Kuwavumilia wanyonge.

¹Aliye mnyonge wa kumtegemea Bwana mpokeeni pasipo kubishana naye mawazo ya moyo![#Rom. 15:1; 1 Kor. 8:9.]

²Mwingine anayategemea ya kwamba: Vyote vinaliwa; mwingine aliye mnyonge hula maboga tu.[#1 Mose 1:29; 9:3.]

³Mwenye kula asimbeze asiyekula! Wala asiyekula asimwumbue mwenye kula! Kwani Mungu amempokea.[#Kol. 2:16.]

⁴Wewe u nani ukimwumbua mtumishi wa mwingine? Akiwa amesimama au akiwa ameanguka, yote humfanyizia Bwana wake mwenyewe. Lakini atainuliwa, kwani Bwana anaweza kumwinua.[#Mat. 7:1; Yak. 4:11-12.]

⁵Mwingine huchagulia siku za kuzitakasa, mwingine huzitakasa siku zote. Kila mtu sharti afulize kuyafuata, aliyoyatambua yeye kuwa ya kweli![#Gal. 4:10.]

⁶Anayezishika siku humshikia Bwana; naye asiyezishika hazishiki kwa ajili yake Bwana. Naye anayekula humlia Bwana, kwani humshukuru Mungu. Naye asiyekula hali kwa ajili yake Bwana, maana naye humshukuru Mungu.

⁷Kwani kwetu hakuna anayejikalia mwenyewe, wala hakuna anayejifia mwenyewe.

⁸Kwani tunapokaa humkalia Bwana, tena tunapokufa humfia Bwana. Basi, ikiwa twakaa au ikiwa twafa, sisi tu wa Bwana.[#Gal. 2:20; 1 Tes. 5:10.]

⁹Kwani kwa hiyo Kristo alikufa, akawa mzima tena, apate kuwatawala waliokufa nao wanaoishi.*

¹⁰Lakini wewe unamwumbuaje ndugu yako? Au wewe unambezaje ndugu yako? Kwani sisi sote tutatokezwa mbele ya kiti cha uamuzi cha Mungu.[#Mat. 25:31-32; Tume. 10:42; 17:31; 2 Kor. 5:10.]

¹¹Kwani imeandikwa: Bwana anasema:

Kwa hivyo, nilivyo Mwenye uzima, wote watanipigia magoti,

nazo ndimi zote zitamwungama Mungu.

¹²Basi, kwa hiyo sisi sote kila mmoja atajisemea mwenyewe mbele ya Mungu.[#Gal. 6:5.]

Msimkwaze ndugu!

¹³Basi, tusiumbuane wenyewe tena, ila mjue, ya kuwa ni kuumbua, mtu akimtegea ndugu yake, ajigonge au ajikwae!

¹⁴Nimeyajua, nikayashika kabisa moyoni kwa kuwa na Bwana Yesu, ya kuwa: hakuna kilicho chenye mwiko hivyo, kilivyo; lakini mtu akikiwazia kuwa chenye mwiko, basi, kwake yeye ni chenye mwiko.[#Mat. 15:11; Tume. 10:15; 1 Kor. 10:30; Tit. 1:15.]

¹⁵Lakini ndugu yako akisikitishwa, wewe ukila, basi, umekwisha kuuacha upendo. Tena ukila usimponze mwenzio, ambaye Kristo alikufa kwa ajili yake.[#1 Kor. 8:11-13.]

¹⁶Yaliyo mema kwenu yaangalieni, yasibezwe![#Tit. 2:5.]

¹⁷Kwani ufalme wake Mungu sio kula na kunywa, ila wongofu na utengemano na ushangilio unaopatikana katika Roho takatifu.[#Luk. 17:20; Ebr. 13:9.]

¹⁸Kwani anayemtumikia Kristo na kuyatenda mambo haya humfalia Mungu, tena hupendwa na watu.

¹⁹Basi, kwa hiyo tukaze kuyafuata mambo yanayopatanisha, ni yaleyale yanayotujenganisha![#Rom. 12:18; 15:2.]

²⁰Usiitengue kazi ya Mungu kwa ajili ya chakula! Kweli, vyote hutakata; lakini mtu akivila na kujikwaa, vimekwisha kumponza.[#Rom. 14:14.]

²¹Ni vizuri, usile nyama, wala usinywe pombe, wala usifanye cho chote kinachomkwaza ndugu yako.[#1 Kor. 8:13.]

²²Wewe unayoyategemea moyoni, yategemee hata mbele ya Mungu! Mwenye shangwe ni yule asiyejipatia hukumu kwa ajili yao yale, aliyoyaona kuwa ya kufaa.

²³Lakini mtu akila mwenye mashaka amekwisha kujipatia hukumu, kwani hakula kwa kumtegemea Mungu. Nayo yote, mtu anayoyafanya pasipo kumtegemea Mungu, ndiyo makosa.[#Tit. 1:15.]