Matangazo ya mlimani.

¹*Alipoyaona hayo makundi ya watu akapanda mlimani, akakaa, nao wanafunzi wake wakamkaribia.

²Ndipo, alipokifumbua kinywa chake, akawafundisha akisema:

³Wenye shangwe ndio walio maskini rohoni mwao, maana hao ufalme wa mbingu ni wao.[#Yes. 57:15; Yak. 2:5.]

⁴Wenye shangwe ndio wanaosikitika, maana hao watatulizwa.[#Sh. 126:5; Yes. 61:2; Ufu. 7:17.; #Mat. 5:39-41; 11:29.]

⁵Wenye shangwe ndio wapole, maana hao watairithi nchi.[#Sh. 37:11; Luk. 18:9-14.]

⁶Wenye shangwe ndio wenye njaa na kiu ya kupata wongofu, maana hao watashibishwa.[#Yes. 58:7-8.]

⁷Wenye shangwe ndio wenye huruma, maana hao watahurumiwa.[#Yak. 2:13.]

⁸Wenye shangwe ndio waliotakata mioyoni mwao, maana hao watamwona Mungu.[#Sh. 24:4; 51:12; 73:1; 1 Yoh. 3:2-3.]

⁹Wenye shangwe ndio wapatanishi, maana hao wataitwa wana wa Mungu.[#Ebr. 12:14; Yak. 3:18.]

¹⁰Wenye shangwe ndio wanaofukuzwa kwa ajili ya wongofu wao, maana hao ufalme wa mbingu ni wao.[#Yoh. 15:18; 1 Petr. 3:18.]

¹¹Nanyi mtakuwa wenye shangwe, watu watakapowatukana na kuwafukuza na kuwasingizia maneno mabaya yo yote yaliyo ya uwongo kwa ajili yangu mimi.[#1 Petr. 3:14.]

¹²Furahini na kushangilia! Kwani mshahara wenu ni mwingi mbinguni. Kwani ndivyo, walivyowafukuza wafumbuaji waliowatangulia.*[#Tume. 5:40-41; Ebr. 11:33-38; Yak. 5:10.]

Chumvi na mwanga.

¹³*Ninyi m chumvi ya nchi. Lakini chumvi ikiwa imepotewa na ukolezi, itatiwa kitu gani, ipate kukolea tena? Hakuna kitu tena, ilichokifalia, itatupwa tu nje, ikanyagwe na watu.[#Mar. 9:49-50; Luk. 14:34-35; Kol. 4:6.]

¹⁴Ninyi m mwanga wa ulimwengu. Mji ukiwa juu ya mlima haufichiki.[#Yoh. 8:12.]

¹⁵Nao watu wakiwasha taa hawaiweki chini ya kapu, ila huiweka juu ya mwango; ndivyo inavyowaangazia wote waliomo nyumbani.[#Mar. 4:21; Luk. 8:16.]

¹⁶Vivyo mwanga wenu uangaze mbele ya watu, wapate kuyaona matendo yenu mema, wamtukuze Baba yenu alioko mbinguni.*[#Ef. 5:8-9; 1 Petr. 2:12.]

Maonyo na Wafumbuaji.

¹⁷Msiniwazie, ya kuwa nimejia kuyatangua Maonyo au maneno ya Wafumbuaji. Sikujia kutangua, nimejia kutimiza.[#Mat. 3:15; Rom. 3:31; 10:4; 13:10.]

¹⁸Kweli nawaambiani: Mpaka hapo, mbingu na nchi zitakapokoma, hata kiandiko kimoja au kichoro kimoja kilichomo katika Maonyo hakitakoma, isipokuwa yametimizwa yote.[#Luk. 16:17; 21:33.]

¹⁹Mtu akiondoa moja tu katika maagizo hayo, ijapo liwe dogo, na kufundisha watu hivyo, huyo ataitwa mdogo kuliko wote katika ufalme wa mbingu; lakini mtu akiyafanya maagizo hayo na kufundisha watu hivyo, huyo ataitwa mkubwa katika ufalme wa mbingu.[#Mat. 22:27-40; Yak. 2:10.]

²⁰Kwani nawaambiani: *Wongofu wenu usipoupita wongofu wao waandishi na Mafariseo, hamtaingia kabisa katika ufalme wa mbingu.[#Mat. 6:1-7; Mar. 7:3-4.]

Usiue!

²¹Mmesikia, ya kuwa watu wa kale waliambiwa: Usiue! Mtu akiua, itampasa, ahukumiwe.[#2 Mose 20:13; 21:12; 3 Mose 24:17; 5 Mose 17:8.]

²²Lakini mimi nawaambiani: Kila anayemwonea ndugu yake chuki, itampasa, ahukumiwe. Naye atakayemwambia ndugu yake: Mshenzi wee! itampasa, ahukumiwe na baraza ya wakuu wote. Lakini atakayemtukana ndugu yake, itampasa, atupwe shimoni mwa moto.[#1 Yoh. 3:15.]

²³Ukipeleka kipaji chako mezani pa Bwana, ukakumbuka hapo, ya kuwa ndugu yako ana mfundo moyoni kwa ajili yako,[#Mar. 11:25.]

²⁴basi, kwanza kiache kipaji chako mbele ya meza ya Bwana! Uende kwanza, upatane na ndugu yako! Kisha urudi, ukitoe kipaji chako!

²⁵Umwitikie mshtaki wako upesi ukiwa naye, mngaliko njiani! Maana mshtaki wako asikupeleke kwa mwenye hukumu, naye mwenye hukumu asikutie mkononi mwa askari, ukatiwa kifungoni.[#Mat. 6:14-15; 18:35; Luk. 12:58-59.]

²⁶Kweli nakuambia: Hutatoka humo kabisa, mpaka utakapomaliza kulipa, isisalie hata senti moja*[#Mat. 18:34.]

Usizini!

²⁷Mmesikia ya kuwa ilisemwa: Usizini![#Mat. 19:3-9; 2 Mose 20:14.]

²⁸Lakini mimi nawaambiani: Kila mtu anayetazama mwanamke kwa kumtamani, basi, huyo amekwisha zini naye moyoni mwake.[#2 Sam. 1; Iy. 31:1; 2 Petr. 2:14.]

²⁹Nawe kama jicho lako la kuume linakukwaza, ling'oe, ulitupe mbali! kwani itakufaa, kiungo kimoja tu kiangamie, kuliko mwili wako mzima ukitupwa shimoni mwa moto.[#Mat. 18:8; Mar. 9:43,47; Kol. 3:5.]

³⁰Nawe kama mkono wako wa kuume unakukwaza, uukate, uutupe mbali! Kwani itakufaa, kiungo kimoja tu kiangamie, kuliko mwili wako mzima ukijiendea shimoni mwa moto.

³¹Tena ilisemwa: Mtu akimwacha mkewe ampe cheti cha kuachana.[#Mat. 19:3-9; 5 Mose 24:1.]

³²Lakini mimi nawaambiani: kila mtu anayemwacha mkewe, isipokuwa kwa ajili ya ugoni, huyo anamzinisha. Naye atakayeoa mke aliyeachwa anazini.[#Luk. 16:18; 1 Kor. 7:10-11.]

Usiape!

³³Tena mmesikia, ya kuwa watu wa kale waliambiwa: Usiape kiapo cha uwongo, lakini umtimizie Mungu, uliyomwapia![#2 Mose 20:7; 3 Mose 19:12; 4 Mose 30:3.]

³⁴Lakini mimi nawaambiani: Usiape na kutaja yoyote, wala mbingu, kwani ndicho kiti cha kifalme cha Mungu;[#Mat. 23:16-22; Yes. 66:1; Tume. 7:49.]

³⁵Wala nchi, kwani ndipo pa kuiwekea miguu yake; wala Yerusalemu, kwani ndio mji wa mfalme aliye mkuu;[#Sh. 48:3.]

³⁶wala kichwa chako, kwani hata unywele mmoja tu huwezi kuugeuza uwe mweupe au mweusi.

³⁷Mkisema: Ndio, iwe ndio kweli! Au mkisema: Sio, iwe sio kweli! Lakini yanayoyapita hayo hutoka kwa Mbaya.[#2 Kor. 1:17; Yak. 5:12.]

Kuwapenda adui.

³⁸Mmesikia, ya kuwa ilisemwa: Jicho kwa jicho, jino kwa jino![#3 Mose 24:19-20.]

³⁹Lakini mimi nawaambiani: Msibishane na mbaya! Lakini mtu akikupiga kofi shavu la kuume, mgeuzie la pili, alipige nalo![#3 Mose 19:18; Rom. 12:21; 1 Petr. 2:20.]

⁴⁰Mtu akitaka kushtakiana na wewe, apate kuichukua shuka yako, basi, umwachie na kanzu![#1 Kor. 6:7; Ebr. 10:34.]

⁴¹Naye atakayekushurutiza kwenda naye nusu saa, basi, nenda naye saa nzima!

⁴²Anayekuomba umpe, naye anayetaka kukopa kwako usimgeukie mgongo!

⁴³Mmesikie, ya kuwa ilisemwa: Umpende mwenzio, naye adui yako umchukie![#3 Mose 19:18.]

⁴⁴Lakini mimi nawaambiani: Wapendeni adui zenu! Wabarikini wanaowaapiza! Wafanyieni mazuri wanaowachukia! Waombeeni wanaowachokoza na kuwafukuza![#2 Mose 23:4-5; Rom. 12:14,20; Luk. 6:27-28; 23:34; Tume. 7:60.]

⁴⁵Fanyeni hivi, mpate kuwa wana wa Baba yenu alioko mbinguni! Kwani yeye huwacheshea jua lake wabaya na wema, tena huwanyeshea mvua waongofu nao wapotovu.[#Ef. 5:1.]

⁴⁶Kwani mkiwapenda wanaowapendani mtapata mshahara gani? Je? Hata watoza kodi hawafanyi hivyo hivyo?

⁴⁷Tena mkiwaamkia ndugu zenu tu mnawapitaje wengine? Je? Hata wamizimu hawafanyi vivyo hivyo?

⁴⁸Basi, ninyi mwe watimilifu, kama Baba yenu wa mbinguni alivyo mtimilifu![#3 Mose 19:2; 5 Mose 18:13; Ef. 5:1-2.]