Agano la Mungu na Abramu

¹Baada ya mambo hayo neno la BWANA likamjia Abramu katika njozi, likinena, Usiogope, Abramu, Mimi ni ngao yako, na thawabu yako itakuwa kubwa sana.[#Mwa 46:2; Isa 41:10; Zab 58:11; 84:11; Ebr 11:6]

²Abramu akasema, Ee Bwana MUNGU, utanipa nini, nami naenda zangu hali sina mtoto, na atakayeimiliki nyumba yangu ni huyu Eliezeri, Mdameski?

³Abramu akasema, Tazama, hukunipa uzao, na mtumwa aliyezaliwa nyumbani mwangu ndiye mrithi wangu.

⁴Nalo neno la BWANA likamjia likinena, Huyu hatakurithi, bali utakayemzaa ndiye atakayekurithi.[#Mwa 17:16; 2 Sam 7:12]

⁵Akamtoa nje, akasema, Tazama juu mbinguni kisha uzihesabu nyota, kama unaweza kuzihesabu. Akamwambia, Ndivyo utakavyokuwa uzao wako.[#Rum 4:18; Ebr 11:12; Zab 147:4; Kut 32:13]

⁶Akamwamini BWANA, naye akamhesabia jambo hili kuwa haki.[#Rum 4:3-6,20-25; Zab 106:31; Gal 3:6; Yak 2:23]

⁷Kisha akamwambia, Mimi ni BWANA, niliyekuleta kutoka Uru wa Wakaldayo nikupe nchi hii ili uimiliki.[#Mdo 7:2]

⁸Akasema, Ee Bwana MUNGU, nipateje kujua ya kwamba nitaimiliki?[#Amu 6:36-40; 1 Sam 14:9,10; 2 Fal 20:8; Lk 1:18]

⁹Akamwambia, Unipatie ndama wa miaka mitatu, na mbuzi mke wa miaka mitatu, na kondoo dume wa miaka mitatu, na hua, na mwana njiwa.

¹⁰Akampatia hao wote, akawapasua vipande viwili, akaweka kila kipande kuelekea mwenzake, ila ndege hakuwapasua.

¹¹Na tai walipotua juu ya mizoga Abramu akawafukuza.

¹²Na jua lilipokuwa likichwa usingizi mzito ulimshika Abramu, hofu ya giza kuu ikamwangukia.[#Ayu 4:13,14; Mwa 2:21]

¹³BWANA akamwambia Abramu, Ujue hakika ya kwamba uzao wako utakuwa mgeni katika nchi isiyo yake, watawatumikia watu wale, nao watateswa kwa muda wa miaka mia nne.[#Kut 1:1-14; 12:40; Mdo 7:6]

¹⁴Hata na taifa lile, watakaowatumikia, nitawahukumu; baadaye watatoka na mali nyingi.[#Kut 6:6; 7:14; Kut 12:40-41; Mdo 7:7]

¹⁵Lakini wewe utakwenda kwa baba zako kwa amani, utazikwa katika uzee mwema.[#Mwa 25:8; Ayu 5:26; Ebr 11:13]

¹⁶Na kizazi cha nne kitarudi hapa, maana uovu wa Waamori haujatimia bado.[#Mt 23:32; 1 The 2:16; 2 Pet 3:8,9]

¹⁷Ikawa, jua lilipokuchwa likawa giza, tazama, tanuri ya moshi na mwenge unaowaka ulipita kati ya vile vipande vya nyama.

¹⁸Siku ile BWANA akafanya agano na Abramu, akasema, Uzao wako nimewapa nchi hii, kutoka mto wa Misri mpaka huo mto mkubwa, mto Frati,[#Mdo 7:5; Mwa 17:8; Kum 1:7; Hes 34:3; 2 Nya 9:26; Neh 9:8; Zab 105:11]

¹⁹Mkeni, na Mkenizi, na Mkadmoni,

²⁰na Mhiti, na Mperizi, na Mrefai,

²¹na Mwamori, na Mkanaani, na Mgirgashi, na Myebusi.