Matarumbeta mawili ya fedha.

¹Bwana akamwambia Mose kwamba:[#4 Mose 31:6.]

²Jifanyizie matarumbeta mawili ya fedha, nayo uyatengeneze kwa kufuafua fedha, uyatumie kuwa ya kuwaitia wao wa mkutano, tena ya kuwatangazia, wavunje makambi.

³Yatakapopigwa yote mawili, watu wote wakusanyike kwako hapo pa kuliingilia Hema la Mkutano.

⁴Lakini litakapopigwa moja tu, na wakusanyike kwako wakuu tu walio vichwa vyao maelfu ya Waisiraeli.

⁵Lakini mtakapoyapiga kwa sauti kuu za kushangilia, makambi yaliyoko upande wa maawioni kwa jua na yavunjwe.

⁶Mtakapoyapiga mara ya pili kwa sauti kuu za kushangilia, makambi yaliyoko upande wa kusini na yavunjwe. Yatakapopigwa kwa sauti kuu za kushangilia yatakuwa ya kuvunjia makambi.

⁷Lakini kwa kuukusanya mkutano mtayapiga tu pasipo kuzitumia sauti kuu za kushangilia.

⁸Nao wana wa Haroni walio watambikaji ndio watakaoyapiga hayo matarumbeta. Haya na yawe maongozi ya kale na kale kwenu na kwa vizazi vyenu.

⁹Napo hapo, mtakapokwenda vitani katika nchi yenu kupigana na adui watakaowasonga, na mshangilie na kuyapiga hayo matarumbeta; ndipo, mtakapokumbukwa mbele ya Bwana Mungu wenu, mwokolewe katika adui zenu.

¹⁰Nazo siku za furaha zenu na za sikukuu zenu na za miandamo ya mwezi na myapige, mkizitoa ng'ombe zenu za tambiko za kuteketezwa nzima na za shukrani; ndipo, yatakaposaidia, mkumbukwe mbele ya Mungu wenu. Mimi Bwana ni Mungu wenu.[#3 Mose 23:24; 2 Fal. 11:14; 2 Mambo 7:6.]

Waisiraeli wanaondoka nyikani kwa Sinai.

¹¹Ikawa siku ya ishirini ya mwezi wa pili katika mwaka wa pili, ndipo, lile wingu lilipoondoka penye Kao la Ushahidi.

¹²Nao wana wa isiraeli wakaondoka kwenda safari yao na kutoka nyikani kwa Sinai, nalo wingu likatua tena katika nyika ya Parani.

¹³Kama Bwana alivyoviagiza kinywani mwa Mose, ndivyo, wa kwanza walivyoondoka.[#4 Mose 1—4.]

¹⁴Kwanza ikaondoka bendera ya makambi ya wana wa Yuda, vikosi kwa vikosi, naye mkuu wa vikosi vyao alikuwa Nasoni, mwana wa Aminadabu.

¹⁵Naye mkuu wa shina la wana wa Isakari alikuwa Netaneli, mwana wa Suari.

¹⁶Naye mkuu wa vikosi vya shina la wana wa Zebuluni alikuwa Eliabu, mwana wa Heloni.

¹⁷Kisha Kao likashushwa, nao wana wa Gersoni na wana wa Merari wakaondoka na kulichukua Kao.

¹⁸Kisha bendera ya makambi ya Rubeni ikaondoka, vikosi kwa vikosi, naye mkuu wa vikosi vyao alikuwa Elisuri, mwana wa Sedeuri.

¹⁹Naye mkuu wa vikosi vya shina la wana wa Simeoni alikuwa Selumieli, mwana wa Surisadai.

²⁰Naye mkuu wa vikosi vya shina la wana wa Gadi alikuwa Eliasafu, mwana wa Deueli.

²¹Kisha wakaondoka Wakehati wakivichukua vyombo vitakatifu; hao walipofika, wale walikuwa wamekwisha kulisimamisha Kao.

²²Kisha bendera ya makambi ya wana wa Efuraimu ikaondoka, vikosi kwa vikosi, naye mkuu wa vikosi vyao alikuwa Elisama, mwana wa Amihudi.

²³Naye mkuu wa vikosi vya shina la wana wa Manase alikuwa Gamulieli, mwana wa Pedasuri.

²⁴Nye mkuu wa vikosi vya shina la wana wa Benyamini alikuwa Abidani, mwana wa Gideoni.

²⁵Kisha bendera ya makambi ya wana wa Dani ikaondoka, vikosi kwa vikosi; nao walikuwa wanyuma wa makambi yote, naye mkuu wa vikosi vyao alikuwa Ahiezeri, mwana wa Amisadai.

²⁶Naye mkuu wa vikosi vya shina la wana wa Aseri alikuwa Pagieli, mwana wa Okrani.

²⁷Naye mkuu wa vikosi vya shina la wana wa Nafutali alikuwa Ahira, mwana wa Enani.

²⁸Hivyo ndivyo, wana wa Isiraeli walivyokwenda safarini, vikosi kwa vikosi, walipoondoka kwenda safari yao.

²⁹Mose akamwambia Hobabu, mwana wa Reueli wa Midiani, mkwewe Mose: Sisi tunaondoka kwenda mahali, Bwana aliposema: Hapo ndipo, nitakapowapa ninyi; nenda pamoja nasi, tutakufanyizia mema, kwani Bwana amewaambia wana wa Isiraeli, ya kuwa atawapa mema.[#2 Mose 2:18; Amu. 1:16.]

³⁰Lakini akamwambia: Sitakwenda, ila nitarudi kwetu kwa ndugu zangu wa kuzaliwa nao.

³¹Akamjibu: Usituache! Kwa kuwa unajua mahali, tunapoweza kupiga makambi nyikani, kwa hiyo utakuwa kama macho yetu sisi.

³²Ukienda na sisi, tutakufanyizia mema yote, Bwana atakayotufanyizia sisi.

³³Walipoondoka mlimani kwa Bwana, wakasafiri siku tatu, nalo Sanduku la Agano la Bwana likawatangulia safari ya hizo siku tatu, liwatafutie mahali pa kupumzikia.

³⁴Nalo wingu la Bwana lilikuwa juu yao mchana, walipoondoka makambini.[#2 Mose 13:21.]

³⁵Kila mara Sanduku lilipoondoka, Mose akasema: Inuka, Bwana, adui zako watawanyike, nao wachukivu wako waukimbie uso wako![#Sh. 68:2; 132:8.]

³⁶Tena lilipotua husema: Rudi, Bwana, kwenye maelfu na maelfu ya Isiraeli!