Ombolezo la Iyobu.

¹Kisha Iyobu akakifumbua kinywa chake, akaiapiza siku yake;

²yeye Iyobu akaanza kusema kwamba:[#Yer. 20:14-18.]

³Siku niliyozaliwa ingalifaa, kama ingaliangamia, pamoja na usiku ule, waliposema: Mimba hii ni mtoto wa kiume.

⁴Siku hiyo ingalifaa, kama ingalikuwa yenye giza, kama Mungu wa huko juu asingaliitafuta, kama mchana nao usingaliiangaza.

⁵Giza lenye kivuli kiuacho na liitake kuwa lake, mawingu yenye weusi na yaikalie na kuifunika, yageuzayo mchana kuwa giza na yaipatie vituko.

⁶Kama giza tupu lingaliupokonya, usiku ule nao ungalifaa, kama usingalihesabiwa katika siku za mwaka huo, wala kama usingaliingia katika hesabu ya miezi!

⁷Ningeuona kuwa mwema, kama usingalizaa kitu, wala kama usingalisikia sauti ya shangwe.

⁸Wajuao kuziloga siku sharti wauapize, ndio wao waliojipa mioyo kumchochea naye nondo wa baharini.

⁹Nyota zake za mapambazuko na ziguiwe na giza, usione mwanga ukiungojea, wala vishale vya mapambazuko usivione,

¹⁰kwa kuwa haukufunga mlango wa tumbo la mama yangu na kuyaficha masumbuko, macho yangu yasiyaone!

¹¹Mbona sikuweza kufa nilipotoka tumboni mwa mama? Mbona sikuzimia nilipotoka tumboni mwake?

¹²Mbona nilipokelewa na kuwekwa magotini? Mbona nikapata maziwa ya kuyanyonya?

¹³Kama sivyo, ningelala sasa na kutulia, ningelala usingizi na kujipatia mapumziko;

¹⁴ningekuwa pamoja na wafalme na wenye hukumu wa nchi waliojijengea machuguu makubwa ya kuzikiwa humo;

¹⁵au ningekuwa pamoja na wakuu waliokuwa wenye dhahabu, waliozijaza nyumba zao na kulimbika fedha;

¹⁶au ningalikwisha kuchimbiwa tu kama mimba iliyoharibika, nisipate kuwapo kama wachanga wasiouona mwanga.

¹⁷Huko ndiko, wanakokomea kuchafuka wasiomcha Mungu; ndiko, wanakopumzikia waliojichokesha kwa kuzitumia nguvu zao.

¹⁸Huko wafungwa wote pamoja hutengemana, hawasikii tena sauti ya msimamizi.

¹⁹Huko wadogo na wakubwa ni wamoja, nao watumwa wamekwisha kombolewa, wasiwe mali za mabwana zao.

²⁰Sababu gani anampa msumbufu kuona mwanga? Sababu gani anampa kuwapo mwenye uchungu rohoni?

²¹Ndio wanaokingojea kifo, lakini hawakipati; kuliko vilimbiko vilivyofichwa hutaka kukizua.[#Ufu. 9:6.]

²²Hao wangefurahi na kushangilia, wangechangamka kweli, kama wangeona kaburi.

²³Hao ni watu waliofichwa maana ya njia zao, wao ndio, Mungu aliowazibia mizungu yote pia.[#Iy. 19:8.]

²⁴Sharti kwanza nipige kite, ninapotaka kula, navyo vilio vyangu humwagika kama maji.

²⁵Kwani ninapostukia kistusho, hichohicho hunipata, nacho nilichokiogopa hunijia.

²⁶Sipati kutengemana wala kutulia wala kupumzika, kwani mahangaiko hunijia.

Elifazi anasema: Mungu haadhibu bure.

Elifazi wa Temani akamjibu akisema: