Maumivu na utukufu wa mwongofu.

¹*Mungu wangu, Mungu wangu, mbona umeniacha? Wokovu wangu uko mbali, kwa hiyo napiga kite.[#Mat. 27:46.]

²Mungu wangu, mchana kutwa nakuita, nawe hikuniitikia; usiku nao hapana, ninaponyamaza.

³Nawe ndiwe uliye mtakatifu, unakaa na kukuzwa nao Waisiraeli.

⁴Wewe nidwe, waliyekutegemea baba zetu, napo walipokutegemea, ukawaopoa.

⁵Wewe ndiwe, waliyekulalamikia, wakaponywa, wewe ndiwe, waliyekutegemea, tena hawakupatwa na soni.[#Sh. 25:2-3.]

⁶Lakini mimi ni kidudu, si mtu bado, watu wakanifyoza wote na kunibeza.[#Sh. 69:8; Yes. 53:3; Mat. 27:39-44.]

⁷Wote wanionao hunibeua, hukuza vinywa na kutingisha vichwa, kisha husema:[#Iy. 16:4,10.]

⁸Umsukumie Bwana! Na amponye! Kama anapendezwa naye, na amwokoe!

⁹Kwani ndiwe uliyenitoa tumboni mwa mama, ukaniegemeza maziwa yake mama yangu.[#Sh. 71:6.]

¹⁰Wewe ndiwe, niliyetupiwa tangu hapo, nilipozaliwa; tangu hapo, nilipotoka tumboni mwa mama, wewe u Mungu wangu,

¹¹Kwa kuwa masongano yako karibu, usinikalie mbali! Kwani atakayenisaidia hayuko.

¹²Ng'ombe waume wengi wamenizunguka, nao nyati wa Basani wakanizingazinga.

¹³Wakaasama vinywa vyao, wanimeze, wakawa kama simba anyafuaye na kunguruma.

¹⁴Nafanana na maji yamwagwayo, mifupa yangu imeteguka yote, moyo wangu ni kama nta iyeyukayo humu mwangu ndani.[#Luk. 22:44.]

¹⁵Nguvu yangu imekupwa, nikavunjika kama gae, nao ulimi wangu umegandamana na ufizi wangu, namo uvumbini mwa kufa ndimo, ulimonilaza.[#Yoh. 19:28.]

¹⁶Kwani walikuwako mbwa, wakanizunguka, kikosi cha wabaya kikanijia pande zote, kisha wakanitoboa maganja na nyayo.[#Yoh. 20:25-27.]

¹⁷Naweza kuihesabu mifupa yangu yote, nao wanavitazama tu na kunitumbulia macho.

¹⁸Wakajigawanyia nguo zangu, nalo vazi langu zuri wakalipigia kura.[#Yoh. 19:24.]

¹⁹Nawe, Bwana, usiwe mbali! Kwa hivyo, unavyonishupaza, piga mbio, unisaidie!*

²⁰Iopoe roho yangu kwenye panga! Hiyo iliyo mali yangu peke yake iopoe kwenye mbwa![#Sh. 35:17.]

²¹Namo kinywani mwa simba niokoe, kwani nilipokuwa penye pembe za nyati, uliniitikia.

²²Nitawasimulia ndugu zangu mambo ya Jina lako, nitakuimbia wewe katikati yao walio wateule.[#Sh. 9:15; Yoh. 20:17; Ebr. 2:12.]

²³Ninyi mmwogopao Bwana, mkuzeni! Vizazi vyote vya Yakobo na vimtukuze! Vizazi vyote vya Isiraeli na vimwangukie!

²⁴Kwani hakuubeza unyonge wake mnyonge, wala moyo wake hakuuchafukia, wala hakuuficha uso wake, asimwone, ila alimsikia, alipomlilia.[#Sh. 9:13; Ebr. 5:7.]

²⁵Wewe nidwe, nitakayekukuza, makundi mengi yakusanyikapo; nayo niliyomwagia nitayalipa mbele yao wamwogopao.[#Sh. 116:14.]

²⁶Wanyonge sharti wale, hata washibe; sharti wamshangilie Bwana, wao wamtafutao, mioyo yenu sharti iwepo kale na kale.[#Sh. 69:33.]

²⁷Hivyo watavikumbuka na kumrudia Bwana mapeoni pote pa nchi; yatakutambikia na kukuangukia makabila yote ya wamizimu.

²⁸Kwani ufalme ni wake, yeye Bwana, anayewatawala wamizimu ndiye yeye.

²⁹Wote walio wanene wa nchi watakula na kumwangukia, wote washukao uvumbini huinamia nchi mbele yake yeye, wasioweza kujipauzima ndio wao.[#Fil. 2:10.]

³⁰Vizazi vyao navyo vitamtumikia Bwana, mambo ya Bwana yatasimuliwa kwao vijukuu.[#Yes. 53:10.]

³¹Watakuja, wautangaze wongofu wake kwao watakaozaliwa, kwamba: Ndiye aliyevifanya![#Sh. 110:3; Yoh. 19:30.]