Kilio cha mtu aliyekorofishwa na wachukivu wenye nguvu.

¹Niopoe, Mungu wangu, mikononi mwao walio adui zangu, ukinikingia walioniinukia, wasinifikie![#1 Sam. 19:11.]

²Niopoe mikononi mwao wafanyao mapotovu! Niokoe mikononi mwao wauao wenzao!

³Kwani unaona, jinsi wanavyoivizia roho yangu, wenye nguvu wamekusanyika, wanikamate; lakini hakuna, Bwana, nilichowapotolea, wala nilichowakosea.

⁴Kweli hakuna mabaya, niliyowafanyizia, tena wanapiga mbio, wajiweke tayari. Amka, unifikie, uwaone![#Sh. 44:24.]

⁵Nawe Bwana Mungu, uliye Mwenye vikosi, uliye Mungu wa Isiraeli, inuka, uwapatilize wamizimu wote! Usiwahurumie hata mmoja wao waliokuacha kwa upotovu tu!

⁶Jioni hurudi na kulia kama mbwa; ndivyo, wanavyozungukazunguka humu mjini.[#Sh. 59:15.]

⁷Ukiwaangalia, vinywani mwao hububujika mabaya, namo midomoni mwao zimo panga; huwaza kwamba: Yuko nani atakayetusikia?

⁸Lakini wewe Bwana, unawacheka, wamizimu wote unawabeza.[#Sh. 2:4.]

⁹Wakikaza nguvu, nitakutazamia wewe; kwani wewe, Mungu, u ngome yangu.

¹⁰Mungu wangu aliye mwenye upole hunijia mbele, yeye Mungu hunipa kuwashangilia wao walionisonga.[#Sh. 54:9.]

¹¹Kusudi walio ukoo wangu wasivisahau, usiwaue kabisa! Wapoteze tu kwa nguvu yako, waje kutangatanga! Kisha uwakumbe, waje kuzimuni! Wewe Bwana, u ngao yangu.

¹²Vinywa vyao hukosa, midomo yao inaposema, sharti wanaswe na majivuno yao wakizidi kuapiza na kuogopa!

¹³Waishilize kwa kuwachafukia! Waishilize, watoweke! Hivyo ndivyo, yatakavyojulikana nako mapeoni kwa nchi, ya kuwa Mungu ndiye awatawalaye wa Yakobo.

¹⁴Jioni hurudi na kulia, kama ni mbwa; ndivyo, wanavyozungukazunguka humu mjini.[#Sh. 59:7.]

¹⁵Wao sharti waje kutangatanga na kutafuta chakula, kisha sharti walale pasipo kushiba!

¹⁶Ndipo, mimi nitakapoziimbia nguvu zako, asubuhi nitaushangilia upole wako, kwani umekuwa ngome yangu na kimbilio langu hapo, niliposongeka.

¹⁷Wewe uliye nguvu zangu, nitakuimbia, kwani wewe, Mungu, u ngome yangu, u Mungu wangu mwenye upole.