Bildadi anasema: Ajutaye huona mema; wasiomcha Mungu huangamia. Bildadi wa Sua akajibu akisema:

¹Kama hayo utayasema hata lini?

²Maneno ya kinywa chako yatavuma hata lini yakiwa kama upepo wa kimbunga?

³Je? Yako maamuzi, Mungu anayoyapotoa? Au yako yanyokayo, Mwenyezi anayoyapotoa?[#Iy. 34:10.]

⁴Kwa kuwa wanao walimkosea, amewatwika maovu yao.[#Iy. 1:18-19.]

⁵Lakini wewe ukimtafuta Mungu mapema na kumlalamikia Mwenyezi,

⁶ukiwa umetakata, ukanyoka, kweli ataamka sasa hivi, aje kwako, alitengemanishe kao lako, wongofu wako ukae humo;[#Sh. 35:23.]

⁷ndipo, mali zako za kwanza zitakapokuwa chache, maana zako za mwisho zitazidi kuwa nyingi mno.[#Iy. 42:10.]

⁸Walio wa kizazi cha kale waulize wao, kajishikize kwa mambo ya baba zao, waliyoyachunguza!

⁹Kwani sisi tu wa jana tu, hatujui neno, kwani siku zetu ni kama kivuli kipitacho katika nchi.[#Sh. 102:12.]

¹⁰Hao sio watakaoweza kukufunza wakikuelezea mambo, wakitoa mioyoni mwao watakayokuambia?

¹¹Je? Pasipokuwa penye unyevu huotesha matete? Pasipokuwa penye maji huchipuza mafunjo?

¹²Siku za kuyakata zitakapotimia, yako majani ya kwanza tu; majani mengine yakiwa mabichi bado, yale yamekwisha kukauka.

¹³Hivyo ndivyo, zilivyo njia zao wale waliomsahau Mungu, ndivyo, kinavyoangamia kingojeo cha mpotovu.[#Iy. 11:20; 18:14; Fano. 10:28.]

¹⁴Kwani egemeo lake litavunjika, nalo kimbilio lake ni tando la buibui.

¹⁵Akijiegemeza penye nyumba yake, haisimani, akiishika kwa nguvu, haikai.

¹⁶Naye akiwa mwenye utomvu mwingi, ijapo jua liwe kali, nayo machipukizi yake yakilieneza shamba lake,

¹⁷mizizi yake ikizinga nazo chungu za mawe, ikijiingiza kwa nguvu zao namo maweni penye nyumba:

¹⁸lakini wakimng'oa mahali pake, alipokuwa, ndipo, hapo pake patakapomkana kwamba: Sijakuona.

¹⁹Tazama! Hii ndiyo furaha, njia yake inayompatia, kisha wataota wengine hapo uvumbini, alipokuwa.

²⁰Utaona, Mungu hamtupi mtu asiyekosa, lakini wafanyao mabaya hawashiki mikono.

²¹Kweli kinywa chako atakijaza vicheko, midomo yako nayo na ishangilie.[#Sh. 126:2.]

²²Lakini watakaoiva nyuso kwa soni ndio wachukivu wako, nayo mahema yao wasiomcha Mungu yatakuwa hayako.