¹Ya kuwa unayaweza yote, ninayajua;

²uliyoyataka, hayazuiliki.

³Yuko nani awezaye kuyatowesha mashauri yako? Maana ni mtu asiyejua kitu. Kweli nimesema, nisiyoyatambua, mastaajabu kama hayo yananishinda, siyajui.[#Iy. 38:2; Fano. 28:13; 1 Yoh. 1:9.]

⁴Sikiliza, niseme nami! Nitakuuliza, unijulishe![#Iy. 38:3.]

⁵Kusikia naliyasikia mambo yako kwa masikio yangu, lakini sasa macho yangu yamekuona.

⁶Kwa hiyo nayatangua mwenyewe, niliyoyasema, humu mavumbini na majivuni ninajuta.

Mungu anamkania Iyobu.

⁷Ikawa, Bwana alipokwisha kumwambia Iyobu maneno haya, Bwana akamwambia Elifazi wa Temani: Makali yangu yamekuwakia wewe na wenzako hawa wawili, kwani maneno, mliyoyasema kuwa yangu, hayakunyoka kama yale ya mtumishi wangu Iyobu.

⁸Sasa jichukulieni ng'ombe waume saba na kondoo waume saba, mwende kwa mtumishi wangu Iyobu, mwatoe kuwa ng'ombe za tambiko zenu ninyi, naye mtumishi wangu Iyobu na awaombee; kwani kwa kumpendelea yeye nitaacha kuwafanyizia ninyi yaupasayo ujinga wenu, kwani maneno, mliyoyasema kuwa yangu, hayakunyoka kama yale ya mtumishi wangu Iyobu.[#Ez. 14:14.]

⁹Ndipo, Elifazi wa Temani na Bildadi wa Sua na Sofari wa Nama walipokwenda, wakafanya, kama Bwana alivyowaambia, naye Bwana akampendelea Iyobu.

Mungu anamrudishia Iyobu mali zake.

¹⁰Kisha Bwana akayafungua mafungo ya Iyobu, alipowaombea wenzake; nayo yote, Iyobu aliyokuwa nayo, Bwana akayarudisha na kuyaongeza, akayapata yale ya kale mara mbili.[#Iy. 8:7.]

¹¹Wakaja kwake ndugu zake wote wa kiume na wa kike nao waliojuana naye kale, wakala naye chakula nyumbani mwake, wakampongeza na kumtuliza moyo kwa ajili ya hayo mabaya yote, Bwana aliyokuwa alimletea, wakampa kila mtu kipande cha fedha na pete ya dhahabu.

¹²Hivyo Bwana akambariki Iyobu, mwisho wake utukuke kuliko mwanzo, akapata kondoo na mbuzi 14000 na ngamia 6000 na majozi 1000 ya ng'ombe na majike ya punda 1000.

¹³Akapata tena wana saba wa kiume na watatu wa kike.

¹⁴Hao akawaita majina yao, wa kwanza Yemima (Hua), wa pili Kesia (Marashi), wa tatu Kereni-Hapuki (Pembe ya Wanja).

¹⁵Hawakuonekana wanawake katika nchi yote nzima waliokuwa wazuri kama hao mabinti Iyobu. Naye baba yao akawapa mafungu, yawe yao, kama waumbu zao.[#4 Mose 27:8-11.]

¹⁶Hayo yote yalipokwisha, Iyobu akawapo miaka 140, akaona wana na wajukuu, vizazi vinne.

¹⁷Kisha Iyobu akafa alipokuwa mzee mwenye miaka mingi ya kumtosha.[#1 Mose 25:8.]