Ng'ombe za tambiko za kuteketezwa nzima.

¹Bwana akamwita Mose, akasema naye toka Hemani mwa Mkutano kwamba:

²Waambie wana wa Isiraeli na kuwaagiza hivyo: Mtu wa kwenu akitaka kumpelekea Bwana matoleo ya nyama wa kufuga sharti hayo matoleo yenu myatoe katika ng'ombe au katika mbuzi na kondoo.

³Kama toleo lake ni ng'ombe, anayemtoa kuwa ng'ombe ya tambiko ya kuteketezwa nzima, sharti atoe dume asiye na kilema, ampeleke pa kuliingilia Hema la Mkutano, Bwana apate kupendezwa naye.[#3 Mose 17:4.]

⁴Kisha aubandike mkono wake kichwani pake hiyo ng'ombe ya tambiko ya kuteketezwa nzima, impatie upendezo wa kupozwa kwake.[#2 Mose 29:10.]

⁵Kisha amchinje huyo mwana wa ng'ombe mbele ya Bwana, nao wana wa Haroni walio watambikaji na waipeleke damu, nayo hiyo damu wainyunyize pande zote juu ya meza ya kutambikia iliyopo hapo pa kuliingilia Hema la Mkutano.

⁶Kisha aichune hiyo ng'ombe ya tambiko ya kuteketezwa nzima na kuichangua.

⁷Kisha wana wa Haroni walio watambikaji watie moto hapo pa kutambikia na kupanga kuni juu ya moto.

⁸Kisha wana wa Haroni walio watambikaji na wavipange vile vipande vya nyama, hata kichwa na mafuta juu ya kuni zilizopangwa juu ya moto uliowashwa mezani pa kutambikia.

⁹Lakini matumbo na miguu yake na aioshe kwa maji, kisha mtambikaji atayachoma moto yote yaliyowekwa juu ya meza ya kutambikia. Ndivyo, ng'ombe ya tambiko ya kuteketezwa nzima inavyotolewa, iwe moto wenye mnuko wa kumpendeza Bwana.[#1 Mose 8:21.]

¹⁰Kama toleo lake, analolitoa kuwa ng'ombe ya tambiko ya kuteketezwa nzima, ni nyama mdogo kama kondoo au mbuzi sharti apeleke dume asiye na kilema.

¹¹Amchinje mbele ya Bwana kando ya meza ya kutambikia upande wake wa kaskazini, nayo damu yake wana wa Haroni walio watambikaji na wainyunyize pande zote juu ya meza ya kutambikia.

¹²Kisha amchangue, naye mtambikaji avipange vipande vyake pamoja na kichwa chake na mafuta yake juu ya moto uliowashwa mezani pa kutambikia.

¹³Lakini matumbo na miguu na aioshe kwa maji, kisha mtambikaji atayatoa yote kwa kuyachoma moto yote yaliyowekwa juu ya meza ya kutambikia. Ndivyo, naye nyama mdogo anavyokuwa ng'ombe ya tambiko ya kuteketezwa nzima, ndio moto wenye mnuko wa kumpendeza Bwana.

¹⁴Kama toleo lake, analomtolea Bwana kuwa ng'ombe ya tambiko ya kuteketezwa nzima, ni ndege, basi, sharti apeleke hua au kinda la njiwa manga.

¹⁵Naye mtambikaji atampeleka mezani pa kutambikia, atamvunja kichwa chake, apate kumchoma moto mezani pa kutambikia, lakini damu yake sharti idondoke ukutani pake meza ya kutambikia.

¹⁶Kisha akiondoe kibofu chake cha koo pamoja na machafu yaliyomo, akitupe majivuni kando ya meza ya kutambikia upande wa maawioni kwa jua.

¹⁷Kisha ampasue kidogo mabawani, lakini asiyatenge! Kisha mtambikaji amchome moto mezani pa kutambikia juu ya kuni zilizowekwa juu ya moto. Ndivyo, naye ndege anavyokuwa ng'ombe ya tambiko ya kuteketezwa nzima, ndio moto wenye mnuko wa kumpendeza Bwana.