Upole wake Mungu na ugumu wao Waisiraeli.

¹Haleluya! Mshukuruni Bwana, ya kuwa ni mwema! Ya kuwa upole wake ni wa kale na kale![#Sh. 107:1; 118:1; 136:1.]

²Yuko nani atakayemaliza kuyasimulia matendo ya nguvu ya Bwana? Yuko nani tena atakayeyatanganza matukuzo yake yote?

³Wenye shangwe ndio wayashikao yanyokayo nao wafanyao siku zote yaliyo yenye wongofu.

⁴Bwana, nikumbuke kwa kupendezwa nao walio ukoo wako! Unijie kunikagua, upate kuniokoa,

⁵nami nipate kuyatazama mema yao wateule wako, tena niifurahie furaha yao walio kabila lako, tushangilie pamoja nao walio fungu lako!

⁶Pamoja na baba zetu tulikosa nasi, tulipoacha kumcha Mungu tulikora manza.[#Dan. 9:5.]

⁷Baba zetu walipokuwako kule Misri, walipoyaona mataajabu yako hawakuerevuka, hawakuyakumbuka yale mema mengi, uliyawagawia, wakakataa kukutii kule baharini, kwenye Bahari Nyekundu.[#2 Mose 14:11-12.]

⁸Lakini kwa ajili ya Jina lake aliwaokoa, awajulishe uweze wake wenye nguvu.

⁹Akaikaripia Bahari Nyekundu; ndipo, ilipokupwa, akawapitisha kule vilindini, kama ni nyikani.

¹⁰Akawaokoa mikononi mwao waliowachukia, akawakomboa mikononi mwao waliokuwa adui zao.

¹¹Maji yakawafunika wao waliowasonga, kwao hakusalia hata mmoja.

¹²Ndipo, walipoyategemea maneno yake, wakamwimbia mashangilio ya kumsifu.[#2 Mose 15.]

¹³Lakini upesi sana wakayasahau matendo yake, aliyoyataka kuwaeleza hawakuyangojea.

¹⁴Walipoingiwa na tamaa kule nyikani wakazifuata, wakamjaribu Mungu huko jangwani.[#4 Mose 11:4-6.]

¹⁵Akawapa waliyomwomba, akayafurikisha, mpaka yakizichafua roho zao.

¹⁶Kisha wakamwonea Mose wivu hapo, walipopanga, hata Haroni aliyekuwa mtakatifu wake Bwana.[#4 Mose 16.]

¹⁷Nchi ikaasama, ikammeza Datani, ikawafunika nao akina Abiramu.

¹⁸Moto ukawaka kwenye mkutano wao, ndimi zake zikawateketeza wasiomcha Mungu.

¹⁹Wakafanya ndama kule Horebu, wakakitambikia hicho kinyago.[#2 Mose 32.]

²⁰Hivyo ndivyo, walivyougeuza utukufu wao kuwa kama wa ng'ombe mwenye kula majani.[#Rom. 1:23.]

²¹Wakamsahau Mungu aliyewaokoa na kufanya mambo makuu kule Misri.[#5 Mose 32:18.]

²²Nayo yaliwastaajabisha walioko katika nchi ya Hamu, nako kwenye Bahari Nyekundu yakawastusha.

²³Akawaza kuwamaliza, waishe kabisa, kama Mose, aliyemchagua, asingalijisimamisha mbele yake kwenye ule ufa ulioatuka, ayatulize machafuko yake, asiwaangamize.[#2 Mose 32:11; 5 Mose 9:25-26; Ez. 13:5.]

²⁴Wakaibeza ile nchi iliyo nzuri zaidi. hawakulitegemea Neno lake.[#4 Mose 14:2-4; 5 Mose 8:7-10.]

²⁵Katika mahema yao wakanung'unika, hawakuisikiliza sauti yake yeye Bwana.

²⁶Akauinua mkono wake, awapige, awaue nyikani,

²⁷awatapanye walio wa uzao wao kwenye wamizimu na kuwamwaga katika nchi zilizokuwa za wengine.

²⁸Kisha wakaja kugandamana na Baali Peori, wakala nyama za tambiko la mizimu;[#4 Mose 25:3.]

²⁹Ndivyo, walivyomkasirisha na matendo yao. Kisha kilipotukia kwao kipindupindu,

³⁰ndipo, Pinehasi alipotokea, akawaonya, nacho kipindupindu kikazuiliwa papo hapo.

³¹Kwa hivyo aliwaziwa kuwa mwenye wongofu kwa vizazi na vizazi kale na kale.[#1 Mose 15:6; 4 Mose 25:12.]

³²Kisha wakamchafua moyo tena kwenye maji ya Meriba, Mose naye akapatwa na mabaya kwa ajili yao.[#4 Mose 20:2-13.]

³³Kwani walipoibishia roho yake, midomo yake ilisema maneno yasiyompasa.

³⁴Kisha hawakuyamaliza makabila ya watu. Bwana aliyowaagiza kuwaua.[#5 Mose 7:1-2; 12:2-3; Amu. 1:28.]

³⁵Ila walichanganyika nao wamizimu, nayo matendo yao wakayaiga.

³⁶Navyo vinyago vyao wakavitumikia, navyo ndivyo vilivyowanasa.

³⁷Wana wao wa kiume nao wa kike wakawatoa kuwa ng'ombe za tambiko za mizimu.[#3 Mose 18:21.]

³⁸Nazo damu zisizokuwa zenye manza wakazimwaga, ni damu za wana wao wa kiume na wa kike, waliowatoa kuwa ng'ombe za tambiko za vinyago vya Kanaani; ndivyo, walivyoichafua nchi kwa kumwaga damu.

³⁹Hata wenyewe walijichafua kwa hayo matendo yao, kwa kuzifanya hizo kazi zao wakawa wagoni.

⁴⁰Ndivyo, walio ukoo wake walivyokoleza moto wa makali yake Bwana, wao waliokuwa fungu lake wakamtapisha,

⁴¹akawatia mikononi mwao wamizimu, walio wachukivu wao wakawatawala.[#Amu. 2:14.]

⁴²Adui zao wakawatesa, wakashurutishwa kuiinamia mikono yao.

⁴³Mara nyingi aliwaopoa, lakini kwa mashauri yao wakamkataa, wakabanwa kwa ajili ya manza, walizozikora.

⁴⁴Kisha akawatazama, jinsi walivyosongeka; alipoyasikia malalamiko yao, yalipoingia masikioni mwake,

⁴⁵akalikumbuka Agano lake, alilolifanya nao, kwa upole wake mwingi akawahurumia,

⁴⁶akawapatia huruma kwao wote waliowafunga.

⁴⁷Tuokoe, Bwana, uliye Mungu wetu! Tukusanye na kututoa kwenye wamizimu, tupate kulishukuru Jina lako takatifu, tuzidishe kukusifu na kukushangilia![#5 Mose 30:3; 1 Mambo 16:35.]

⁴⁸Na utukuzwe, Bwana Mungu wa Isiraeli, tangu kale hata kale!

Nayo makabila yote ya watu sharti yaitikie: Amin! Haleluya!