Kuomba msaada vitani.

¹Mungu usijinyamazie tu! Wala usiache kujibu! Usitulie tu, wewe Mungu!

²Kwani tazama, adui zako wanafanya fujo! Wachukivu wako wanainua vichwa!

³Wanakula njama ya kuwaangamiza walio ukoo wako, wanawapigia mashauri mabaya wao, uliowaficha.[#Sh. 27:5; 35:20.]

⁴Wanasema: Njoni, tuwang'oe, kabila lao life! Jina la Isiraeli lisikumbukwe tena!

⁵Kweli mioyo yao wote ililipatana neno hili moja, wakafanya maagano, wakupelekee vita.

⁶Ni wao wakaao katika mahema: Waedomu na Waisimaeli, Wamoabu nao wao walio Wahagri,

⁷tena Wagebali na Waamoni, nao Waamaleki, Wafilisti pamoja nao wakaao Tiro.

⁸Katika hilo shauri lao wakajitia nao Waasuri; nao ndio wanaowatumikia wana wa Loti kuwa mikono yao.

⁹Kama ulivyowafanyizia Wamidiani, wafanyizie nao, au kama ulivyomfanyizia Sisera na Yabini kule mtoni kwa Kisoni![#Amu. 4:15,21,23; 7:22.]

¹⁰Kule Endori ndiko, walikoangamizwa, wakawa mbolea tu ya kuotesha mchanga.

¹¹Hivyo, ulivyomfanyizia Orebu na Zebu vifanyizie wakuu wao! Vile vya Zeba na Salmuna, vifanyizie wafalme wao wote![#Amu. 7:25; 8:21.]

¹²Ndio waliosema: Na tuyateke makao yake Mungu, yawe yetu sisi![#Sh. 74:8.]

¹³Mungu wangu, wafanye kuwa mavumbi yachukuliwayo na kimbunga au kuwa makapi, yakipeperushwa na upepo,

¹⁴wawe kama moto unaochoma mwitu, au kama ndimi za moto ziwashazo milima!

¹⁵Vivyo hivyo uwakimbize kwa nguvu zako zilizo za kimbunga! Uwastushe, wazimie kwa nguvu zako zilizo za chamchela!

¹⁶Nyuso zao sharti ziwaive kwa kutwezwa, mpaka walitafute Jina lako, wewe Bwana.

¹⁷Sharti wapatwe na soni pamoja na mastuko kale na kale! Sharti waumbuliwe, mpaka waangamie!

¹⁸Ndivyo, watu watakavyolitambua Jina lako kuwa Bwana, kwa kuwa wewe peke yako u mkuu katika nchi zote.[#Hos. 12:6.]