Waisiraeli wanapatiliziwa manung'uniko yao, wakae nyikani miaka arobaini.

¹Ndipo, wao wote wa mkutano walipozipaza sana sauti zao, watu wakalia usiku kucha.

²Wana wote wa Isiraeli wakamnung'unikia Mose na Haroni, nao wote walio wa mkutano wao wakawaambia: Afadhali tungalikufa katika nchi ya Misri au tungekufa huku nyikani![#2 Mose 16:3.]

³Kwa nini Bwana anatupeleka katika nchi ile, tuuawe kwa panga, wake zetu nao watoto wetu watekwe? Haitatufalia zaidi kurudi Misri?[#Sh. 106:24.]

⁴Wakasemezana wao kwa wao: Na tujipatie mkuu, turudi Misri?

⁵Ndipo, Mose na Haroni walipojiangusha nyusoni pao mbele ya huo mkutano wote wa wana wa Isiraeli uliokusanyika.[#4 Mose 16:4.]

⁶Nao Yosua, mwana wa Nuni, na Kalebu, mwana wa Yefune, waliokuwa pamoja nao walioipeleleza hiyo nchi, wakayararua mavazi yao,[#4 Mose 13:16,30.]

⁷wakauambia mkutano wote wa wana wa Isiraeli kwamba; Ile nchi, tuliyoipita na kuipeleleza, ni nchi njema sanasana.

⁸Bwana akipendezwa nasi, atatuingiza katika nchi hiyo, atupe, iwe yetu; nayo ni nchi ichuruzikayo maziwa na asali.[#4 Mose 13:27.]

⁹Ni hili tu, msimpingie Bwana! Tena wale watu wa nchi hiyo msiwaogope, kwani watakuwa kama chakula chetu, nacho kivuli, walichokikimbilia, kimeondoka kwao, naye Bwana yuko pamoja na sisi, kwa hiyo msiwaogope!

¹⁰Wao wote wa huo mkutano walipotaka kuwaua na kuwatupia mawe, ndipo, utukufu wa Bwana ulipotokea penye Hema la Mkutano mbele ya wana wote wa Isiraeli.[#2 Mose 16:10; 17:4.]

¹¹Bwana akamwambia Mose: Watu hawa watanitukana mpaka lini? Watakataa mpaka lini kunitegemea? Nami nimevifanya hivyo vielekezo vyote kwao!

¹²Nitawapiga kwa ugonjwa mbaya uuao, niwatoweshe, kisha nitakufanya wewe kuwa kabila kubwa lenye nguvu kuliko hawa.[#2 Mose 32:10-14.]

¹³Lakini Mose akamwambia Bwana: Wamisri watavisikia; kwani wewe umewatoa watu hawa kwa nguvu yako katikati yao, ukawaleta huku.

¹⁴Nao wenyeji wa nchi hii watasimuliwa, kwani nao wamesikia, ya kuwa wewe Bwana uko katikati ya watu hawa, uliowatokea, wakuone macho kwa macho wewe Bwana, tena ya kuwa wingu lako huwasimamia, ukiwatangulia mchana kwa wingu linalofanana na nguzo, nao usiku kwa wingu le moto linalofanana na nguzo

¹⁵Kama ungewaua watu hawa kama mtu mmoja, ndipo, wamizimu waliousikia uvumi wako watakaposema kwamba:

¹⁶Kwa kuwa Bwana hakuweza kuwaingiza watu hawa katika nchi hiyo, aliyoiapia kuwapa, kwa hiyo amewachinja nyikani.[#5 Mose 9:28.]

¹⁷Sasa nguvu ya Bwana wangu na ionekane kuwa kuu, kama ulivyosema kwamba:

¹⁸Bwana ni mwenye uvumilivu na upole mwingi, huondoa manza na mapotovu, lakini mbele yake hakuna asiye mkosaji; nazo manza, baba walizozikora, huzilipisha wtoto, akifikishe kizazi cha tatu na cha nne.[#2 Mose 34:6-7.]

¹⁹Waondolee watu hawa manza kwa ukubwa wa upole wako, kama ulivyowaondolea watu hawa makosa yao kutoka Misri mpaka hapa!

²⁰Ndipo, Bwana aliposema: Nimewaondolea makosa kwa hivyo, ulivyowaombea.

²¹Kwa hivyo, nilivyo Mwenye uzima, ulimwengu wote utaenezwa utukufu wangu.[#2 Mose 9:16.]

²²Kwani watu hawa wote waliouona utukufu wangu na vielekezo vyangu, nilivyovifanya Misri na nyikani, wakanijaribu sana mara kumi wakikataa kuisikiliza sauti yangu,

²³hawa wote hawataiona nchi, niliyowaapia baba zao kuwapa, kweli wao wote walionitukana hawataiona kabisa.[#Sh. 95:11; Ebr. 3:17-19.]

²⁴Ni mtumishi wangu Kalebu tu aliye mwenye roho nyingine moyoni mwake, akanifuata kwa moyo wote, basi, yeye nitamwingiza katika nchi hiyo, aliyoiingia kwanza, nao wa uzao wake wataichukua kuwa yao,[#Yos. 14:6,9.]

²⁵lakini Waamaleki na Wakanaani watakaa bondeni. Kesho geukeni na kujiendea nyikani mkishika njia ya kwenda kwenye Bahari Nyekundu.

²⁶Bwana akamwambia Mose na Haroni kwamba:

²⁷Itakuwa mpaka lini, watu wa mkutano huu mbaya wakininung'unikia? Nimeyasikia manung'uniko ya wana wa Isiraeli, wao waliponinung'unikia.

²⁸Waambie: Ndivyo, asemavyo Bwana: Kwa hivyo, nilivyo Mwenye uzima, nitawafanyizia yayo hayo, mliyoyasema masikioni mwangu:

²⁹Huku nyikani itaanguka mizoga yenu ninyi nyote mliokaguliwa na kuhesabiwa, mlio wenye miaka ishirini na zaidi, mlioninung'unikia.

³⁰Ninyi nyote hamtaiingia kabisa ile nchi, niliyoiapia na kuuinua mkono wangu, ya kwamba nitawakalisha huko. Kalebu, mwana wa Yefune, na Yosua, mwana wa Nuni, hawa tu wataiona.

³¹Lakini watoto wenu, mliowasema, ya kama watakuwa mateka, nitawaingiza huko waijue nchi ile, mliyoikataa.

³²Lakini mizoga yenu ninyi itaanguka huku nyikani.

³³Lakini kwanza wana wenu watakuwa wachungaji nyikani miaka 40, watwikwe ugoni wenu, mpaka mizogo yenu imalizike nyikani.

³⁴Kwa hesabu ya zile siku 40, mlizoipeleleza ile nchi, kila siku moja itahesabiwa kuwa mwaka mmoja; hivyo ndivyo, watakavyotwikwa miaka 40 manza, mlizozikora, mpate kutambua, mambo yanavyoendelea, nikiondoka kwenu.

³⁵Mimi Bwana nimesema, nami nitawafanyizia haya wao wote walio wa mkutano huu mbaya waliokusanyika, wanipingie: huku nyikani watamalizika, kwani huku ndiko, watakakofia.

³⁶Kisha wale watu, Mose aliowatuma kuipeleleza nchi ile, ni wao waliounung'unisha mkutano wote waliporudi na kutoa habari za nchi ile,[#1 Kor. 10:5,10; Yuda 5.]

³⁷hao watu waliozitoa zile habari mbaya za nchi ile wakafa kwa kupigwa na Bwana.

³⁸Lakini Yosua, mwana wa Nuni, na Kalebu, mwana wa Yefune, ndio waliokaa wenye uzima miongoni mwao waliokwenda kuipeleleza ile nchi.[#4 Mose 14:30.]

³⁹Mose alipowaambia wana wote wa Isiraeli maneno haya, wakasikitika sana.

⁴⁰Kesho yake wakaamka na mapema, wakapanda mlimani juu kileleni na kusema: Basi, tumekwisha kufika huku, sasa twende kupanda mahali pale, Bwana alipotuelekeza! Kwani tumekosa.[#4 Mose 13:17.]

⁴¹Lakini Mose akasema: Mbona ninyi mwataka kuitangua amri ya Bwana? Hamtafanikiwa.

⁴²Msipande! Kwani Bwana hamnaye katikati yenu, msipigwe na adui zenu.

⁴³Kwani Waamaleki na Wakanaani wako mbele yenu, nanyi mtaangushwa kwa panga, kwa kuwa mmerudi nyuma na kumwacha Bwana; kwa hiyo Bwana hatakuwa nanyi.

⁴⁴Lakini kwa kujivuna wakapanda mlimani juu kileleni, lakini Sanduku la Agano la Bwana na Mose hawakutoka makambini.

⁴⁵Ndipo, Waamaleki na Wakanaani waliokaa huko mlimani walipotelemka, wakawapiga, wakawatawanya mpaka Horma.[#4 Mose 21:3.]