Ufunuo 17

Mji wa Babeli ni mgoni mkubwa wa kike.

¹Pakaja mmoja wao wale malaika saba wenye vile vyano saba, akasema nami kwamba: Njoo, nitakuonyesha hukumu yake yule mgoni mkubwa wa kike akaaye juu ya maji mengi.[#Ufu. 15:1.]

²Yeye ndiye, ambaye wafalme wa nchi walifanya ugoni naye, nao wakaao nchini wakijilevya na mvinyo ya ugoni wake.[#Ufu. 14:8; 18:3.]

³Aliponipeleka kiroho nyikani, nikaona mwanamke aliyepanda nyama mwekundu aliyejaa majina yenye matusi, naye alikuwa na vichwa saba na pembe kumi.[#Ufu. 13:1.]

⁴Yule mwanamke alikuwa amevaa nguo nyekundu za kifalme, tena alikuwa amejipamba na dhahabu na kito chenye kima kikuu na ushanga wa lulu. Mkononi mwake alishika kinyweo cha dhahabu kilichojaa machukizo na machafu ya ugoni wake.[#Yer. 51:7; Ez. 28:13,16.]

⁵Tena pajini pake palikuwa pameandikwa jina lisilofumbulika: Mji mkubwa wa Babeli, mama ya wagoni na ya machukizo ya nchini.[#Ufu. 14:8; 16:19; Dan. 4:27; 2 Tes. 2:7.]

⁶Ndipo, nilipomwona yule mwanamke, alivyolewa kwa damu za watakatifu na kwa damu za mashahidi wa Yesu. Nami nilipomwona nikastaajabu mastaajabu makubwa mno.[#Ufu. 18:24.]

Maana yao vichwa saba na pembe kumi.

⁷Kisha malaika akaniambia: Kwa nini unastaajabu? Nitakuambia fumbo la mwanamke na la nyama mwenye vichwa saba na pembe kumi anayemchukua.

⁸Yule nyama, uliyemwona, alikuwapo kale, naye sasa hayupo; lakini atatoka tena kuzimuni, aende kwenye maangamizo. Ndipo, wakaao nchini wasioandikwa majina yao katika kitabu cha uzima tangu hapo, ulimwengu ulipoumbwa, watakapostaajabu, watakapomwona huyo nyama aliyekuwapo kale, ya kuwa sasa hayupo, lakini halafu atakuwapo tena.[#Ufu. 3:5; 13:1-3.]

⁹Hapo ndipo, panapotakwa werevu wa kweli: vile vichwa saba ni milima saba, ndiyo, yule mwanamke anayokalia juu; nayo ni wafalme saba.[#Ufu. 13:1,18.]

¹⁰Watano wamekwisha kuanguka; mmoja yuko, naye mwingine hajaja bado. Huyo atakapokuja, sharti akae kidogo.

¹¹Yule nyama aliyekuwapo kale, aliyetoweka sasa, ndiye yeye wa nane. Naye ni mwenye mwenzao wale saba, naye anakwenda kwenye maangamizo.[#Ufu. 17:8; 19:20.]

¹²Nazo zile pembe kumi, ulizoziona, ni wafalme kumi, wasiopewa bado ufalme, ila watapewa nguvu kama za wafalme saa moja pamoja na yule nyama.[#Ufu. 13:1; Dan. 7:20,24.]

¹³Hao neno lao ni moja la kumpa yule nyama uwezo wao na nguvu zao.

¹⁴Ndio watakaopiga vita na Mwana kondoo, lakini Mwana kondoo atawashinda, kwani yeye ni Bwana wa mabwana na Mfalme wa wafalme, anao waitwao, nao wachaguliwao, nao wamtegemeao.[#Ufu. 19:14,16.]

¹⁵Kisha akaniambia: Yale maji, uliyoyaona, yule mgoni wa kike anayoyakalia, ndiyo makabila ya watu na makutano na wamizimu na misemo.[#Ufu. 17:1; Yes. 8:7; Yer. 47:2.]

¹⁶Nazo zile pembe kumi, ulizoziona, pamoja na yule nyama ndio watakaomchukia yule mgoni wa kike na kumpokonya yote, uchi wake uonekane. Ndio watakaozila nyama za mwili wake, lakini mwenyewe watamteketeza motoni.[#Ufu. 17:12-13; 18:8.]

¹⁷Kwani Mungu aliwatia mioyoni mwao kuyafanya, ayatambuayo yeye, wapatane kumpa yule nyama ufalme wao, mpaka maneno ya Mungu yatakapotimizwa.[#Ufu. 10:7.]

¹⁸Tena yule mwanamke, uliyemwona, ndio ule mji mkubwa ulio na ufalme wa wafalme wa nchini.[#Ufu. 18:10.]