Watu 12 wanatumwa kupeleleza Kanaani.

¹Bwana akamwambia Mose kwamba:

²Tuma watu kwenda kuipeleleza nchi ya Kanaani, mimi ninayotaka kuwapa wana wa Isiraeli. Kila shina la baba zao na litoe mtu mmoja, mtakayemtuma, nao wote wawe wakuu kwao.

³Kwa kuagizwa na Bwana Mose akawatuma kutoka kule nyikani kwa Parani, nao watu hao wote walikuwa vichwa vya wana wa Isiraeli.

⁴Nayo haya ndiyo majina yao: wa shina la Rubeni Samua, mwana wa Zakuri,

⁵wa shina la Simeoni Safati, mwana wa Hori,[#Yos. 14:7.]

⁶wa shina la Yuda Kalebu, mwana wa Yefune,

⁷wa shina la Isakari Igali, mwana wa Yosefu,

⁸wa shina la Efuraimu Hosea, mwana wa Nuni,[#4 Mose 13:16; 1 Mambo 7:27.]

⁹wa shina la Benyamini Palti, mwana wa Rafu,

¹⁰wa shina la Zebuluni Gadieli, mwana wa Sodi,

¹¹wa shina la Yosefu wa shina la Manase Gadi, mwana wa Susi,

¹²wa shina la Dani Amieli, mwana wa Gemali,

¹³wa shina la Aseri Seturi, mwana wa Mikaeli,

¹⁴wa shina la Nafutali Nabi, mwana wa Wofusi,

¹⁵wa shina la Gadi Gueli, mwana wa Maki.

¹⁶Haya ndiyo majina ya wale watu, Mose aliowatuma kuipeleleza nchi. Lakini Hosea, mwana wa Nuni, Mose akamwita Yosua.[#4 Mose 11:28.]

¹⁷Mose alipowatuma kwenda kuipeleleza nchi ya Kanaani akawaambia: Pandeni huku kusini, kisha mpande milimani.

¹⁸Mwitazame hiyo nchi, ilivyo, nao watu wanaokaa huko, kama ni wanguvu, au kama ni wanyonge, kama ni wachache, au kama ni wengi.

¹⁹Itazameni hiyo nchi, wale watu wanayoikaa, kama ni jema, au kama ni mbaya, nayo miji, wale watu wanayoikaa, itazameni, itazameni, kama ni makambikambi tu, au kama ni miji yenye maboma.

²⁰Nchi itazameni, kama ni yenye wiva, au kama haizai, kama iko miti, au kama hakuna. Tena jipeni mioyo, mchukue matunda ya nchi hiyo! Nazo siku zile zilikuwa siku za malimbuko ya mizabibu.

²¹Kisha wakaenda kupanda huko, wakaipeleleza nchi toka nyika ya Sini mpaka Rehobu kwenye njia ya kwenda Hamati.

²²Kisha wakapanda upande wa nchi ya kusini, wakafika Heburoni; ndiko, walikokaa Ahimani, Sesai na Talmai, wana wa Anaki. Nao Heburoni ulikuwa umejengwa miaka saba kabla ya Soani wa Misri.

²³Walipofika penye kijito cha Eskoli, wakakata huko tawi la mzabibu lenye kichala, wakalichukua mpikoni watu wawili, wakachukua hata komamanga na kuyu.

²⁴Mahali pale wakapaita Kijito cha Eskoli (Kichala) kwa ajili ya hicho kichala, wana wa Isiraeli walichokikata huko.

²⁵siku 40 zilipopita, wakarudi, kwa kuwa walikwisha kuipeleleza hiyo nchi.

²⁶Wakaja, wakafika kwa Mose na Haroni na kwa mkutano wote wa wana wa Isiraeli katika nyika ya Parani kule Kadesi, wakawasimulia wao nao mkutano wote waliyoyaona, wakawaonyesha nayo yale matunda ya hiyo nchi.

²⁷Wakawasimulia kwamba: Tumeiingia nchi, mliyotutuma, ichuruzikayo maziwa na asali, nayo haya ni matunda yake.[#2 Mose 3:8,17.]

²⁸Lakini wale wanaokaa katika hiyo nchi wako na nguvu, nayo miji yao ni mikubwa sana yenye maboma magumu; nao wana wa Anaki tumewaona huko.

²⁹Waamaleki wanakaa katika nchi ya kusini; nao Wahiti na Wayebusi na Waamori wanakaa milimani, nao Wakanaani wanakaa upande wa baharini na kando ya Yordani.

³⁰Naye Kalebu akawatuliza mioyo wale watu mbele ya Mose akisema: Haya! Na tupande, tuichukue hiyo nchi! Kwani tutaweza kuishinda kabisa.[#4 Mose 13:6; 14:6.]

³¹Lakini wale watu wengine waliopanda naye wakasema: Hatuwezi kupanda, tupigane na hao watu, kwani ndio wenye nguvu kuliko sisi.

³²Wakazidi kuisingizia nchi ile, waliyoipeleleza, wakiwaambia wana wa Isiraeli: Hiyo nchi, tuliyoipita kuipeleleza, ndiyo nchi inayowala wenyeji wake, nao watu wote, tuliowaona huko, ni watu warefu mno.

³³Huko tumeona hata wale Majitu, ni wana wa Anaki wa mlango wa hao Majitu, nasi tukawa machoni petu kama panzi, tena ndivyo, tulivyokuwa machoni pao.[#5 Mose 9:2.]