakini nikienda upande wa maawioni kwa jua, hayuko; wala upande wa machweoni kwa jua simwoni,

⁹wala kushotoni, kama yuko katika kazi zake, simpati, tutazamane; wala kuumeni simwoni, sijui, alikogeukia.

¹⁰Lakini anaijua njia, niliyoishika: kama angenijaribu, ningetokea nikitakata kama dhahabu.[#Sh. 17:3; 139:23-24.]

¹¹Kwani miguu yangu imeshika njia ya kuzifuata nyayo zake yeye, nikaiangalia hiyo njia yake, nisiiache.

¹²Sikurudi nyuma na kuliacha agizo la midomo yake, maneno ya kinywa chake nikayaangalia kuliko maongozi yangu.

¹³Lakini yeye alivyo, ndivyo alivyo, yuko nani awezaye kumgeuza? nayo roho yake inayoyataka kweli, huyafanya.

¹⁴Hivyo atayatimiliza nayo, aliyoyaagiza, yanipate mimi; yako mengi yaliyomo moyoni mwake kama hayo.

¹⁵Kwa hiyo nitastuka, nitakapomwona, nashikwa na woga naye nikijaribu kumtambua.

¹⁶Mungu ameutisha moyo wangu, yeye Mwenyezi akanistusha.

¹⁷Kwani kwa kuogopa giza sizimii, wala kwa kuliona giza lenye weusi, jinsi lilivyonifunika.