Kujiombea wokovu.

¹Kwa kuwa mimi nimeendelea pasipo kosa, niamulie, Bwana! Bwana ndiye, nimwegemeaye pasipo kutikisika.

²Nijaribu, Bwana, na kunipima, unichuje mafigo, hata moyo![#Sh. 17:3.]

³Kwani wema wako uko machoni pangu, nami huendelea kukuwia mwelekevu.

⁴Sikai pamoja na watu walio wapuzi tu, wala walio wenye kinyume siingii mwao.[#Sh. 1:1.]

⁵Ninachukizwa na mkutano wao wafanyao mabaya, wala sikai pamoja nao wambezao Mungu.

⁶Nitainawa mikono yangu kwa maji yaondoayo makosa, kisha nitatokea kuzunguka mezani pako, Bwana;[#Sh. 122.]

⁷ndipo, nitakapozipaza sauti, nikushukuru nikiyasimulia makuu yako yote ya kustaajabu.

⁸Bwana, napapenda hapo, Nyumba yako ilipo, ndipo mahali, unapokaa utukufu wako.[#Sh. 27:4.]

⁹Usiikusanye roho yangu pamoja nazo zao wakosaji! Usininyime uzima pamoja nao wauao wenzao!

¹⁰Mikononi mwao yamo mapotovu, mikono yao ya kuume imejaa mapenyezo.

¹¹Lakini mimi ninaendelea pasipo kosa; kwa kunihurumia nikomboe!

¹²Miguu yangu huenda paliponyoka, nimtukuze Bwana katika mikutano.[#Sh. 22:23.]