Mema yao wamchao Mungu nayo mabaya yao wasiomcha.

¹Mizani ya kudanganyia humtapisha Bwana,

lakini mawe ya sawasawa ya kupimia humpendeza.

²Majivuno yanapofika, ndipo, matusi yanapofika nayo,

lakini werevu wa kweli huwakalia wanyenyekevu.

³Utawa wao wanyokao mioyo huwaongoza,

lakini waliomwacha Mungu upotovu wao huwaangamiza.

⁴Mali hazifai kitu siku, makali yanapotokea,

lakini wongofu huponya hata kufani.

⁵Wongofu wao wamchao Mungu huzinyosha njia zao,

lakini asiyemcha Mungu ataangushwa na uovu wake.

⁶Wongofu wao wanyokao mioyo utawaponya,

lakini waliomwacha Mungu watanaswa na tamaa zao.

⁷Mtu asiyemcha Mungu anapokufa, kingojeo chake hupotea,

nayo matumaini yao wapotovu hupotea.

⁸Mwongofu hutolewa katika masongano,

lakini asiyemcha Mungu hutiwa mahali pake.

⁹Mpotovu humwangamiza mwenziwe kwa kinywa chake,

lakini waongofu huokolewa kwa ujuzi wao.

¹⁰Waongofu wakipata mema, mji huwashangilia,

lakini wasiomcha Mungu wakiangamia, watu huwazomea.

¹¹Kwa mbaraka yao wanyokao mji hutukuka,

lakini kwa ajili ya vinywa vyao wasiomcha Mungu hubomolewa.

¹²Ambezaye mwenziwe amepotelewa na akili,

lakini mtu mwenye utambuzi hunyamaza.

¹³Atembeaye na kusingizia hufunua mashauri ya njama,

lakini mwenye moyo mwelekevu huficha mambo kama hayo.

¹⁴Pasipo wongozi mwema ukoo mzima wa watu huanguka;

huokoka, wenye mashauri mema wakiwa wengi.

¹⁵Aliyejitoa kuwa dhamana ya mgeni atapatwa na mabaya zaidi,

lakini akataaye kumpa mwingine mkono hukaa na kutulia.

¹⁶Mwanamke apendezaye kujipatia heshima,

lakini wakorofi hujipatia mali nyingi.

¹⁷Mtu mwenye huruma hujifanyizia mema mwenyewe,

lakini asiye na huruma hujiumiza mwili wake.

¹⁸Asiyemcha Mungu hujipatia mali za udanganyifu,

lakini apandaye yenye wongofu hujipatia mshahara wa kweli.

¹⁹Wongofu unapeleka uzimani kweli,

lakini ayakimbiliaye mabaya huenda kufani.

²⁰Wenye mioyo mapotovu humtapisha Bwana,

lakini washikao njia zisizo za ukosaji humpendeza.

²¹Ingawa wapeane mikono, mbaya hana budi kupatilizwa,

lakini wazao wao waongofu watapona.

²²Mwanamke mzuri asiye na akili

ni pete ya dhahabu puani mwa nguruwe.

²³Tamaa za waongofu hutamani mema tu,

lakini wasiomcha Mungu wanayoyangojea, huwapatia makali.

²⁴Mwingine hujipatia mali zaidi kwa kugawia wengine,

lakini mwingine huzidi kukosa mali, ijapo aziweke kupita kiasi.

²⁵Apendaye kugawia hushibishwa mwenyewe,

anyweshaye wengine naye hunyweshwa.

²⁶Anyimaye wenzake ngano watu humwapiza,

lakini mbaraka hukifia kichwa chake aziuzaye.

²⁷Atafutaye mema toka asubuhi hupendeza,

lakini atafuataye mabaya, yayo hayo humrudia mwenyewe.

²⁸Azitumainiye mali zake huangushwa nazo,

lakini waongofu huchapuka kama majani.

²⁹Awavurugaye wa nyumbani mwake hujipatia upepo, uwe fungu lake,

mpumbavu sharti amtumikie mwenye moyo mwerevu wa kweli.

³⁰Mazao ya mwongofu ni mti wa uzima,

mwerevu wa kweli huzishinda roho za watu.

³¹Tazameni! Mwongofu hupata mshahara wake katika nchi hii,

Tena itakuwaje? Asiyemcha Mungu na mkosaji asilipishwe zaidi?