Kuziomba huruma zake Bwana.

¹Bwana, yakumbuke yaliyotupata!

Tazama, uone, jinsi tunavyotiwa soni!

²Mafungu yetu ya nchi yamechukuliwa, yawe mali za wengine,

nyumba zetu zinakaa wageni.

³Tumegeuka kuwa wana waliofiwa na baba zao,

mama zetu ni kama wajane.

⁴Maji yetu tunayanywa tukiyanunua kwa fedha,

kuni zetu nazo tunazipata tu tukizilipa.

⁵Watukimbizao wako penye shingo zetu;

tunapochoka hatuoni pa kupumzika.

⁶Wamisri na Waasuri tukawanyoshea mikono,

tupate vyakula vya kushiba.

⁷Baba zetu waliokosa hawako tena,

nasi tunatwikwa manza, walizozikora wao.

⁸Watumwa ndio wanaotutawala,

lakini hakuna anayetupokonya mikononi mwao.

⁹Tunaziponza roho zetu tukijichumia vyakula,

kwa kuwa nako nyikani ziko panga.

¹⁰Ngozi zetu ni zenye moto kama wa tanuru

kwa kuteketezwa na njaa.

¹¹Wanawake waliokuwamo Sioni waliwakorofisha,

nao wasichana waliokuwako katika nchi za Yuda.

¹²Wakuu wakanyongwa kwa mikono yao,

nazo nyuso za wazee hazikupewa macheo.

¹³Vijana hutwikwa majiwe ya kusagia,

watoto huvunjwa na mizigo ya kuni.

¹⁴Ndipo, wazee walipoyaacha maongezi ya malangoni,

nao vijana wakayakomesha mazeze yao.

¹⁵Yakakoma yaliyoifurahisha mioyo yetu,

michezo yetu ya ngoma ikageuka kuwa maombolezo.

¹⁶Vilemba vilivyovipamba vichwa vyetu vimekwisha kuanguka chini,

tukapatwa na mabaya, kwa kuwa tumekosa.

¹⁷Kwa hiyo mioyo yetu imezimia,

kwa hiyo macho yetu nayo yameguiwa na giza.

¹⁸Ni kwa ajili ya mlima wa Sioni ulioko peke yake,

kwa kuwa ni mbweha tu wanaotembea huko.

¹⁹Wewe Bwana, unakaa kale na kale,

kiti chako cha kifalme kiko kwa vizazi na vizazi!

²⁰Mbona unatusahau kale na kale,

ukatuacha siku hizi zilizo nyingi?

²¹Bwana, turudishe kwako! Ndivyo, tutakavyopata kurudi;

siku zetu zigeuke kuwa mpya tena kama zile zilizopita!

²²Kweli umetutupa kabisa,

umetukasirikia sanasana.