Jibu la pili la Iyobu: Hakuna awezaye kubishana na Mungu.

¹Iyobu akajibu akisema: Najua, hii ni kweli; ndivyo, vilivyo kweli:[#Iy. 25:4.]

²Sisi watu hakuna aliye mwongofu mbele yake Mungu.

³Kama anataka kuulizana na mtu, akimwuliza maneno elfu, moja tu hawezi kumjibu.[#Sh. 19:13.]

⁴Moyo wake ni wenye werevu wa kweli, naye ni mwenye nguvu nyingi, yuko nani aliyejishupaza kushindana naye, akapona?

⁵Aondoa milima na kuiweka pengine, isivijue, makali yake yakiwaka, anaifudikiza.

⁶Anaitetemesha nchi, itoweke mahali pake, nayo mashikizo yake yatikisike sana.

⁷Akiliagiza jua, halichi, nazo nyota anazifunga na kuzitia muhuri.

⁸Yeye peke yake ndiye anayezitanda mbingu, anatembea na kuyakanyaga mawimbi ya bahari.[#Yes. 40:22.]

⁹Yeye ndiye aliyezitengeneza nyota, kama za Gari nazo za Choma, nikuchome, hata za Kilimia, nazo zile za mifanofano iliyoko upande wa kusini.[#Iy. 38:31; Yes. 13:10; Amo. 5:8.]

¹⁰Hufanya mambo makuu yasiyochunguzika, navyo vioja vyake havihesabiki.[#Iy. 5:9.]

¹¹Tazama! Akinikaribia na kujiendea tena, simwoni, wala simtambui, akipita.

¹²Tazama! Yuko nani awezaye kumrudisha nyuma, akipokonya? Yuko nani awezaye kumwuliza: Unafanya nini?

¹³Kwa kuwa Mungu haachi kukasirika, nao wanaosaidiana na nondo wa baharini hawana budi kumwangukia.[#Iy. 26:12.]

¹⁴Sembuse mimi nitawezaje kumjibu lo lote? Mbele yake nitawezaje kuchagua maneno yafaayo?

¹⁵Ingawa niwe sikukosa, nisingemjibu, ila kwa kuwa ni mwamuzi wangu, ningemlalamikia tu.

¹⁶Kama ningemwita, akaniitikia, nisingemtegemea kwamba: Ataisikia sauti yangu.

¹⁷Kwa kunijia na nguvu za chamchela yeye ameniponda, akanitia vidonda vingi zaidi pasipo kosa langu lo lote.

¹⁸Tena haniachi kabisa, nipate kutoa pumzi tu, kwani machungu ndiyo, anayonishibisha.

¹⁹Kama ninatazamia nguvu, nimekwisha kumwona, anavyoshupaa; kama ninatazamia kupiga shauri, yuko nani atakayenishuhudia?[#Iy. 9:33.]

²⁰Ingawa niwe mwenye wongofu, kinywa changu kingeniponza; kingenitokeza kuwa mpotovu, ingawa niwe sikukosa.

²¹Mimi ni mtu asiyekosa. Kuzimia kwa roho yangu nakuwazia kuwa si kitu, huku kuwapo kwangu kunanichukiza.

²²Yote ni mamoja; kwa hiyo nasema: Wasiokosa nao wasiomcha yeye huwaangamiza wote.[#Iy. 8:20; Mbiu. 9:2-3.]

²³Akiwapatia watu mapigo ya kuwaua kwa mara moja, huwasimanga nao wasiokora manza, wakiyeyuka.

²⁴Nchi hii imetiwa mikononi mwao wasiomcha Mungu, naye huzifunika nyuso zao waamuzi wake; kama siye yeye mwenyewe mwingine yuko wapi?

²⁵Nazo siku zangu hupita upesi sana kuliko mpiga mbio, ijapo, hazikuona mema hujikimbilia.

²⁶Zimepita upesi kama mitumbwi ya matete, zinafanana na tai, akiangukia chakula.

²⁷Ikiwa, niseme: Na nivisahau hivi vinavyoniliza, na niache kununa usoni, nichangamke,

²⁸maumivu yangu yote hunistusha, kwani najua: hutanitokeza kabisa kuwa mtu asiyekosa.

²⁹Basi, kwa kuwa mimi nitatokezwa kuwa mtu asiyemcha Mungu, nijichokeshe bure tena, nipate nini?

³⁰Ingawa ningejitawaza kwa maji ya theluji, au ningeinawa mikono yangu kwa sabuni,

³¹hapo napo ungenichovya shimoni mwenye machafu, nguo zangu mwenyewe zinitapishe.

³²Kwani Mungu si mtu kama mimi, nimjibu, tukaja kukutana shaurini kuamuliwa.

³³Kwetu sisi, yeye na mimi, hakuna awezaye kutuamua, akitushika sote wawili kwa mkono wake.

³⁴Na aiondoe fimbo yake, isinipige, vitisho vyake visinistushe!

³⁵Ndipo, nitakaposema pasipo kumwogopa, kwani hivyo sivyo, mimi nionavyo moyoni mwangu.