¹Ningoje kidogo, nikueleze mambo!

²Kwani yako mengine ya Mungu, nitakayoyasema.

³Haya, ninayoyajua, niliyatoa mbali, nimtokeze yeye aliyenifanya kuwa mwenye wongofu.

⁴Kweli maneno yangu siyo ya uwongo, anayesema na wewe ni mwenye ujuzi utimilikao.

⁵Tazama! Mungu ni mwenye uwezo, lakini hamtupi mtu, ni mwenye uwezo kwa nguvu zilizo za moyo.

⁶Hamkalishi uzimani asiyemcha, lakini watesekao huwakatia mashauri yaliyo sawa.[#Sh. 72:4,12.]

⁷Kwake mwongofu hayaondoi macho yake, anawakalisha pamoja na wafalme katika viti vya kifalme, wakae hapo kale na kale, wapate kutukuka.

⁸Lakini walipofungwa kwa mapingu, au walipokamatwa kwa kamba za mateso,

⁹ndipo, anapowaelezea matendo yao, wayaone, jinsi yalivyo, huwaonyesha mapotovu yao, waliyoyafanya kwa kujikuza.

¹⁰Hapo huwafunulia masikio, wasikie, akiwaonya, na kuwaambia, warudi na kuyaacha maovu yao, akiwatisha.[#Iy. 33:16.]

¹¹Ikiwa, wanamsikia, waje kumtumikia, ndipo, watakapozimaliza siku zao na kuona mema, nayo miaka yao na kuifurahia;

¹²wengine sharti wapite penye mishale iuayo, ndio wasiomsikia; kwa kukosa ujuzi watazimia.

¹³Ndipo, wenye mioyo mipotovu watakapokasirika, lakini hawatajipa mioyo ya kupiga kelele, ya kuwa aliwafunga.

¹⁴Hivyo roho zao zitakufa katika ujana wao, nayo mioyo yao huzimia kwao wagoni.

¹⁵Lakini watesekao huwaponya katika mateso yao, akawafunua masikio kwa kuwasonga.[#Iy. 36:10.]

¹⁶Wewe nawe anakutaka, akuopoe katika masongano, akuweke papana pasipokusonga, nawe uandaliwe yenye mafuta mengi mezani pako.

¹⁷Lakini ukizidi kuzitamani hukumu zao wasiomcha Mungu. basi, hukumu zao na mashauri yao yatakupata kweli.

¹⁸Angalia, ukali usikuponze, ukitukana, wala wingi wa makombozi usikupoteze!

¹⁹Je? Makelele yako yatakupatia mahali pasiposongeka, ijapo, ujikaze kulia kwa nguvu zote?

²⁰Usikutwetee kuchwa, kuwe usiku! Kwani ndio unaomaliza makabila mazima, yatoweke mahali pao.

²¹Jiangalie mwenyewe, usiyageukie maovu! Kwani ndiyo, unayoyapenda kuliko mateso.

²²Tazama! Mungu hufanya makuu kwa nguvu zake, yuko nani awezaye kufundisha kama yeye?[#Sh. 25:9.]

²³Yuko nani amwagizaye kuzishika njia zake yeye? Au yuko nani awezaye kumwambia: unafanya mapotovu?

²⁴Usisahau kuyatukuza matendo yake, watu wanayoyaimbia!

²⁵Watu wote huyatazamia na kuyachunguzia, yangaliko mbali.

²⁶Tazama! Mungu ni mkuu, tusimjue hivyo, alivyo, hesabu ya miaka yake haichunguziki.

²⁷Huvuta matone ya maji, yaje juu kuwa kungugu, kisha hugeuka kuwa mvua idondokayo chini;[#Iy. 5:10.]

²⁸ndivyo, mawingu yanavyoichuruzisha, inyeshee watu wengi.

²⁹Je? Yuko anayeyatambua matandazo ya mawingu? Au makao yake, ngurumo zitokamo?[#Sh. 104:3.]

³⁰Tazama! Huutandaza umeme wake, umzunguke, navyo vilindi vya bahari huvifunika.[#Sh. 18:15-16.]

³¹Hivyo ndivyo, anavyoyapatiliza makabila ya watu, tena ndivyo, anavyowapa watu vyakula, viwe vingi mno.

³²Mikono yote miwili huifunika kwa umeme, akauagizia wao, utakaowapiga.

³³Ngurumo zake ndizo zinazoujulisha, akichafuka kwa kumkasirikia amwinukiaye.