Kutoa vipaji.

¹Angalieni, msigawie watu vipaji vyenu machoni pa watu, kwamba wawaone! Msipojiangalia hivyo, hamna mshahara kwa Baba yenu alioko mbinguni.

²Basi, ukimgawia mtu usipigishe baragumu mbele yako kama wanavyofanya wajanja katika nyumba za kuombea na katika njia za mijini, wapate kutukuzwa na watu. Kweli nawaambiani: wamekwisha upata mshahara wao.[#1 Kor. 13:3.]

³Lakini wewe ukimgawia mtu, mkono wako wa kushoto usitambue, wa kuume unayoyafanya,[#Mat. 25:37-40; Rom. 12:8.]

⁴huko kugawa kwako kuwe kumejificha! Ndipo, Baba yako anayeyaona hata yanayojificha atakapokulipa waziwazi.

Kuomba.

⁵Tena mnapomwomba Mungu msiwe kama wajanja! Kwani wanapenda kuomba wakisimama katika nyumba za kuombea na pembeni pa njia za mijini, watu wapate kuwaona. Kweli nawaambiani: wamekwisha upata mshahara wao.[#Mat. 23:5.]

⁶Lakini wewe unapoomba uingie mwako chumba cha ndani na kuufunga mlango wako! Kisha umwombe Baba yako alioko fichoni! Ndipo, Baba yako anayeyaona hata yanayojificha atakapokulipa waziwazi.[#2 Fal. 4:33; Yes. 26:20.]

⁷Tena mnapoomba msijisemee maneno tu kama wamizimu! Kwani hudhani, ya kuwa maneno yao mengi yatawapatia kusikilizwa.[#Yes. 1:15.]

⁸Msifanane nao! Kwani Baba yenu anayajua yanayowapasa, mnapokuwa hamjamwomba.[#Mat. 6:32.]

⁹Ninyi mnapoomba mwombe hivi: Baba yetu ulioko mbinguni, Jina lako litakaswe![#Luk. 11:2-4.]

¹⁰Ufalme wako uje! Uyatakayo yatimizwe nchini, kama yanavyotimizwa mbinguni![#Mat. 7:21; Luk. 22:42.]

¹¹Tupe leo chakula chetu cha kututunza!

¹²Tuondolee makosa yetu, kama nasi tulivyowaondolea waliotukosea![#Mat. 6:14-15; 18:21-35.]

¹³Usituingize majaribuni! Ila tuokoe maovuni! Kwani wako ni ufalme na nguvu na utukufu kale na kale. Amin.[#1 Mambo 29:11-13; Luk. 22:32; Yoh. 17:15; 1 Kor. 10:13.]

¹⁴Kwani ninyi mnapowaondolea watu makosa yao, Baba yenu wa mbinguni atawandolea ninyi vilevile.[#Mat. 18:21-35.]

¹⁵Lakini ninyi msipowaondolea watu makosa yao, hata Baba yenu hatawaondolea ninyi makosa yenu.[#Mar. 11:25-26.]

Kufunga.

¹⁶Tena mnapofunga msikunjamane nyuso kama wajanja! Kwani huzirembua nyuso, kusudi watu wawaone, wanavyofunga. Kweli nawaambiani: Wamekwisha upata mshahara wao.[#Yes. 58:5-9.]

¹⁷Lakini wewe unapofunga jipake kichwa chako mafuta, unawe nao uso wako,

¹⁸kusudi watu wasikuone, ya kama unafunga, ila akuone Baba yako alioko fichoni. Ndipo, Baba yako anayeyaona yanayojificha atakapokulipa.

Kuweka mali.

¹⁹Msijilimbikie malimbiko nchini, mende na kutu zinapoyaharibu! Nao wezi huyafukua na kwiba.

²⁰Lakini jilimbikieni malimbiko mbinguni, yasikoharibiwa na mende wala na kutu, wala wezi wasikoyafukua na kwiba![#Mat. 19:21; Luk. 12:20,33-34; Kol. 3:1-2; Ebr. 10:34.]

²¹Kwani limbiko lako liliko, ndiko, nao moyo wako utakakokuwa.

Taa ya mwili.

²²Taa ya mwili ni jicho. Basi jicho lako liking'aa, mwili wako wote utakuwa na mwanga.[#Luk. 11:34-36.]

²³Lakini jicho lako likiwa bovu, mwili wako wote utakuwa na giza. Basi, mwanga uliomo ndani yako unapokuwa giza, giza yenyewe itakuwaje?

Kujihangaisha

²⁴*Hakuna mtu anayeweza kutumikia mabwana wawili. Kwani itakuwa hivi: atamchukia wa kwanza na kumpenda wa pili, au atashikamana naye wa kwanza na kumbeza wa pili. Hamwezi kuwatumikia wote wawili, Mungu na Mali za Nchini (Mamona).[#Luk. 16:9,14.]

²⁵Kwa hiyo nawaambiani: Msiyasumbukie maisha yenu mkisema: Tutakula nini? Tutakunywa nini? Wala msiisumbukie miili yenu mkisema: Tutavaa nini? Je? Maisha hayapiti vyakula? Nao mwili haupiti mavazi?[#Fil. 4:6; 1 Tim. 6:6; Ebr. 13:5; 1 Petr. 5:7.]

²⁶Watazameni ndege wa angani! Hawapandi, wala hawavuni, wala hawakusanyi waweke vichanjani. Naye Baba yenu wa mbinguni anawalisha nao. Je? Nyinyi hamwapiti hao?[#Mat. 10:29-31.]

²⁷Tena kwenu yuko nani anayeweza kwa kusumbuka kwake kujiongezea miaka yake kipande kama cha mkono mmoja tu?

²⁸Tena yale mavazi, mbona mnayasumbukia? Jifundisheni mnapoyatazama maua ya uwago yaliyoko porini kama yanavyokua! Hayafanyi kazi, wala hayafumi nguo.

²⁹Lakini nawaambiani: Hata Salomo katika utukufu wake wote hakuvikwa kama moja lao.[#1 Fal. 10.]

³⁰Basi Mungu akiyavika hivyo majani ya porini yanayokaa leo tu, kesho yatupwe katika mabiwi, yateketee, Je? Hatazidi kuwavika ninyi? Mbona mna mtegemea kidogo tu?

³¹Basi msisumbuke mkisema: Tutakula nini? au: Tutakunywa nini? au: Tutavaa nini?

³²Kwani wamizimu ndio wanaoyatafuta hayo yote; lakini Baba yenu wa mbinguni amewajua, ya kuwa mnapaswa nayo hayo yote.

³³Utafuteni kwanza ufalme wa Mungu na wongofu wake! Ndivyo, mtakavyopewa hayo yote.[#Rom. 14:17; 1 Fal. 3:13-14; Sh. 37:4,25.]

³⁴Basi, msisumbukie ya kesho! Kwani siku ya kesho itayasumbukia yaliyo yake. Inatosha, kila siku iwe na uovu wake.[#Mat. 6:11; 2 Mose 16:19.]