Wanawe Haroni.

¹Hivi ndivyo vizazi vya Haroni na vya Mose vya siku zile, Bwana aliposema na Mose mlimani kwa Sinai.[#2 Mose 6:23.]

²Haya ndiyo majina ya wanawe Haroni: wa kwanza ni Nadabu, tena Abihu na Elazari na Itamari.

³Haya ndiyo majina ya wanawe Haroni waliopakwa mafuta kuwa watambikaji na kujazwa magao yao, wapate kufanya kazi ya utambikaji.

⁴Lakini Nadabu na Abihu walikufa mbele ya Bwana walipomtolea Bwana moto mgeni wa mavukizo nyikani kwa Sinai, nao hawakuwa na wana; kwa hiyo Elazari na Itamari walifanya kazi ya utambikaji na kuangaliwa na baba yao Haroni.[#3 Mose 10:1-2.]

Kazi za Walawi.

⁵Bwana akamwambia Mose kwamba:

⁶Wafikishe hawa wana wa shina la Lawi, uwasimamishe mbele ya mtambikaji Haroni, wamtumikie.[#2 Mose 32:29.]

⁷Tena na waziangalie hizo kazi zinazompasa yeye kuziangalia, nazo kazi zinazoupasa mkutano wote kuziangalia mbele ya hema la Mkutano na kuutumikia utumishi wa Kaoni.

⁸Na waviangalie vyombo vyote vya Hema la Mkutano na kuziangalia kazi zinazowapasa wana wa Isiraeli kuziangalia na kuutumikia utumishi wa kaoni.[#4 Mose 4.]

⁹Hawa Walawi umpe Haroni na wanawe, wawe vipaji vyao walivyopewa na wana wa Isiraeli.

¹⁰Nao akina Haroni na wanawe uwaweke kuuangalia utambikaji wao. Lakini mgeni atakayejitia humo hana budi kuuawa.[#4 Mose 1:51.]

¹¹Bwana akasema na Mose kwamba:

¹²Tazama, mimi nimewachagua Walawi na kuwatoa katikati ya wana wa Isiraeli kuwa makombozi ya wana watakaozaliwa wa kwanza na mama zao kwa wana wa Isiraeli, kwa hiyo Walawi watakuwa wangu.[#4 Mose 8:16; 2 Mose 13:2.]

¹³Kwani wana wa kwanza wote ni wangu, kwani siku hiyo, nilipompiga kila mwana wa kwanza katika nchi ya Misri, nilijitakasia kila mwana wa kwanza kwa Waisiraeli, kama ni wa mtu au kama ni wa nyama wa kufuga, wawe wangu mimi Bwana.

Vizazi vya Walawi.

¹⁴Bwana akamwambia Mose nyikani kwa Sinai kwamba:

¹⁵Wakague wana wa Lawi milango ya baba zao mlango kwa mlango na udugu kwa udugu ukiwahesabu waume wote walio wenye mwezi mmoja na zaidi.

¹⁶Kisha Mose akawakagua kwa hiyo amri ya bwana, kama alivyoagizwa.

¹⁷Nao wana wa lawi walikuwa hawa kwa majina yao: Gersoni na Kehati na Merari.[#2 Mose 6:16-19; 4 Mose 26:57-64.]

¹⁸Nayo haya ndiyo majina ya wanawe Gersoni wenye udugu wao: Libuni na Simei.

¹⁹Nao wanawe Kehati wenye udugu wao ni Amuramu na Isihari, Heburoni na Uzieli.

²⁰Nao wanawe Merari wenye udugu wao ni Mahali na Musi. Hawa ndio ndugu za Lawi za milango ya baba zao.

²¹Wa Gersoni walikuwa wao wa udugu wa Libuni nao wa udugu wa Simei; hawa ndio ndugu zao wa Gersoni.

²²Walipohesabiwa waume wote wenye mwezi mmoja na zaidi jumla yao walikuwa watu 7500.

²³Hawa ndugu zao wa Gersoni wakaambiwa, wapige makambi nyuma ya Kao upande wa baharini.

²⁴Naye mkuu wao wa mlango wa baba yao Gersoni awe Eliasafu, mwana wa Laeli.

²⁵Nazo kazi zao wana wa Gersoni za kuziangalia Hemani mwa Mkutano ziwe kuliangalia Kao lenyewe na Hema na chandalua chake na lile guo kubwa la pazia lililoko pa kuliingilia Hema la Mkutano,

²⁶nazo nguo za uani na lile guo kubwa la pazia lililoko pa kuuingilia ua, unaolizunguka Kao na meza ya kutambikia, tena kamba zake nayo yote yanyoupasa utumishi huu.

²⁷Wa Kehati walikuwa wao wa udugu wa Amuramu nao wa udugu wa Isihari nao wa udugu wa Heburoni nao wa udugu wa Uzieli. Hawa ndio ndugu zao wa Kehati.

²⁸Walipohesabiwa waume wote wenye mwezi mmoja na zaidi jumla yao walikuwa watu 8600 wa kuziangalia kazi za kupaangalia Patakatifu.

²⁹Hawa ndugu zao wa Kehati wakaambiwa, wapige makambi upande wa kusini wa Kao.

³⁰Naye mkuu wao wa mlango wa baba yao Kehati awe Elisafani, mwana wa Uzieli.[#3 Mose 10:4.]

³¹Nazo kazi zake ziwe kuliangalia Sanduku na meza ya mikate na kinara na meza ya kuvukizia nayo ya kuteketezea ng'ombe za tambiko, navyo vyombo vya Patakatifu, watakavyovitumia, na pazia la Hemani, tena wafanye kazi zote za utumishi uwapasao.

³²Naye mkuu wa wakuu wa Walawi alikuwa Elazari, mwana wa mtambikaji Haroni, awakague wote wanaoangalia kazi za Patakatifu.

³³Wa Merari walikuwa wao wa udugu wa Mahali nao wa udugu wa Musi. Hawa ndio ndugu zao wa Merari.

³⁴Walipohesabiwa waume wote wenye mwezi mmoja na zaidi jumla yao walikuwa watu 6200.

³⁵Nao wakaambiwa, mkuu wao wa mlango wa baba yao Merari awe Surieli, mwana wa Abihaili, nao wapige makambi upande wa kaskazini wa Kao.

³⁶Nazo kazi zao wana wa Merari za kuangalia walizopewa ziwe hizo za mbao za Kao na misunguo yao na nguzo zao na miguu yao na vyombo vyao vyote, wafanye kazi zote za utumishi ziwapasazo,

³⁷tena kazi za kuziangalia nguzo zilizouzunguka ua na miguu yao na mambo zao na kamba zao.

³⁸Nao waliopiga makambi mbele ya Kao upande wa mashariki, ndio mbele ya Hema la Mkutano upande wa maawioni kwa jua walikuwa Mose na Haroni na wanawe waliongoja zamu za kupaangalia Patakatifu mahali pao wana wa Isiraeli. Lakini mgeni aliyejitia katika kazi hizi hakuwa na budi kuuawa.[#4 Mose 3:10.]

³⁹Jumla yao Walawi wote, Mose na Haroni waliowakagua kwa amri ya Bwana, waume wote wenye mwezi mmoja na zaidi wa udugu wao walikuwa watu 22000.

Ukombozi wa wana wa kwanza.

⁴⁰Bwana akamwambia Mose: Wakague waume wote wa wana wa Isiraeli wenye mwezi mmoja na zaidi walio wana wa kwanza, ufanye hesabu ya majina yao.

⁴¹Uwachukue Walawi kuwa wangu mimi Bwana, wakiwakomboa wana wote wa kwanza kwa wana wa Isiraeli, nao nyama wa kufuga wa Walawi na wawakomboe wana wa kwanza wa nyama wa kufuga wa wana wa Isiraeli.

⁴²Ndipo, Mose alipowakagua wana wote wa kwanza wa Waisiraeli, kama Bwana alivyomwagiza.

⁴³Nao waume wote waliokuwa wana wa kwanza wenye mwezi mmoja na zaidi walipohesabiwa majina, jumla yao walikuwa watu 22273.

⁴⁴Bwana akamwambia Mose kwamba:

⁴⁵Wachukue Walawi kuwa makombozi ya wana wote wa kwanza kwa wana wa Isiraeli, nao nyama wa kufuga wa Walawi kuwa makombozi ya nyama wao, Walawi wawe wangu mimi Bwana.[#4 Mose 3:12.]

⁴⁶Nayo makombozi yao wale 273 waliozidi kwa wana wa kwanza wa wana wa Isiraeli kuwa wengi kuliko Walawi,[#4 Mose 3:39,43.]

⁴⁷uwatoze kila mmoja fedha (sekeli) tano tano kichwa kwa kichwa, nazo hizi fedha, utakazowatoza, ziwe fedha zinazotumika Patakatifu, kila fedha moja iwe ya gera ishirini, ndio thumuni nane.

⁴⁸Hizi fedha mpe Haroni na wanawe kwa kuwa makombozi yao wale waliozidi kuwa wengi.

⁴⁹Ndipo, Mose alipowatoza fedha za makombozi wale waliozidi kuwa wengi kuliko wale waliokombolewa na Walawi.

⁵⁰Nazo hizi fedha, alizozitoza za kuwakomboa wana wa kwanza wa wana wa Isiraeli, zikawa 1365, zikipimwa kwa fedha za Patakatifu.

⁵¹Kisha Mose akampa Haroni na wanawe hizo fedha kwa ile amri ya Bwana, kama Bwana alivyomwagiza Mose.