Kufa kwa Yohana.

¹Siku zile mfalme Herode alipousikia uvumi wa Yesu,

²akawaambia watoto wake: Huyo ndiye Yohana Mbatizaji, amefufuka katika wafu, kwa sababu hii nguvu hizo humtendesha kazi.

³Kwani Herode alikuwa amemkamata Yohana, akamfunga, akamtia kifungoni kwa ajili ya Herodia, mke wa nduguye, Filipo.[#Mat. 11:2.]

⁴Kwani Yohana alimwambia: Ni mwiko kwako kuwa naye.[#3 Mose 18:16.]

⁵Naye alitaka kumwua, lakini aliwaogopa watu, kwani walimwona Yohana kuwa mfumbuaji.[#Mat. 21:26.]

⁶Ilipofika sikukuu ya kuzaliwa kwake Herode, binti Herodia akacheza ngoma mbele yao, akampendeza Herode.

⁷Ndipo, alipomwapia kumpa cho chote, atakachomwomba.

⁸Naye kwa hivyo, alivyokwisha kuhimizwa na mama yake, akasema: Nipe sasa hivi katika chano kichwa chake Yohana Mbatizaji!

⁹Mfalme akasikitika, lakini kwa ajili ya viapo vyake na kwa ajili ya wale waliokaa naye chakulani akaagiza, apewe.

¹⁰Akatuma mtu, akamkata Yohana kichwa kifungoni.

¹¹Kisha hicho kichwa chake kikaletwa katika chano, msichana akapewa, akampelekea mama yake.

¹²Kisha wanafunzi wake wakaja, wakautwaa mwili wake, wakauzika; kisha wakaenda, wakampasha Yesu habari.

Watu 5000 wanalishwa.

¹³Yesu alipoyasikia akaingia chomboni, akaondoka huko kwenda peke yake mahali palipokuwa pasipo watu.

¹⁴Nayo makundi ya watu walipovisikia wakamfuata kwa miguu toka mijini. Yesu alipotoka chomboni akaona, watu ni wengi sana, akawaonea uchungu, akawaponya waliokuwa hawawezi.[#Mat. 9:36.]

¹⁵Ilipokuwa jioni, wanafunzi wake wakamjia, wakasema: Hapa tulipo ni nyika, nazo saa za mchana zimepita; basi, waage hawa watu wengi, waende zao vijijini, wajinunulie vyakula!

¹⁶Yesu akawaambia: Waendeje? Wapeni ninyi vyakula!

¹⁷Nao wakamwambia: Hatuna kitu hapa ila mikate mitano na visamaki viwili.

¹⁸Naye akasema: Nileteeni hapa!

¹⁹Akawaagiza hao watu wengi, wakae chini majanini. Akaitwaa ile mikate mitano na vile visamaki viwili, akatazama juu mbinguni akaviombea, akawamegea, akawapa wanafunzi ile mikate; nao wanafunzi wakawapa wale watu wengi.

²⁰Wakala wote, wakashiba. Kisha wakayaokota makombo ya mikate yaliyosalia, wakajaza vikapu kumi na viwili.[#2 Fal. 4:44.]

²¹Nao waliokula walikuwa waume tu kama 5000 pasipo wanawake na watoto.

Kwenda juu ya bahari.

²²Kisha Yesu akawashurutisha wanafunzi waingie chomboni, wamtangulie kwenda ng'ambo, mpaka yeye kwanza awaage makundi ya watu.

²³Naye alipokwisha kuwaaga makundi ya watu akapanda mlimani peke yake kuomba. Jua lilipokwisha kuchwa, akawa huko peke yake.[#Luk. 6:12; 9:18.]

²⁴Nacho chombo kilikuwa kimeendelea kitambo kirefu kikahangaishwa na mawimbi, kwani upepo uliwatokea mbele.

²⁵Ilipofika zamu ya nne ya usiku, akawajia akienda juu ya bahari.

²⁶Wanafunzi walipomwona, anavyokwenda juu ya bahari, wakatetemeka wakisema: ni mzimu! wakalia kwa woga.[#Luk. 24:37.]

²⁷Papo hapo Yesu akawaambia akisema: Tulieni! Ni miye, msiogope!

²⁸Petero akamjibu akisema: Bwana, ukiwa ni wewe, agiza nije kwako majini juujuu!

²⁹Alipomwambia: Njoo! Petero akashuka chomboni, akaenda juu ya maji, amfikie Yesu.

³⁰Lakini alipotazama, upepo ulivyo na nguvu, akaogopa, akaanza kuzama majini, akapiga kelele akisema: Bwana, niokoa!

³¹Mara Yesu akaunyosha mkono, akamshika, akamwambia: Mbona unanitegemea kidogo tu? Mbona umeingiwa na wasiwasi?[#Mat. 8:26.]

³²Walipopanda chomboni, upepo ukakoma.

³³Nao waliokuwamo chomboni wakamwangukia wakisema: Kweli ndiwe Mwana wa Mungu!

³⁴Walipokwisha vuka wakafika nchini kwa Genesareti.

³⁵Wenyeji wa huko walipomtambua wakatuma watu kwenda katika nchi zote za pembenipembeni, wakamletea wote waliokuwa hawawezi.

³⁶Wakambembeleza, wamguse pindo la kanzu yake tu; nao wote walioligusa wakapona kabisa.[#Mat. 9:21; Luk. 6:19.]