Mungu yuko po pote.

¹Bwana, unanichunguza, unanijua.[#Sh. 7:10; 139:23.]

²Wewe unajua kukaa kwangu na kuinuka kwangu, ukayatambua mawazo yangu, ijapo uwe mbali.[#Yer. 17:10.]

³Kma ninakwenda au ninalala, unanivumbua, njia zangu zote zimekuelekea.

⁴Kwani hakuna neno, ulimi wangu utakalolisema, usilokwisha kulijua lote, wewe Bwana.

⁵Nyuma na mbele umenifungia, ukanibandikia mkono wako.

⁶Ni ya kustaajabu, sitaweza kuyatambua, ni mambo makuu, sitaweza kuyafumbua.

⁷Nihamie wapi, Roho yako isinijie? Nikimbilie wapi, uso wako usinione?

⁸Kama ningekwenda kupaa mbinguni, wewe uko; kama ningekwenda kulala kuzimuni, wewe uko.[#Amo. 9:2.]

⁹Kama ningetumia mionzi ya jua kuwa mabawa yangu, nikaja kukaa mapeoni kwenye bahari,[#Yona 1:3.]

¹⁰huko nako mkono wako ungeniongoza, mkono wako wa kuume ungenishika.

¹¹Kama ningesema: Giza na liniguie, nao mwanga unizungukao na uwe usiku,[#Iy. 34:22.]

¹²giza nalo lisingekuwa lenye weusi machoni pako; maana usiku huangaza kama mchana huko uliko, kwako giza na mwanga huwa sawasawa.[#Yak. 1:17.]

¹³Kwani wewe ndiwe uliyeyaumba mafigo yangu, ndiwe uliyeniunga tumboni mwa mama.

¹⁴Ninakushukuru, kwani ni ajabu litishalo, jinsi nilivyotengenezwa, vilivyo kazi zako hustaajabisha kweli, roho yangu inavijua sanasana.

¹⁵Mifupa yangu haikuwa imefichika, usiione, nilipofanyiziwa mahali palipojificha, maana nilitengenezwa mbali sana ndani ya nchi.[#Mbiu. 11:5.]

¹⁶Nilipokuwa mimba tumboni mwa mama, macho yako yaliniona, nazo siku zangu zote zilikuwa zimeandikwa kitabuni mwako hapo, zilipoambiwa, zitokee; ilikuwa hapo, hata moja yao ilipokuwa haijawa bado.[#Iy. 14:5.]

¹⁷Lakini kwangu ni vigumu sana kuyajua mawazo yako, Bwana, nikiyachanganya, yako na nguvu za kunishinda.[#Yes. 55:9.]

¹⁸Yangekuwa mengi kuliko mchanga, kama ningeweza kuyahesabu. Ningaliko kwako bado ninapoamka.[#Sh. 40:6; 63:7.]

¹⁹Nakuomba, Mungu, uwaue wasiokucha, wenye manza za damu waondoke kwangu;

²⁰ndio wanaokutaja tu, wapate kuuficha ukorofi wao; kwa kuwa wabishi wako, hujivuna bure.

²¹Wachukizwao na wewe, Bwana, nisiwachukie? Nao wakuinukiao nisitapishwe nao?

²²Ninawachukia kwa uchukivu usiosaza hata kidogo, ninawatazama kuwa adui zangu mimi.

²³Nichunguze, Mungu, uujue moyo wangu! Nijaribu, uyajue nayo mawazo, niliyo nayo![#Sh. 139:1.]

²⁴Tazama, kama nimeshika njia iendayo kwenye maumivu, unishikishe njia iendayo kwenye kuwapo kale na kale!