Mwisho wa maneno ya Elihu: Utukufu wa Mungu.

¹Kweli moyo wangu nao huyastukia hayo, ukakupuka mahali pake, ulipokuwa.

²Ngurumo za sauti yake zisikilizeni vema, nayo mavumi yanayotoka kinywani mwake![#Sh. 29:3.]

³Huzifungua, zienee po pote chini ya mbingu, nao umeme wake huufikisha nako mapeoni kwa nchi.

⁴Sauti yake hunguruma, ukiisha kuwapo; ndipo, unapoivumisha hiyo sauti yake yenye utukufu; kusudi sauti yake ipate kusikilika, hauzuii umeme.

⁵Mungu akiivumisha sauti yake, inastaajabisha; hufanya makuu, tusiyoweza kuyajua.

⁶Kwani huiambia kungugu: Anguka chini! nayo manyunyu huyafanya kuwa mvua, kisha hizo mvua huzitia nguvu zake, zinyeshe sana.[#Iy. 38:28; Sh. 147:16.]

⁷Hizo huizuia mikono ya watu wote kufanya kazi, wote pia wayajue matendo yake.

⁸Hapo nao nyama huenda kujificha, watulie mapangoni mwao, ndimo, wanamotaka kukaa.[#Sh. 104:22.]

⁹Chamchela hutoka chumbani mwake huko kusini, nako kaskazini hutoka upepo wenye baridi ufukuzao mawingu.

¹⁰Kwa pumzi ya Mungu hutokea barafu, nayo maji yaliyopanuka hugandamana.

¹¹Hata mawingu huyalemeza kwa kuyatia maji mengi, yaanguke chini, tena hutandaza nayo mawingu yenye umeme wake.

¹²Naye huyaongoza, yageuke huko na huko kuzifanya kazi zao, atakazoyaagiza, zitendeke huku chini po pote panapokaa watu;

¹³kama anataka kuipiga nchi yake au kuihurumia, kila mara huyapeleka papo hapo, anapoyatakia kazi.

¹⁴Haya yasikilize, wewe Iyobu, upate kuyatambua vema mastaajabu ya Mungu!

¹⁵Jinsi Mungu anavyoyaagiza, unavijua? au jinsi anavyoumulikisha umeme ulioko mawinguni kwake?[#Iy. 38.]

¹⁶Je? Unayajua mawingu, jinsi yanavyoning'inia? Mastaajabu yake, aliyotimiza kuyajua yote, unayatambua nawe?

¹⁷Nguo zako hazikuwashi joto, wewe mtu, nchi ikitulia kwa jasho litokalo kusini?

¹⁸Je? Unaweza kuzitandaza mbingu kama yeye, ziwe kama kioo cha shaba kwa kushupaa hivyo?

¹⁹Haya! Na utujulishe tutakayomwambia! Sisi hatuwezi kuyatunga kwa kuwa gizani.

²⁰Je? Atapashwa habari ya kwamba: Nataka kusema? Yuko mtu aliyesema, aangamizwe?

²¹Mwanga wa jua, likiwaka mbinguni, watu hawawezi kuutazama, upepo ukiisha kupita na kuyaondoa mawingu, pang'ae tena.

²²Kaskazini hutokea mionzi ya jua imetukayo kama dhahabu, kweli utukufu wake Mungu huogopesha.

²³Sisi hatukumwona Mwenyezi kwa kuwa mkuu mwenye nguvu, hapotoi shauri wala mambo yo yote yaongokayo.[#Iy. 28:12-28.]

²⁴Kwa hiyo inapasa, watu wamwogope, hawatazami watu wo wote wajiwaziao kuwa werevu wa kweli.