Utukufu wa enzi ya Mungu

¹BWANA ametamalaki, nchi na ishangilie,

Visiwa vingi na vifurahi.

²Mawingu na giza vyamzunguka,

Haki na hukumu ndio msingi wa kiti chake.

³Moto hutangulia mbele zake,[#Dan 7:10; Hab 3:5]

Nao huwateketeza watesi wake pande zote.

⁴Umeme wake uliuangaza ulimwengu,

Nchi ikaona ikatetemeka.

⁵Milima iliyeyuka kama nta mbele za BWANA,

Mbele za Bwana wa dunia yote.

⁶Mbingu zimetangaza haki yake,

Na watu wote wameuona utukufu wake.

⁷Na waaibishwe wote waabuduo sanamu,[#Kut 20:4; Law 26:1; Isa 37:18,19; Yer 10:14; Ebr 1:6]

Wajivunao kwa vitu visivyofaa;

Enyi miungu yote, msujuduni Yeye.

⁸Sayuni imesikia na kufurahi,

Binti za Yuda walishangilia,

Kwa sababu ya hukumu zako, Ee BWANA.

⁹Maana Wewe, BWANA, ndiwe Uliye juu,[#Efe 1:21]

Juu sana kuliko nchi yote;

Umetukuka sana juu ya miungu yote.

¹⁰Enyi mmpendao BWANA, uchukieni uovu;[#Zab 101:3; Amo 5:15; Rum 7:15; 1 Sam 2:9; Mit 2:8; Dan 3:28]

Huwalinda nafsi zao watauwa wake,

Na kuwaokoa na mkono wa wasio haki.

¹¹Nuru humwangazia mwenye haki,

Na furaha ni kwa wanyofu wa moyo.

¹²Enyi wenye haki, mfurahieni BWANA,

Na kulishukuru jina lake takatifu.