Kuoshwa kwa kuzaliwa mara ya pili.

¹Wakumbushe wajinyenyekeze penye wakuu na wenye nguvu, wamtii na kujiweka tayari kufanya kazi njema zo zote![#Rom. 13:1; 1 Petr. 2:13.]

²Wasitukane mtu, wala wasichokoze wenyewe, ila wajionyeshe kuwa wenye mambo yapasayo, wawaendee watu wote kwa upole kabisa![#Fil. 4:5.]

³Kwani hata sisi kale tulikuwa wapumbavu waliokataa kutii; tulikuwa tumepotea, tukazitumikia tamaa nyingi zilizotupendeza, tukaendelea kuwa wenye maovu na wivu na machukivu ya kuchukiana sisi kwa sisi.[#1 Kor. 6:11; Ef. 2:2; 5:8.]

⁴*Ndipo, ulipotutokea utu wake mwokozi na Mungu wetu aliyetupenda sisi watu,[#Tit. 2:11.]

⁵akatuokoa sisi, lakini si kwa sababu ya matendo ya wongofu, tuliyofanya sisi; ila kwa huruma yake yeye alituponya akituosha maji ya kutuzaa mara ya pili, tukawa watu wapya kwa kupewa Roho takatifu;[#Yoh. 3:5; Ef. 2:8-9; 5:26.]

⁶hii ndiyo aliyotumiminia, ikatifurikia, alipomtuma mwokozi wetu Yesu Kristo.[#Yoe. 2:28.]

⁷Kwa mema yake yeye, aliyotugawia, tukapata wongofu, tukawekewa nasi urithi wetu penye uzima wa kale na kale, kama tunavyongojea.*

⁸Hili neno ni la kweli. Nami nataka, mambo haya uyafundishe kwa nguvu ya kuwashinda, maana wale waliomtegemea Mungu wazitunze kazi zao, ziwe nzuri kuliko za wengine. Haya ni mazuri, nayo huwafalia watu.[#Tit. 3:14.]

⁹Lakini mabishano ya upuzi na mambo ya wakale na machokozi na magomvi ya miiko uyaache! Kwani hayafai kitu, ni ya bure tu.[#1 Tim. 4:7.]

¹⁰Mtu mzushi mwonye mara moja, hata mara mbili! Asipoonyeka, mwepuke![#Mat. 18:15-17; 2 Yoh. 10.]

¹¹Ujue: Mtu aliye hivyo amekwisha kutengeka, tena hujipatia hukumu mwenyewe kwa kukosa kwake.[#1 Tim. 6:4-5.]

Kuaga.

¹²Nitakapomtuma kwako Artema au Tikiko, jikaze kuja kwangu huku Nikopoli! Kwani ndiko, ninakotaka kuzimaliza siku hizi za kipupwe.[#2 Tim. 4:12.]

¹³Akina Zena aliye mjuzi wa Maonyo na Apolo watume upesi, waende zao; lakini uwatunzie vema, wasikose yawapasayo njiani![#Tume. 18:24; 1 Kor. 3:5-6.]

¹⁴Hapo wa kwetu nao wajifunze kufanya kazi zilizo nzuri kuliko za wengine! Ikiwa wanatakwa, na wapatie wengine yatakayowatunza, wasifanane na miti isiyozaa![#Tit. 2:14; Mat. 7:19; Ef. 4:28.]

¹⁵Wanakusalimu wote walio pamoja nami. Wasalimu wanaotupenda kwa kuwa wenye kumtegemea Mungu! Upole uwakalie ninyi nyote! Amin.