Yohana Mbatizaji.

¹Utume mwema wa Yesu Kristo, Mwana wa Mungu, ulianza,[#Mal. 3:1; Mat. 11:10.]

²kama ulivyoandikwa na mfumbuaji Yesaya:

Utaniona mimi, nikimtuma mjumbe wangu,

akutangulie, aitengeneze njia yako.

³Iko sauti ya mtu apigaye mbiu nyikani:

Itengenezeni njia ya Bwana! Yanyosheni mapito yake!

⁴Yohana Mbatizaji alikuwa nyikani akibatiza na kutangaza ubatizo wa kujutisha, wapate kuondolewa makosa.

⁵Wakamtokea wote wa Yudea na wenyeji wote wa Yerusalemu, wakabatizwa naye katika mto wa Yordani wakiyaungama makosa yao.

⁶Naye Yohana alikuwa amevaa nguo ya manyoya ya ngamia na mkanda wa ngozi kiunoni pake, akala nzige na asali ya mwituni.

⁷Akatangaza akisema: Nyuma yangu anakuja aliye na nguvu kunipita mimi, nami sifai kuinama, nimfungulie kanda za viatu vyake.

⁸Mimi nimewabatiza kwa maji, lakini yeye atawabatiza kwa Roho takatifu.

Kubatizwa kwa Yesu.

⁹Ikawa siku zile, Yesu akaja toka Nasareti wa Galilea, akabatizwa na Yohana mle Yordani.[#Luk. 2:51.]

¹⁰Papo hapo alipotoka majini akaona, mbingu zikipasuka, akamwona Roho, anavyomshukia kama njiwa.

¹¹Sauti ikatoka mbinguni: Wewe ndiwe mwanangu mpendwa, nimependezwa na wewe.[#Mar. 9:7.]

Kujaribiwa.

¹²Papo hapo Roho akamchukua, akampeleka nyikani.[#Sh. 91:13; Yoh. 1:51.]

¹³Akawa huko nyikani siku 40 akijaribiwa na Satani, tena wenzake walikuwa nyama wa porini. Kisha malaika wakamtumikia.

Ufalme wa Mungu.

¹⁴Yohana alipokwisha fungwa, Yesu akaja Galilea, akautangaza Utume mwema wa Mungu,

¹⁵akasema: Siku zimetimia, nao ufalme wa Mungu umekaribia. Juteni, mwutegemee Utume mwema![#Gal. 4:4.]

Wanafunzi wa kwanza.

¹⁶Naye alipokuwa akitembea kandokando ya bahari ya Galilea, akamwona Simoni na Anderea, nduguye Simoni, wakitupa nyavu zao baharini, kwani walikuwa wavuvi.

¹⁷Yesu akawaambia: Njoni, mnifuate! Nami nitawafanya kuwa wavua watu.[#Mat. 13:47.]

¹⁸Papo hapo wakaziacha nyavu, wakamfuata.

¹⁹Alipoendelea mbele kidogo, akamwona Yakobo, mwana wa Zebedeo, na Yohana nduguye; nao walikuwa chomboni wakizitengeneza nyavu.

²⁰Mara akawaita, nao wakamwacha baba yao Zebedeo mle chomboni pamoja na wafanya kazi, wakaja, wakamfuata nyuma yake.

Kufukuza pepo.

²¹Wakaenda, wakaingia Kapernaumu. Ilipokuwa siku ya mapumziko, akaiingia nyumba ya kuombea, akafundisha.

²²Wakashangazwa na mafundisho yake; kwani alikuwa akiwafundisha kama mwenye nguvu, si kama waandishi.[#Mat. 7:28-29.]

²³Humo nyumbani mwao mwa kuombea mkawa na mtu aliyekuwa na pepo mchafu; akapaza sauti

²⁴akisema: Tuko na jambo gani sisi na wewe, Yesu wa Nasareti? Umekuja kutuangamiza. Nakujua, kama u nani; ndiwe Mtakatifu wa Mungu.[#Mar. 5:7; Sh. 16:10; Mat. 8:29.]

²⁵Yesu alipomkaripia akisema: Nyamaza, umtoke!

²⁶ndipo, yule pepo mchafu alipomsukumasukuma, akalia kwa sauti kuu, kisha akamtoka.[#Mar. 9:26.]

²⁷Wote wakaingiwa na kituko, hata wakaulizana wao kwa wao wakisema: Hilo ni jambo gani? Ni ufundisho mpya wa kinguvu. Anawaagiza hata pepo wachafu, nao humtii.

²⁸Huo uvumi wake ukatoka, ukaenea upesi po pote katika nchi zote zilizozunguka Galilea.

Mkwewe Simoni.

²⁹Hapo walipotoka nyumbani mwa kuombea wakaingia pamoja na Yakobo na Yohana nyumbani mwao Simoni na Anderea.

³⁰Naye mama ya mkewe Simoni alikuwa amelala kwa kuwa na homa. Papo hapo, walipomwambia, alivyokuwa,

³¹akamjia, akamwinua na kumshika mkono; ndipo, homa ilipomwacha, akawatumikia.

³²Ilipokuwa jioni, jua lilipokwisha kuchwa, wakampelekea wote waliokuwa hawawezi, nao waliopagawa na pepo,

³³mji wote ukawa umekusanyika mlangoni.

³⁴Akawaponya wengi waliokuwa hawawezi, wenye magonjwa mengi, akafukuza pepo wengi akiwakataza pepo kusema, ya kuwa walimjua.[#Luk. 4:41; Tume. 16:17-18.]

³⁵Asubuhi na mapema sana akainuka, akatoka, akaenda zake mahali palipokuwa pasipo watu; hapo ndipo, alipomwomba Mungu.

³⁶Naye Simoni na wenziwe wakamfuata mbio;

³⁷walipomwona wakamwambia: Wote wanakutafuta.

³⁸Akawaambia: Twendeni pengine penye vijiji vya pembenipembeni, nipate kupiga mbiu humo namo! Kwani hiyo ndiyo, niliyojia.

³⁹Akaenda katika nchi yote ya Galilea, akapiga mbiu katika nyumba zao za kuombea, akafukuza pepo.

Mwenye ukoma.

⁴⁰Mwenye ukoma akaja kwake, akambembeleza na kumpigia magoti akimwambia: Ukitaka waweza kunitakasa.

⁴¹Ndipo, alipomwonea uchungu, akanyosha mkono, akamgusa, akamwambia: Nataka, utakaswe.

⁴²Mara ukoma ukamwondoka, akatakaswa.[#Mar. 3:12; 7:36.]

⁴³Papo hapo akamkimbiza na kumkemea[#3 Mose 14:2-32.]

⁴⁴akimwambia: Tazama, usimwambie mtu neno! Ila uende zako, ujionyeshe kwa mtambikaji, uvitoe vipaji kwa ajili ya kutakaswa kwako, Mose alivyoviagiza, vije vinishuhudie kwao!

⁴⁵Lakini alipotoka akaanza kutangaza mengi na kulisimulia jambo hilo po pote. Kwa hiyo Yesu hakuweza tena kuingia mjini waziwazi, ila alikuwa akikaa nje mahali palipokuwa pasipo watu, lakini watu wakamwendea toka pande zote.