Makosa yao Wayuda na wamizimu.

¹*Kwa hiyo huna la kujikania, wewe uwaye yote, ukiumbua wengine. Kwani kwa hilo, unalomwumbua mwingine, unajionea patilizo mwenyewe. Kwani wewe muumbuaji unayafanya yayo hayo.[#Mat. 7:2; Yoh. 8:7.]

²Nasi twajua, ya kuwa wenye mambo kama hayo Mungu hwaumbua kweli, wajulike, walivyo.

³Lakini wewe ukiumbua wengine walio wenye mambo unayoyafanya, kisha unayafanya yaleyale, unajiwaziaje, ya kwamba wewe utaipona hukumu ya Mungu?

⁴Au unaubeza wema na uvumilivu na ungojevu wake mwingi? Hujui, ya kuwa wema wa Mungu unakuonyesha njia ya kujuta?[#2 Petr. 3:15.]

⁵Lakini wewe mwenye moyo mgumu unaokataa kujuta unajilimbikia mwenyewe makali, yakupate siku ya makali, hukumu inayopasa itakapofunuliwa na Mungu.

⁶Ndipo, atakapomlipa kila mtu, kama matendo yake yalivyo:[#Mat. 16:27.]

⁷wale wasiochoka kufanya mema kwa kutafuta utukufu na heshima na mengine yasiyooza, hao watapewa uzima wa kale na kale.[#Yoh. 5:29; 2 Kor. 5:10.]

⁸Lakini wale wachokozi wanaokataa kuyatii yaliyo ya kweli kwa kupendezwa na upotovu, hao watapata makali yenye moto.[#2 Tes. 1:8.]

⁹Maumivu na masongano yataupata moyo wa kila mtu anayefanya maovu, kwanza Wayuda, kisha Wagriki nao.[#Rom. 1:16; 3:9.]

¹⁰Lakini utukufu na heshima na utengemano ndio, atakaoupata kila anayefanya mema, kwanza Wayuda, kisha Wagriki nao.

¹¹Kwani Mungu hautazami uso wa mtu.*[#Tume. 10:34; 1 Petr. 1:17.]

¹²Kwani wote waliokosa wasipoyajua Maonyo huangamia tu pasipo Maonyo, nao wote waliokosa wakiyajua Maonyo hao watahukumiwa kwa Maonyo.

¹³Kwani walio wenye wongofu machoni pa Mungu sio wenye kuyasikia Maonyo, ila wenye kuyafanya Maonyo ndio watakaopewa wongofu.[#Mat. 7:21; 1 Yoh. 3:7.]

¹⁴Kwani wamizimu wasiopata maonyo wakiyafanya mambo ya Maonyo wenyewe, basi, hao wasiopata maonyo mioyo yao ndiyo iliyokuwa maonyo yao.[#Tume. 10:35.]

¹⁵Hao wanaonyesha, ya kuwa kazi, Maonyo yanayoitaka, imeandikwa mioyoni mwao; nayo, wanayoyajua mioyoni, huwashuhudia, ndiyo mawazo ya mioyo yanayoinukiana, nayo mengine yanayokaniana.[#Rom. 1:32.]

¹⁶Haya yatajulikana siku ile, Mungu atakapompa Kristo Yesu kuyaumbua yaliyofichwa na watu. Huu ndio Utume mwema, niliopewa.[#Mbiu. 12:14.]

Wayuda hawayashiki Maonyo.

¹⁷Angalia, wewe unayeitwa Myuda, unayatumia Maonyo ya kupumzikia ukijivunia kwamba: Mungu ninaye!

¹⁸Kweli unayatambua, anayoyataka, kisha ukayatenga yaliyo mepesi nayo yaliyo magumu, kwa kuwa umefundishwa mambo ya Maonyo.

¹⁹Hivyo unajiwazia mwenyewe kuwa kiongozi wa vipofu na mwanga wao wakaao gizani,[#Mat. 15:14.]

²⁰ukataka kuonya wajinga na kufundisha wachanga, kwani Maonyo yalikuwa yamekuonyesha, jinsi mtu anavyopata utambuzi na ukweli.[#2 Tim. 3:5.]

²¹Je? Wewe unayefundisha mwingine, hujifundishi mwenyewe? Je? Wewe unayetangaza, wasiibe, huibi mwenyewe?[#Sh. 50:16-21; Mat. 23:3-4.]

²²Je? Wewe unayesema, wasizini, huzini mwenyewe? Je? Wewe unayechukizwa na vinyago vya kutambikia, huvinyang'anyi nyumbani mwao mwa kuombea?

²³Je? Wewe, unayejivunia kwamba: Ninayo Maonyo, humbezi Mungu kwa kuyakosea Maonyo yake?

²⁴Kwani Jina lake Mungu hutukanwa kwa wamizimu kwa ajili yenu ninyi, kama ilivyoandikwa.[#Yes. 52:5; Ez. 36:20.]

Uyuda wa kweli.

²⁵Kwani kutahiri kunafaa, kama unayashika Maonyo. Lakini ukiyakosea Maonyo, kutahiriwa kwako ni kwa bure, utakuwa tena kama mtu asiyetahiriwa.[#Yer. 4:4; 9:24-25.]

²⁶Basi, asiyetahiriwa akiyafuata maongozi ya Maonyo hatawaziwa kuwa kama mwenye kutahiriwa, ijapo hakutahiriwa?[#Gal. 5:6.]

²⁷Kwa hiyo mtu asiyetahiriwa aliye vivyo hivyo, alivyozaliwa, akiyatimiza Maonyo atakuumbua wewe uliye mwenye Maandiko na mwenye tohara, ukiwa unayakosea Maonyo

²⁸Kwani Myuda si yeye anayejulikana kwa nje, ya kuwa ni Myuda, nako kutahiriwa siko kule kunakojulikana nje mwilini.[#Yoh. 8:39.]

²⁹Lakini aliye Myuda huko ndani kusikoonwa na watu, yeye ni Myuda. Nako kutahiriwa, kama ilivyoandikwa, siko; kwenye kweli ndiko kutahiriwa kwa moyo kunakowezekana kwa nguvu ya Roho; nako kutasifiwa, lakini siko kwa watu, ila kwa Mungu[#5 Mose 30:6; Kol. 2:11.]