Marko 14

Njama ya kumkamata Yesu.

¹Palikuwa pamesalia siku mbili kuwa sikukuu ya Pasaka na ya mikate isiyotiwa chachu. Nao watambikaji wakuu na waandishi wakatafuta kumkamata kwa werevu, wapate kumwua;

²lakini walisema: Kwanza sikukuu ipite, watu wasije, wakafanya fujo!

Yesu anamiminiwa mafuta.

³Naye alipokuwa Betania nyumbani mwa Simoni Mkoma akikaa chakulani, akamjia mwanamke mwenye kichupa chepe cha jiwe kilichojaa mafuta ya maua yanayoitwa Narada; ni yenye bei kubwa, nayo yalikuwa hayakuchanganywa na mengine. Akakivunja kile kichupa, akayamiminia kichwani pake.[#Luk. 7:36-38.]

⁴Mlikuwamo waliochukiwa mioyoni mwao kwamba: Upotevu huu wa haya mafuta mazuri sana ni wa nini?

⁵Kwani mafuta haya yangaliwezekana kuuzwa kwa shilingi 300 na kupita, wakapewa maskini! Kwa hiyo wakamfokea sana.

⁶Lakini Yesu akasema: Mwacheni! Mbona mnamsikitisha? Amenitendea tendo zuri.

⁷Kwani maskini mnao kwenu siku zote, kila mnapotaka mweze kuwafanyia vema; lakini mimi hamwi nami siku zote.[#5 Mose 15:11.]

⁸Amefanya, alivyoweza; ameanza kuupaka mwili wangu mafuta haya, autengenezee kuzikwa.

⁹Kweli nawaambiani: Po pote katika ulimwengu wote, patakapotangazwa huu Utume mwema, patasemwa nacho hiki, alichokitenda yeye, naye akumbukwe.

Yuda Iskariota.

¹⁰Kisha Yuda Iskariota aliyekuwa mwenzao wale kumi na wawili akaenda zake kwa watambikaji wakuu, amtie mikononi mwao.

¹¹Nao walipoyasikia wakafurahi, wakaagana naye kumpa fedha. Ndipo, alipotafuta njia iliyofaa, amtoe.

Kondoo ya Pasaka.

¹²Siku ya kwanza ya kula mikate isiyotiwa chachu, watu walipochinjia kondoo ya Pasaka, wanafunzi wake wakamwuliza: Unataka, twende, tukuandalie wapi, uile kondoo ya Pasaka?

¹³Akawatuma wanafunzi wake wawili, akawaambia: Nendeni mjini! Humo mtakutana na mtu anayechukua mtungi wa maji, mfuateni!

¹⁴Mle atakamoingia mwambieni mwenye nyumba: Mfunzi anauliza: Kiko wapi chumba cha kukaa mimi, ndimo niile kondoo ya Pasaka pamoja na wanafunzi wangu?[#Mar. 11:3.]

¹⁵Ndipo, mwenyewe atakapowaonyesha chumba kikubwa kilichokwisha kutandikwa; namo mle tuandalieni!

¹⁶Wale wanafunzi wakatoka, wakaenda, wakaingia mjini, wakaona, kama alivyowaambia, wakaiandaa kondoo ya Pasaka.

¹⁷Ilipokuwa jioni, akaja pamoja na wale kumi na wawili.[#Sh. 41:10.]

¹⁸Walipokaa wakila, Yesu akasema: Kweli nawaambiani: Mwenzenu mmoja anayekula pamoja nami atanichongea.

¹⁹Wakaanza kusikitika na kumwuliza mmoja mmoja: Ni mimi?

²⁰Naye akawaambia: Ninyi kumi na wawili mwenzenu aliyetowelea pamoja nami bakulini ndiye.

²¹Mwana wa mtu anakwenda njia yake, kama alivyoandikiwa; lakini yule mtu, ambaye Mwana wa mtu atachongewa naye, atapatwa na mambo. Ingalimfalia yule mtu, kama-asingalizaliwa.

Chakula cha Bwana.

²²Walipokuwa wakila, akatwaa mkate, akauombea, akaumega, akawapa, akasema: Twaeni! Huu ndio mwili wangu.[#1 Kor. 11:23-25.]

²³Kisha akatwaa kinyweo, akashukuru, akawapa, wakanywa wote humo,

²⁴akawaambia: Hii ndiyo damu yangu ya Agano Jipya inayomwagwa kwa ajili ya wengi.[#2 Mose 24:8; Zak. 9:11.]

²⁵Kweli nawaambiani: Tangu sasa sitayanywa tena mazao ya mizabibu mpaka siku ile, nitakapoyanywa mapya katika ufalme wa Mungu.

²⁶Walipokwisha kuimba wakatoka kwenda mlimani pa michekele.[#Sh. 115—118.]

²⁷Yesu akawaambia: Nyote mtajikwaa, kwani imeandikwa:

Nitampiga mchungaji, kondoo watawanyike;

²⁸lakini nitakapokwisha kufufuliwa nitawatangulia kwenda Galilea.[#Mar. 16:7.]

²⁹Ndipo, Petero alipomwambia: Ijapokuwa, wote wajikwae, lakini mimi sio.

³⁰Yesu akamwambia: Kweli nakuambia: Usiku huu wa leo jogoo atakapokuwa hajawika mara mbili, utakuwa umenikana mara tatu.[#Yoh. 13:38.]

³¹Naye akakaza mno kusema: Hata ijaponipasa kufa pamoja nawe, sitakukana kabisa. Nao wote wakasema vivyo hivyo.[#Yoh. 11:16.]

Getisemane.

³²Walipofika mahali, jina lake Getisemane, akawaambia wanafunzi wake: Kaeni hapa, mpaka niishe kuomba![#Yoh. 18:1.]

³³Akamchukua Petero na Yakobo na Yohana, akaenda nao, akaanza kuingiwa na kituko na kuhangaika,

³⁴akawaambia: Roho yangu inaumizwa sana na masikitiko, imesalia kufa tu. Kaeni papa hapa, mkeshe![#Sh. 43:5; Yoh. 12:27.]

³⁵Akaendelea mbele kidogo, akaanguka chini, akaomba, ikiwezekana, saa hiyo impite, isimfikie.

³⁶Akasema: Aba baba, yote yanawezekana kwako; kipitishe kinyweo hiki, nisikinywe! Lakini yasifanyike, niyatakayo mimi, ila yafanyike, uyatakayo wewe![#Mar. 10:38.]

³⁷Alipokuja akawakuta, wamelala usingizi, akamwambia Petero: Simoni, umelala usingizi? Hukuweza kukesha saa moja tu?

³⁸Kesheni na kuomba, msije kuingia majaribuni! Roho inataka kuitikia, lakini mwili ni mnyonge.

³⁹Akaenda tena, akaomba na kusema maneno yaleyale.

⁴⁰Alipokuja tena akawakuta, wamelala usingizi, kwani macho yao yalikuwa mazito, hawakujua ya kumjibu.

⁴¹Alipokuja mara ya tatu akawaambia: Mwafuliza kulala usingizi, uchovu uwatoke? Pametimia, saa imefika; tazameni, Mwana wa mtu anatiwa mikononi mwa wakosaji!

⁴²Inukeni, twende! Tazameni, mwenye kunichongea yuko karibu![#Yoh. 14:31.]

Kukamatwa kwa Yesu.

⁴³Angali akisema, papo hapo akaja Yuda, mmoja wao wale kumi na wawili, pamoja na kundi la watu wengi wenye panga na rungu waliotoka kwa watambikaji wakuu na kwa waandishi na kwa wazee.

⁴⁴Lakini mwenye kumchongea alikuwa amewapa kielekezo akisema: Nitakayemnonea ndiye, mkamateni, mwende naye mkimwangalia sana!

⁴⁵Naye alipofika, mara akamjia, akasema: Mfunzi mkuu! akamnonea;

⁴⁶ndipo, walipomkamata kwa mikono yao.

⁴⁷Lakini mmoja wao waliosimama hapo akauchomoa upanga wake, akampiga mtumwa wa mtambikaji mkuu, akamkata sikio.

⁴⁸Lakini Yesu akajibu, akawaambia: Mmetoka wenye panga na rungu, mnikamate mimi, kama watu wanavyomwendea mnyang'anyi.

⁴⁹Kila siku nilikuwa kwenu hapo Patakatifu nikifundisha, lakini hamkunikamata; lakini yamekuwapo, Maandiko yatimizwe.

⁵⁰Hapo waliokuwa naye wakamwacha, wakakimbia wote.

⁵¹Kulikuwa na kijana mmoja aliyefuatana naye, alikuwa ameufunika uchi wake kwa kitambaa cha bafta tu. Lakini walipomkamata,

⁵²akakiacha kile kitambaa cha bafta, akakimbia mwenye uchi.

Yesu mbele ya Kayafa.

⁵³Wakampeleka Yesu kwa mtambikaji mkuu. Wakakusanyika wote, watambikaji wakuu na wazee na waandishi.

⁵⁴Naye Petero akamfuata mbalimbali, mpaka akaingia uani kwa mtambikaji mkuu, akakaa pamoja na watumishi penye mwangaza akiota moto.

⁵⁵Lakini watambikaji wakuu na baraza ya wakuu wote wakamtafutia Yesu ushuhuda, wapate kumwua, lakini hawakuupata.

⁵⁶Kwani wengi walimshuhudia ya uwongo, lakini ushuhuda wao haukupatana.

⁵⁷Kisha wakainuka wengine, wakamshuhudia ya uwongo na kusema:[#Yoh. 2:19; 4:21,23.]

⁵⁸Sisi tumesikia, alivyosema: Mimi nitalivunja Jumba hili la Mungu lililojengwa na mikono, tena nitajenga jingine muda wa siku tatu lisilojengwa na mikono.

⁵⁹Lakini hata hivyo ushuhuda wao haukupatana.

⁶⁰Ndipo, mtambikaji mkuu alipoinuka, akaja katikati, akamwuliza Yesu akisema: Hujibu neno, hawa wanayokusimangia?

⁶¹Lakini akanyamaza kimya, asimjibu neno. Mtambikaji mkuu akamwuliza tena akimwambia: Wewe ndiwe Kristo, mwana wake Mtukufu?[#Mar. 15:5; Yes. 53:7.]

⁶²Yesu akasema: Mimi ndiye. Nanyi mtamwona Mwana wa mtu, anavyokaa kuumeni kwa nguvu, tena atakavyokuja na mawingu ya mbinguni.[#Sh. 110:1; Dan. 7:13-14.]

⁶³Ndipo, mtambikaji mkuu alipozirarua nguo zake, akasema: Mashahidi tunawatakia nini tena?

⁶⁴Mmesikia, anavyombeza Mungu. Mwaonaje? Nao wote wakamhukumu kwamba: Amepaswa na kufa.[#Yoh. 19:7.]

⁶⁵Kisha wengine wakaanza kumtemea mate, tena wakamfunika uso, wakampiga makonde, wakamwambia: Fumbua! Nao watumishi wakamchukua, wakampiga makofi.

Kukana kwa Petero.

⁶⁶Naye Petero alipokuwa amekaa chini uani, akaja mmoja wao vijakazi wa mtambikaji mkuu.

⁶⁷Alipomwona Petero, alivyoota moto, akamchungulia, akasema: Hata wewe ulikuwa pamoja na yule Yesu wa Nasareti.

⁶⁸Akakana akisema: Sijui, wala sitambui, wewe unayoyasema. Kisha akatoka kufika nje ukumbini.

⁶⁹Yule kijakazi alipomwona, akaanza tena kuwaambia waliosimama pale: Huyu ni mwenzao.

⁷⁰Lakini akakana tena. Tena punde kidogo waliosimama pale wakamwambia Petero: Kweli u mwenzao, kwani nawe u Mgalilea.

⁷¹Ndipo, alipoanza kujiapiza na kuapa akisema: Simjui mtu huyo, mnayemsema.

⁷²Mara hiyo jogoo akawika mara ya pili. Hapo Petero akalikumbuka lile neno, kama Yesu alivyomwambia: Jogoo atakapokuwa hajawika mara mbili, utakuwa umenikana mara tatu. Alipovifikiri akaanza kulia.[#Mar. 14:30.]