Miriamu anapatwa na ukoma kwa kumkataa Mose.

¹Miriamu na Haroni wakamteta Mose kwa ajili ya mke wa Kinubi, aliyemwoa; kwani Mose alioa mwanamke wa Kinubi.[#2 Mose 2:21.]

²Wakasema: Je? Bwana alisema na Mose peke yake tu? Hakusema na sisi nasi? Naye Bwana akayasikia.

³Lakini Mose alikuwa mtu mpole sana kuliko watu wote walioko huku nchini.

⁴Mara Bwana akamwambia Mose, nao Haroni na Miriamu: Tokeni ninyi watatu, mfike penye Hema la Mkutano! Ndipo, walipotoka wao watatu.

⁵Bwana akashuka katika lile wingu lililokuwa kama nguzo, akasimama hapo pa kuliingilia Hema, akamwita Haroni na Miriamu, nao wakatokea wote wawili.[#2 Mose 16:10.]

⁶Akasema: Yasikieni maneno yangu! kama kwenu yuko mfumbuaji, mimi Bwana nitajijulisha kwake kwa maono, niseme naye kwa ndoto.

⁷Lakini vya mtumishi wangu Mose sivyo vilivyo, kwani yeye ni mwelekevu katika nyumba yangu yote nzima.[#Ebr. 3:2.]

⁸Nasema naye kinywa kwa kinywa, naye huniona mimi Bwana, nilivyo, haoni kivulivuli tu au mfano tu; kwa nini ninyi hamkuogopa kuteta na mtumishi wangu Mose?[#2 Mose 33:11,23.]

⁹Makali ya Bwana yakawawakia, naye akaenda zake,

¹⁰nalo wingu likaondoka juu ya Hema; walipotazama, Miriamu alikuwa mwenye ukoma uliokuwa mweupe kama chokaa juani. Haroni naye alipomgeukia Miriamu akamwona, ya kuwa ni mwenye ukoma.[#5 Mose 24:9.]

¹¹Ndipo, Haroni alipomwambia Mose: E Bwana wangu, usitutwike hilo kosa letu, tulilolikosa kwa upumbavu!

¹²Huyu umbu letu asiwe kama mfu aliyekwisha kuliwa nusu ya nyama za mwili wake hapo, alipotoka tumboni mwa mama yake.

¹³Mose akamlilia Bwana kwamba: E Mungu, ninakuomba sana, umponye.[#2 Mose 15:26.]

¹⁴Bwana akamwambia Mose: Kama baba yake angalimtemea mate usoni pake, hangaliona soni siku saba? Na afungiwe siku saba nje ya makambi, baadaye na arudishwe tena.[#3 Mose 13:46.]

¹⁵Kwa hiyo Miriamu akafungiwa nje ya makambi siku saba, nao watu hawakuondoka kwenda safari yao, mpaka Miriamu akarudishwa.

¹⁶Kisha watu wakaondoka Haseroti kwenda safari yao, wakapiga makambi katika nyika ya Parani.