Kuutukuza msaada wa Mungu.

¹Haleluya! Mshangilie Bwana, roho yangu!

²Na nimshangilie Bwana siku zangu za kuwapo! Na nimwimbie Mungu wangu na kupiga zeze nikingali nipo!

³Msiegemee wakuu! Nao ni wana wa watu, hawawezi kuokoa.[#Sh. 118:8-9; Yer. 17:5.]

⁴Roho ya mtu ikimtoka, inarudi mchangani; siku ile mizungu yake itakuwa imepotea.[#1 Mose 3:19; Mbiu. 12:7.]

⁵Mwenye shangwe ni mtu wa Mungu wa Yakobo, maana humsaidia, akimngojea Bwana, Mungu wake.

⁶Yeye ndiye aliyezifanya mbingu na nchi, hata bahari navyo vyote vilivyomo. Yeye ndiye ashikaye welekevu na kuufuata kale na kale.

⁷Yeye ndiye anayewaamulia waliokorofishwa, yeye ndiye anayewashibisha wenye njaa.

Yeye Bwana ndiye anayewafungua waliofungwa,

⁸yeye Bwana ndiye anayefumbua macho ya vipofu, yeye Bwana ndiye anayewainua walioinamishwa, yeye Bwana ndiye anayewapenda waongofu,[#Sh. 145:14.]

⁹yeye Bwana ndiye anayewaangalia nao wageni, nao waliofiwa na wazazi, hata wajane huwaegemeza, lakini njia yao wasiomcha huipoteza.[#2 Mose 22:21-22; Sh. 10:14; 68:6.]

¹⁰Bwana anashika ufalme kale na kale, Mungu wako, Sioni, ni wa vizazi na vizazi. Haleluya![#Sh. 93:1.]