Uchafu wa mwili.

¹Bwana akamwambia Mose na Haroni kwamba:[#4 Mose 5:2.]

²Semeni na wana wa Isiraeli na kuwaambia: Mtu mume ye yote akiwa mwenye kisonono mwilini mwake ni mwenye uchafu kwa ajili ya hicho kisonono chake.

³Nao uchafu, anaoupata kwa kisonono chake, ni wa namna hii: kama mwili wake unachuruzika usaha wa kisonono chake, au kama mwili wake unaukomeshakomesha, uchafu ni uo huo.

⁴Kilalo cho chote, mwenye kisonono atakachokilalia, ni chenye uchafu.

⁵Naye mtu atakayekigusa kilalo chake sharti azifue nguo zake pamoja na koga majini, kisha atakuwa mwenye uchafu mpaka jioni.

⁶Naye atakayekalia kitu, mwenye kisonono alichokikalia, sharti azifue nguo zake pamoja na koga majini, kisha atakuwa mwenye uchafu mpaka jioni.

⁷Naye atakayeugusa mwili wake mwenye kisonono sharti azifue nguo zake pamoja na koga majini, kisha atakuwa mwenye uchafu mpaka jioni.

⁸Naye mwenye kisonono akitemea mate mwenye kutakata, huyo sharti azifue nguo zake pamoja na koga majini, kisha atakuwa mwenye uchafu mpaka jioni.

⁹Nayo matandiko yo yote, mwenye kisonono atakayoyakalia akipanda, yatakuwa yenye uchafu.

¹⁰Naye kila atakayegusa cho chote kilichokuwa chini yake atakuwa mwenye uchafu mpaka jioni, naye atakayevichukua vilivyo hivyo sharti azifue nguo zake pamoja na koga majini, kisha atakuwa mwenye uchafu mpaka jioni.

¹¹Naye kila mtu, mwenye kisonono atakayemgusa pasipo kunawa kwanza mikono yake kwa maji, sharti azifue nguo zake pamoja na koga majini, kisha atakuwa mwenye uchafu mpaka jioni.

¹²Nacho chombo cha udongo, mwenye kisonono atakachokigusa, sharti kivunjwe, nacho kila chombo cha mti sharti kioshwe majini.[#3 Mose 11:33.]

¹³Lakini mwenye kisonono akipata kutakata, kwa kuwa kisonono chake kimekoma, sharti ahesabu siku saba kuanzia hapo, alipopata kutakata, kisha sharti azifue nguo zake pamoja na koga katika maji ya mtoni; ndipo, atakapokuwa mwenye kutakata.

¹⁴Siku ya nane na achukue hua wawili au makinda mawili ya njiwa manga, amtokee Bwana hapo pa kuliingilia Hema la Mkutano, ndipo ampe mtambikaji wale ndege.[#3 Mose 5:7.]

¹⁵Naye mtambikaji na awatengeneze, mmoja kuwa ng'ombe ya tambiko ya weuo, wa pili kuwa ng'ombe ya tambiko ya kuteketezwa nzima. Ndivyo, mtambikaji atakavyompatia upozi mbele ya Bwana kwa ajili ya kisonono chake.

¹⁶Lakini mtu akitokwa na mbegu akilala sharti auogeshe mwili wake wote mzima majini, kisha atakuwa mwenye uchafu mpaka jioni.[#3 Mose 22:4.]

¹⁷Nazo nguo zote na ngozi zote zilizonyewa na hizo mbegu sharti zifuliwe majini, nazo zitakuwa zenye uchafu mpaka jioni.

¹⁸Tena mtu aliye hivyo akilala na mwanamke, sharti wote wawili na waoge majini, kisha watakuwa wenye uchafu mpaka jioni.

¹⁹Mwanamke akiingia miezini, atokwe na damu mwilini mwake, sharti atengwe siku saba, naye kila atakayemgusa atakuwa mwenye uchafu mpaka jioni.[#3 Mose 18:19.]

²⁰Nayo yote, atakayoyalalia siku hizo za kutengwa kwake, yatakuwa yenye uchafu; nayo yote, atakayoyakalia, yatakuwa yenye uchafu.

²¹Naye kila atakayekigusa kilalo chake sharti azifue nguo zake pamoja na koga majini, kisha atakuwa mwenye uchafu mpaka jioni.

²²Naye kila atakayegusa cho chote, alichokikalia, sharti azifue nguo zake pamoja na koga majini, kisha atakuwa mwenye uchafu mpaka jioni.

²³Naye atakayegusa cho chote kilichoko juu ya kilalo chake au juu ya kitu, alichokikalia, atakuwa mwenye uchafu mpaka jioni.

²⁴Tena mtu akilala naye, akiwa miezini, atakuwa mwenye uchafu siku saba, hata kilalo chake, atakachokilalia, kitakuwa chenye uchafu.

²⁵Mwanamke akitoka damu zake siku nyingi zisizo zake za kuwa miezini, au kama anatoka damu kuzipita hizo siku za kuwa miezini, basi siku zote za kutoka damu ni mwenye uchafu; kama alivyo akiwa miezini, ndivyo, mwenye uchafu alivyo siku hizo nazo.

²⁶Kilalo cho chote, atakachokilalia siku zote za kutoka damu zake, ni chenye uchafu, kama kilalo chake cha kuwa miezini kilivyo chenye uchafu; nacho kitu cho chote, atakachokikalia, ni chenye uchafu, kama kilivyo chenye uchafu siku zake za kuwa miezini.

²⁷Naye kila atakayevigusa atakuwa mwenye uchafu, sharti azifue nguo zake pamoja na koga majini, kisha atakuwa mwenye uchafu mpaka jioni.

²⁸Lakini akipata kutakata, kwa kuwa damu yake imekoma, sharti ahesabu siku saba, halafu atakuwa ametakata.

²⁹Siku ya nane na achukue hua wawili au makinda mawili ya njiwa manga, awapeleke kwa mtambikaji penye kuliingilia Hema la Mkutano.[#3 Mose 15:14.]

³⁰Naye mtambikaji na atengeneze mmoja kuwa ng'ombe ya tambiko ya weuo, wa pili kuwa ng'ombe ya tambiko ya kuteketezwa nzima. Ndivyo, mtambikaji atakavyompatia upozi mbele ya Bwana kwa ajili ya uchafu wake, damu zake ziliomtia.

³¹Hivi ndivyo, mtakavyowatengesha wana wa Isiraeli na uchafu wao, wasife kwa ajili ya uchafu wao wakilichafua Kao langu lililoko katikati yao.

³²Haya ndiyo maonyo ya kufundisha mambo ya mwenye kisonono nayo yake anayejipatia uchafu kwa kutokwa na mbegu akilala;

³³tena ya mwanamke akiingia miezini, nayo ya kila mwenye kisonono, kama ni mtu mume, au kama ni mtu mke, nayo ya mtu anayelala na mwanamke aliye mwenye uchafu.