Bileamu anaitwa, awaapize Waisiraeli.

¹Wana wa Isiraeli walipoondoka huko wakapiga makambi kwenye mbuga za Moabu ng'ambo ya huku ya Yordani, Yeriko ukiwa ng'ambo ya pili.

²Balaka, mwana wa Sipori, alipoyaona yote, Waisiraeli waliyowafanyizia Waamori,

³Wamoabu wakaingiwa na woga mwingi sana wa hao watu kwa kuwa wengi sana, nao Wamoabu wakawastukia sana wana wa Isiraeli.

⁴Ndipo, Wamoabu walipowaambia wazee wa Wamidiani: Makundi hayo yatameza yote yanayotuzunguka, kama ng'ombe anavyomeza majani ya porini. Ndipo, Balaka, mwana wa Sipori, aliyekuwa mfalme wa Wamoabu siku zile

⁵alipotuma wajumbe kwenda Petori kwa Bileamu, mwana wa Beori, aliyekaa kwenye lile jito kubwa katika nchi yao walio ukoo wake, wamwite na kumwambia: Tazama, wako watu waliotoka Misri, nao wanaifunika nchi hii pote, unapotazama, tena wanakaa kunielekea mimi.[#Yos. 24:9; Mika 6:5.]

⁶Sasa njoo, uniapizie watu hawa! Kwani wako na nguvu za kunishinda mimi. Hivyo labda nitaweza kuwapiga na kuwafukuza katika nchi hii, kwani ninajua: Utakayembariki atakuwa amebarikiwa, naye utakayemwapiza atakuwa ameapizwa.

⁷Ndipo, wazee wa Wamoabu na wazee wa Wamidiani walipokwenda wakiushika mshahara wa uaguaji mikononi mwao; nao walipofika kwa Bileamu wakamwambia maneno ya Balaka.[#2 Petr. 2:15.]

⁸Akawaambia: Laleni huku usiku huu! Nami na niwarudishie neno, kama Bwana atakavyoniambia. Kwa hiyo wale wakuu wa Wamoabu wakakaa kwake Bileamu.

⁹Mungu akaja kwake Bileamu, akamwuliza: Watu hawa wanaokaa kwako ni watu gani?

¹⁰Bileamu akamwambia Mungu: Balaka, mwana wa Sipori, mfalme wa Moabu, amewatuma kwangu

¹¹kwamba: Tazama, wako watu waliotoka Misri, nao wanaifunika nchi pote, unapotazama; sasa njoo, uniapizie watu hawa! Labda hivyo nitaweza kupigana nao na kuwafukuza.

¹²Lakini Mungu akamwambia Bileamu: Usiende nao! Wala usiwaapize watu hao, kwani wamebarikiwa.

¹³Bileamu alipoamka asubuhi akawaambia wakuu wa Balaka: Nendeni zenu katika nchi yenu, kwani Bwana amekataa kunipa ruhusa kwenda nanyi.

¹⁴Ndipo, wakuu wa Wamoabu walipoondoka; walipofika kwa Balaka wakamwambia: Bileamu amekataa kwenda na sisi.

¹⁵Ndipo, Balaka alipotuma tena wakuu wengi wenye utukufu zaidi kuliko wale wa kwanza.

¹⁶Walipofika kwa Bileamu wakamwambia: Hivi ndivyo, anavyosema Balaka, mwana wa Sipori: Usikatae kuja kwangu!

¹⁷Kwani nitakuheshimu sanasana, nayo yote, utakayoniambia, nitayafanya; njoo tu, uniapizie hawa watu!

¹⁸Bileamu akajibu, akawaambia watumishi wa Balaka: Ijapo Balaka anipe nyumba yake ijaayo fedha na dhahabu, sitaweza kukipita kinywa cha Bwana Mungu wangu, nifanye jambo dogo au kubwa.[#1 Fal. 13:8.]

¹⁹Sasa nanyi kaeni hapa usiku huu, nijue, Bwana atakayoniambia tena!

²⁰Mungu akaja kwake Bileamu na usiku, akamwambia: Kama hawa watu wamekuja kukuita, inuka, uende nao! Lakini sharti ulifanye neno, nitakalokuambia.

Punda wa Bileamu anamwonya.

²¹Bileamu alipoondoka asubuhi akamtandika punda wake, akaenda nao wakuu wa Moabu.

²²Makali ya Mungu ayakawaka moto, kwa kuwa amekwenda; kwa hiyo malaika wa Bwana akaja, akajisimamisha njiani, ampinge; naye alikuwa amempanda punda wake, nao vijana wake wawili walikuwa naye.

²³Punda alipomwona malaika wa Bwana, akisimama njiani na kushika mkononi upanga uliochomolewa, punda akaondoka njiani na kuingia porini, naye Bileamu akampiga punda, amrudishe njiani.[#1 Mose 3:24; Yos. 5:13.]

²⁴Kisha malaika wa Bwana akasimama tena njiani penye mizabibu palipokuwa pembamba, kwa kuwa pande zote mbili palikuwa na kuta za mawe.

²⁵Punda alipomwona malaika wa Bwana akajisonga ukutani na kuuchubua mguu wa Bileamu; ndipo, alipompiga tena.

²⁶Naye malaika wa Bwana akapita tena, akaenda kusimama mahali pafinyu sana pasipowezekana kupitia wala kuumeni wala kushotoni.

²⁷Punda alipomwona malaika wa Bwana akalala chini, naye Bileamu alikuwa juu yake. Ndipo, makali ya Bileamu yalipomwakia, akampiga punda kwa fimbo.

²⁸Ndipo, Bwana alipokifumbua kinywa cha punda, akamwambia Bileamu: Nimekukosea nini, ukinipiga sasa mara ya tatu?[#2 Petr. 2:16.]

²⁹Bileamu akamwambia punda: Kumbe unanifyoza! Kama ningekuwa na upanga mkononi mwangu, ningekuua sasa hivi.

³⁰Naye punda akamwambia Bileamu: Je? Mimi si punda wako, uliyempanda siku zote za maisha yako hata siku hii ya leo? Nimezoa kukufanyizia hivyo? Akasema: La!

³¹Ndipo, Bwana alipoyafumbua macho yake Bileamu, akamwona malaika wa Bwana, alivyosimama njiani na kushika mkononi upanga uliochomolewa; ndipo, alipomwinamia na kumwangukia kifudifudi.

³²Naye malaika wa Bwana akamwambia: Kwa nini umempiga punda wako sasa mara ya tatu? Tazama, mimi nimetoka, nikupinge. Kwani safari hii ni ya kuangamiza machoni pangu.

³³Punda aliponiona akaondoka njiani mbele yangu sasa mara ya tatu; kama asingaliondoka njiani mbele yangu, ningalikwisha kukuua wewe mwenyewe na kumponya yeye.

³⁴Ndipo, Bileamu alipomwambia malaika wa Bwana: Nimekosa, kwani sikujua, ya kuwa wewe umesimama njiani, unipinge; sasa kama safari hii ni mbaya machoni pako, nitarudi.

³⁵Naye malaika wa Bwana akamwambia Bileamu: Jiendee pamoja na watu hawa! Lakini sharti uliseme neno hilo tu, nitakalokuambia. Kisha Bileamu akaenda na wale wakuu wa Balaka.

³⁶Balaka aliposikia, ya kama Bileamu anakuja, akatoka kumwendea njiani mpaka kwenye mji wa Moabu ulioko mahali penye mto wa Arnoni ulioko kwenye mapeo ya mpaka.

³⁷Balaka akamwuliza Bileamu: Sikutuma kwako vizuri, nikuite? Mbona hukuja kwangu? Labda unaniwazia kuwa mtu asiyeweza kukupa macheo?

³⁸Naye Bileamu akamwambia Balaka: Tazama, nimefika kwako! Lakini sasa je? nitaweza kusema lo lote? Neno hilo tu, Mungu atakalolitia kinywani mwangu, ndilo, nitakalolisema.

³⁹Kisha Bileamu akaenda na Balaka, wakaingia Kiriati-Husoti (Mji wenye Mabarabara).

⁴⁰Balaka akachinja ng'ombe na kondoo kuwa ng'ombe za tambiko, akamgawia hata Bileamu nyama, hata wakuu waliokuwa naye.

⁴¹Ilipokuwa asubuhi, Balaka akamchukua Bileamu, akampeleka juu vilimani kwa Baali; huko ndiko, alikowaona watu hao hata mwisho wa makambi yao.[#4 Mose 23:28.]