Kujaribiwa.

¹Kisha Yesu akapelekwa na Roho nyikani, ajaribiwe na Msengenyaji.[#Ebr. 4:15.]

²Akafunga siku 40 mchana na usiku, kisha akaona njaa.[#2 Mose 34:28; 1 Fal. 19:8.]

³Mjaribu akamjia, akamwambia: Kama ndiwe Mwana wa Mungu, yaambie mawe haya, yawe chakula![#1 Mose 3:1-7.]

⁴Naye akamjibu: Imeandikwa:

Mtu hataishi kwa chakula tu,

ila kwa kila neno linalotoka kinywani mwa Mungu.

⁵Kisha Msengenyaji akampeleka katika mji mtakatifu, akamsimamisha juu pembeni hapo Patakatifu,[#Mat. 27:53.]

⁶akamwambia: Kama ndiwe Mwana wa Mungu, jitupe chini! Kwani imeandikwa:

Atakuagizia malaika zake, nao wakakuchukua mikononi mwao

usije kujikwaa mguu wako katika jiwe.

⁷Yesu akamwambia: Tena imeandikwa:

Usimjaribu Bwana Mungu wako!

⁸Kisha Msengenyaji akampeleka, akampandisha mlima mrefu sana, akamwonyesha ufalme wote pia wa ulimwengu huu na utukufu wake,[#Yoh. 18:36.]

⁹akamwambia: Haya yote nitakupa, ukiniangukia na kuninyenyekea.[#Mat. 16:26.]

¹⁰Hapo Yesu akamwambia: Nenda zako, Satani! Kwani imeandikwa:

Umwangukie Bwana Mungu wako na kumtumikia peke yake!

¹¹Ndipo, Msengenyaji alipomwacha. Mara malaika wakaja, wakamtumikia.*[#Yoh. 1:51; Ebr. 1:6,14.]

Yesu anakaa Kapernaumu.

¹²Yesu aliposikia, ya kwamba Yohana amefungwa, akaondoka akaenda mpaka Galilea.[#Mat. 14:3.]

¹³Akahama Nasareti, akaenda kukaa Kapernaumu ulioko pwani mipakani kwa Zebuluni na Nafutali,

¹⁴kusudi neno, mfumbuaji Yesaya alilolisema, lipate kutimizwa:[#Yes. 9:1-2.]

¹⁵Nchi ya Zebuluni na nchi ya Nafutali zilizoko upande

wa pwani na ng'ambo ya Yordani, Galilea ya wamizimu

iliko,

¹⁶huko watu waliokaa gizani wameona mwanga mkuu,

waliokaa penye kivuli kuacho mwanga umemulika juu yao.

¹⁷Tangu hapo ndipo, Yesu alipoanzia kupiga mbiu akisema: Juteni! Kwani ufalme wa mbingu umekaribia.[#Mat. 3:2; Rom. 12:2.]

Wanafunzi wa kwanza.

¹⁸Basi, Yesu alipokuwa akitembea kandokando ya bahari ya Galilea akaona watu wawili waliokuwa ndugu, ni Simoni aitwaye Petero na nduguye, Anderea. Aliwaona, wakitupa nyavu zao baharini, kwani walikuwa wavuvi.[#Yoh. 1:40.]

¹⁹Akawaambia: Njoni, mnifuate! Nami nitawafanya kuwa wavua watu.[#Mat. 13:47; 28:19-20; Ez. 47:10.]

²⁰Papo hapo wakaziacha nyavu, wakamfuata.[#Mat. 19:27.]

²¹Alipoendelea mbele, akaona wengine wawili walikuwa ndugu, ni Yakobo wa Zebedeo na nduguye, Yohana. Aliwaona pamoja na baba yao Zebedeo chomboni, wakizitengeneza nyavu zao, akawaita.

²²Papo hapo wakakiacha chombo na baba yao, wakamfuata.

Yesu katika Galilea

²³Yesu akazunguka katika nchi yote ya Galilea, akawafundisha katika nyumba zao za kuombea, akautangaza Utume mwema wa ufalme na kuwaponya watu wote waliokuwa wagonjwa na wanyonge.[#Mar. 1:39; Luk. 4:15,44; Tume. 10:38.]

²⁴Uvumi wake ukaienea nchi yote ya Ushami. Wakampelekea wote walikuwa hawawezi, walioshikwa na magonjwa na maumivu yo yote, nao wote waliokuwa wenye pepo na wenye kifafa na wenye kupooza, naye akawaponya.[#Mar. 6:55.]

²⁵Wakamfuata makundi mengi ya watu waliotoka Galilea na upande wa ile Miji Kumi na Yerusalemu na Yudea na ng'ambo ya Yordani.[#Mar. 3:7-8; Luk. 6:17-19.]