Kumshukuru Mungu na kujuta.

¹Kwa mwimbishaji, wa kuimba kama wimbo wa wagemaji. Wa Asafu.

²Mpigieni Mungu shangwe, maana ni nguvu yetu! Mungu wa Yakobo mpigieni vigelegele!

³mwimbieni nyimbo za kumshukuru na kupiga patu! Pigeni nayo mazeze yaliayo vizuri pamoja na mapango!

⁴Pigeni mabaragumu, mwezi ukiandama! Hata penye mbalamwezi! Ndio sikukuu yetu.[#3 Mose 23:24,34.]

⁵Kwani Isiraeli alivyoagizwa, ndivyo hivyo, navyo ndivyo vimpasavyo Mungu wa Yakobo;

⁶ndio ushuhuda, aliouweka kwao wa Yosefu, alipotokea katika nchi ya Misri, aipige.

Hapo ndipo, niliposikia msemo, niliokuwa sijaujua:

⁷Huo mzigo wa begani kwake nimeuondoa, mikono yake ikaondoka kwenye makapu ya kuchukulia watu.[#2 Mose 14:10-19.]

⁸Uliponililia katika masongano, nimekuponya, nikakuitikia na kujificha katika mawingu yenye ngurumo, kwenye Maji ya Magomvi nikakujaribu.[#2 Mose 17:7; 4 Mose 20:13.]

⁹Sikilizeni, mlio wa ukoo wangu, niwaonye! Isiraeli, sharti unisikie!

¹⁰Kwako kusiwe tena na mungu mgeni! Wala usitambikie mungu wa nchi nyingine![#2 Mose 20:2-3.]

¹¹Mungu wako, aliyekutoa katika nchi ya Misri ni mimi Bwana; kiasame kinywa chako, nikijaze![#Sh. 119:131; Mat. 5:6.]

¹²Lakini walio ukoo wangu hawakuisikia hiyo sauti yangu, naye Isiraeli hakutaka kunifuata mimi.

¹³Nikawaacha, waufuate ugumu wao wa mioyo yao, wajiendee na kuyafanya mashauri yao.[#Tume. 14:16.]

¹⁴Kama wangekuwa ukoo wangu, wangenisikia, kama wangekuwa Waisiraeli, wangezishika njia zangu,

¹⁵nami ningewainamisha upesi adui zao, mkono wangu ungewarudia wao waliowasonga.

¹⁶Wachukivu wake Bwana wangemnyenyekea, lakini wao siku zao zingekuwa za kale na kale.

¹⁷Ningewapa ngano zilizo nzuri kupita zote, wazile zizo, ningewapa hata asali za miambani, wazile, mpaka washibe.[#5 Mose 32:13.]